اقمولا وبلىسىنىڭ ورمان شارۋاشىلىعى كاسىپورىندارىنا Mitsubishi بازاسىنداعى 9 جاڭا ورمان پاترۋلدىك كەشەندەرى تاپسىرىلدى.
ءار ماشينا كەز-كەلگەن جەردەن ەش قيىندىقسىز وتە الادى. ءتىپتى، ارنايى ءورت ءسوندىرۋ قۇرالدارىمەن جابدىقتالعان. كولىك 5 ادامعا شاقتالعان. ارنايى تەحنيكا وبلىستىق بيۋدجەتتەن بولىنگەن قارجىدان ساتىپ الىندى.
اقمولا وبلىسىنىڭ اكىمى مارات احمەتجانوۆ ورمان شارۋاشىلىعى كاسىپورىندارىنا ارنايى كولىكتەردىڭ كىلتتەرىن سالتاناتتى تۇردە تابىس ەتتى.
ايماق باسشىسى ءوز سوزىندە ورمان شارۋاشىلىعى قىزمەتكەرلەرىنىڭ وڭىردەگى ەكولوگيالىق احۋالدى جاقسارتۋعا قوسقان ۇلەسى وراسان زور ەكەنىن اتاپ ءوتتى.
«ورماندا اعاش ءوسىرۋ - وتە كۇردەلى جانە جاۋاپتى شارۋا. ورمان قورىن ساقتاۋ جانە قورعاۋ – ورمان شارۋاشىلىعى مەكەمەلەرى قىزمەتكەرلەرىنىڭ الدىندا تۇرعان باستى مىندەت. ءبىزدىڭ ءوڭىر ەرەكشە تابيعاتى مەن جانۋارلار دۇنيەسىنە باي. وسى بايلىقتى ساقتاۋ ءۇشىن ورمانشىلار اۋا-رايىنىڭ قولايسىزدىعىنا قاراماستان تاۋلىك بويى كەزەكشىلىك جاسايدى. ەكولوگيالىق سەكتوردى ساقتاۋ جانە دامىتۋ ءۇشىن مەملەكەت ورمان شارۋاشىلىعى ۇيىمدارىنىڭ ماتەريالدىق-تەحنيكالىق بازاسىن نىعايتۋعا جانە ورمان شارۋاشىلىعى جۇمىستارىن جۇرگىزۋگە قاراجات بولەدى. ورمان كۇزەتى قىزمەتكەرلەرىنىڭ كيىمدەرى جاڭارتىلدى، ورتكە قارسى كيىمدەر جيناقتارى الىندى. سوڭعى ءۇش جىلدا بۇل ماقساتقا 1 ميلليارد تەڭگەدەن استام قارجى ءبولىندى»، - دەدى مارات احمەتجانوۆ.
شارا سوڭىندا ورمان شارۋاشىلىعى قىزمەتكەرلەرىن «ەكولوگيا سالاسىنىڭ ۇزدىگى» توسبەلگىلەرىمەن وبلىس اكىمىنىڭ العىس حاتتارى تابىستالدى.
بارلىعى وڭىردە 13 ورمان شارۋاشىلىعى بار. وندا 500-گە جۋىق مەملەكەتتىك ورمان كۇزەتشىسى جۇمىس ىستەيدى.
مەملەكەت باسشىسى قاسىم-جومارت توقاەۆتىڭ 2021-2023 جىلدارعا ارنالعان اقمولا وبلىسىندا ەلىمىزدىڭ ورمان قورىن، قالالارى مەن اۋىلدارىن اۋقىمدى اباتتاندىرۋ بويىنشا العا قويعان مىندەتتەرىن ىسكە اسىرۋ اياسىندا 40 ميلليونعا جۋىق كوشەت پەن 6 مىڭ گەكتاردان استام جاپىراقتى اعاش كوشەتتەرى وتىرعىزۋ كوزدەلىپ وتىر. بيىل كوكتەمگى ۋاقىتتا 12,5 ميلليونعا جۋىق كوشەت وتىرعىزىلدى.
