استاناداعى ۇلتتىق اكادەميالىق كىتاپحانادا بەلگىلى اقىن، ايتىسكەر، حالىقارالىق «الاش» سىيلىعىنىڭ يەگەرى، «التىن القالى» ارداقتى انا ەگەۋحان مۇقاماديقىزىنىڭ 85 جىلدىق مەرەيتويىنا ارنالعان ءىس-شارا ءوتتى، دەپ حابارلايدى "ادىرنا" ۇلتتىق پورتالى.
مەرەيتوي اياسىندا اقىننىڭ قوس بىردەي كىتابى – «جۇرەكجاردى» مەن «كۇدەر جون، كۇرەڭ بەلدەردە» جيناقتارىنىڭ تۇساۋكەسەرى ۇيىمداستىرىلدى.
ءىس-شارانى قر ءماجىلىسىنىڭ دەپۋتاتى، اقىن جاناربەك ءاشىمجان جۇرگىزدى. سالتاناتتى جيىنعا التىنشاش جاعانوۆا، ۇلىقبەك ەسداۋلەت، عالىم جايلىباي، سەرىكزات دۇيسەنعازى، شەرۋباي قۇرمانبايۇلى، كۇلاش احمەتوۆا مەن وزگە دە اقىن-جازۋشىلار، جۋرناليستەر قاتىستى.
«امانات» پارتياسى اتقارۋشى حاتشىسى داۋلەت كارىبەك، استانا قالاسى اكىمىنىڭ ورىنباسارى ەسەت بايكەن جانە تىلدەردى دامىتۋ جانە مۇراعات باسقارماسىنىڭ باسشىسى ساكەن ەسىركەپ قالا اكىمى جەڭىس قاسىمبەكتىڭ ارنايى قۇتتىقتاۋ حاتىن تابىستادى.
سونىمەن قاتار، مەملەكەتتىك كەڭەسشى ەرلان قارين مەن مادەنيەت جانە اقپارات ءمينيسترى ايدا بالاەۆا جولداعان قۇتتىقتاۋ حاتتار دا جينالعان جۇرتشىلىققا وقىلدى.
«جۇرەكجاردى» جيناعى راقىمعالي ابرارۇلى باسقاراتىن «اتامۇرا» باسپاسىنان جارىق كوردى. ءىس-شاراعا الماتى قالاسىنان ارنايى بارعان «اتامۇرا» كورپوراتسياسىنىڭ ۆيتسە-پرەزيدەنتى راحيما ابرارقىزىنا شاپان جابىلدى.
ەگەۋحان مۇقاماديقىزى — ايتىس ارقىلى تانىلىپ، جازبا پوەزيادا دا وزىندىك ورنەك سالعان قالامگەر. ول – قازاقستان مەن موڭعوليا جازۋشىلار وداعىنىڭ مۇشەسى. سونىمەن قاتار، ون بالا تاربيەلەپ وسىرگەن التىن قۇرساق انا.
