بۇگىنگى ۇكىمەت وتىرىسىنان كەيىن دەنساۋلىق ساقتاۋ ءمينيسترى اقمارال ءالنازاروۆا ءمامس جۇيەسىنە بايلانىستى سۇراقتارعا جاۋاپ بەردى، دەپ حابارلايدى "ادىرنا" ۇلتتىق پورتالى.
"نەگىزى ءمامس جۇيەسى مەن مەديتسينا سالاسىنا پرەزيدەنت تاراپىنان ءتيىستى سىندار ايتىلدى. ءبىز ونىڭ ءبارىن قابىلداپ، سوڭعى ءۇش اپتانىڭ ىشىندە ءتيىستى ساراپتامالار جۇرگىزدىك. ءبىز ءمامس پەن دەنساۋلىق ساقتاۋ جۇيەسىنىڭ ازاماتتارعا نە سەبەپتەن مەديتسينالىق كومەكتى ءوز دەڭگەيىندە كورسەتە الماي وتىرعانىن زەرتتەدىك. وسىعان بايلانىستى ىستەيتىن جوبالاردى بۇگىنگى كۇنى دايىنداپ جاتىرمىز.
ونىڭ ىشىندە زاڭنىڭ اياسىنداعى كەيبىر دۇنيەلەردى وزگەرتۋ قاجەت. سەبەبى مەملەكەت تاراپىنان كەپىلدەندىرىلگەن جانە ءمامس جۇيەسى ارقىلى كورسەتىلەتىن مەديتسينالىق كومەك ارالاسىپ جاتىر. وسىنىڭ سەبەبىنەن حالىق، ءتىپتى مەديتسينالىق قىزمەتكەرلەردىڭ اراسىندا تۇسىنىكسىز ماسەلەلەر بولىپ جاتىر. وسى جاعداي بولىنگەن قاراجاتتى ءتيىمسىز پايدالانۋعا الىپ كەلىپ وتىر. سونددىقتان ءمامس جۇيەسىنە باقىلاۋ كەرەك.
قازىرگى تاڭدا ءتيىستى جۇمىستاردى باستاپ كەتتىك. سەبەبى ءمامس جۇيەسى حالىقارالىق تاجىريبەدە مەملەكەتكە پايداسىن تيگىزگەن جۇيە. سول سەبەپتى بۇل جۇيە بىزگە قاجەت. بىراق تاجىريبە جۇزىندە كەيبىر جەرلەرىن دۇرىستاۋ كەرەك. ءمامس جۇيەسىن وزگەرتۋ كونتسەپتسياسىن 11 ناۋرىزعا دەيىن ۇكىمەت باسشىسىنا ۇسىناتىن بولامىز. ەڭ باستىسى حالىققا قول جەتىمدى ساپالى مەديتسينالىق قىزمەت كورسەتۋدى ەنگۋ ءبىزدىڭ ەڭ نەگىزگى ماقساتىمىز بولىپ وتىر»، – دەدى مينيستر.
"ادىرنا" ۇلتتىق پورتالى