ونەر قايراتكەرلەرى، عالىمدار مەن اقىن-جازۋشىلاردىڭ ءبىر توبى بۇرىنعى مادەنيەت جانە سپورت ءمينيسترى ارىستانبەك مۇحامەديۇلىنا اراشا سۇرادى. حات باس پروكۋرور بەرىك اسىلوۆ پەن جوعارعى سوت توراعاسى جاقىپ اسانوۆتىڭ اتىنا جولدادى دەپ، حابارلايدى "ادىرنا" ۇلتتىق پورتالى.
قول قويعاندار قاتارىندا قازاقستاننىڭ حالىق ءارتيسى ءاسانالى ءاشىموۆ، اقىن مۇحتار شاحانوۆ، ۇعا اكادەميگى تورەگەلدى شارمانوۆ، كسرو حالىق ءارتيسى بيبىگۇل تولەگەنوۆا، ءانشى ءمادينا سادۋاقاسوۆا جانە تاعى دا وزگە تانىمال ازاماتتار بار.
"ۇلتىم، جۇرتىم، ونەرىم دەپ ىشكەن اسىن جەرگە قويعان ازاماتتان ەلدىڭ قارجىسىنا قول سالاتىن ارسىز قىلىق شىقپايتىنىنا قارت جۇرەگىمىز سەنىمدى", - دەلىنگەن حاتتا.
بۇرىنعى مادەنيەت جانە سپورت ءمينيسترى، قر ۇلتتىق مۋزەيىنىڭ ەكس-ديرەكتورى ارىستانبەك مۇحامەديۇلى 28 مامىر كۇنى ۇلتتىق مۋزەيدىڭ قاراجاتىنا قول سالدى دەگەن ايىپپەن قاماۋعا الىنعان ەدى. ەل زيالىلارىنىڭ اراشا سۇراپ جولداعان حاتىن بۇرىنعى مينيستر ءوزىنىڭ instagram پاراقشاسىندا ءبولىستى.
"ادىرنا" ۇلتتىق پورتالى
