دەنساۋلىق ساقتاۋ ءمينيسترى شەگىرتكەنى جەۋگە قاتىستى پىكىر ءبىلدىردى، دەپ حابارلايدى "ادىرنا" ۇلتتىق پورتالى.
11 ماۋسىمدا مينيستر اقمارال ءالنازاروۆا ۇكىمەت ۇيىندەگى ءباسپاسوز ءماسليحاتىندا ۆيتسە-پرەمەر سەرىك جۇمانعاريننىڭ شەگىرتكەنى «حالال اس» دەگەن مالىمدەمەسىنە پىكىر ءبىلدىردى.
«وتكەن اپتادا پرەمەر-ءمينيستردىڭ ورىنباسارى سەرىك جۇمانعارين «شەگىرتكە حالال، ونى جەۋگە بولادى» دەپ مالىمدەمە جاساپ، ءبىراز سىننىڭ استىنا قالدى. ءسىز – قازاقستاننىڭ باس دارىگەرىسىز. وسىعان قاتىستى ءسىزدىڭ پىكىرىڭىزدى بىلسەك، شىنىمەن شەگىرتكەنى جەۋگە بولا ما؟» - دەپ سۇرادى “ازاتتىق رۋحى” رەداكتسياسىنىڭ ءتىلشىسى.
مينيستر جاۋاپ بەرۋدەن قاشقاقتاعانىمەن كەيىننەن باق سۇراعىنا جاۋاپ بەردى.
«ارىپتەستەر، سىزدەردى قۇرمەتتەيمىن. بۇل سۇراقتى كوممەنتاريسىز قالدىرسام... ءاربىر مەملەكەتتىڭ ءوزىنىڭ ءداستۇرى بار. قازاققا ءتان ەمەس ءداستۇر دەپ بىلەمىن. سوندىقتان قازىر ونىڭ زيانى، پايداسى بار، حالال، حالال ەمەس دەپ ايتۋعا دايىن ەمەسپىن. بۇل مەنىڭ قۇزىرەتىمە كىرمەيدى»، - دەدى دەنساۋلىق ساقتاۋ ءمينيسترى اقمارال ءالنازاروۆا.
