اقمولا وبلىسىندا تۇكش جاڭعىرتۋعا 7,3 ميلليارد تەڭگە ينۆەستيتسيا تارتۋ جوسپارلانعان. بۇل تۋرالى قر ۇەم تابيعي مونوپوليالاردى رەتتەۋ كوميتەتىنىڭ اقمولا وبلىسى بويىنشا دەپارتامەنتىنىڭ باسشىسى اسىلبەك قۋاندىقۇلى بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
دەپارتامەنت وڭىردەگى 71 تابيعي مونوپوليا سۋبەكتىسىنىڭ قىزمەتىن رەتتەپ، 165 ءتۇرلى قىزمەت ءتۇرىن باقىلايدى. وتكەن جىلى تاريفتىك سمەتالار مەن ينۆەستيتسيالىق باعدارلامالاردىڭ ورىندالماۋى ناتيجەسىندە 1,8 ميلليارد تەڭگەدەن استام قاراجات ماقساتسىز جۇمسالعانى انىقتالدى. ەڭ كوپ زاڭبۇزۋشىلىقتار جىلۋمەن قامتۋ سالاسىندا تىركەلىپ، 1,2 ميلليارد تەڭگە كولەمىندەگى قارجى دۇرىس پايدالانىلماعان. ءتارتىپ بۇزعانداردىڭ قاتارىندا «كوكشەتاۋ جىلۋ»، «كوكشەتاۋ سۋ ارناسى» جانە «كوكشەتاۋ ەنەرگو» ءتارىزدى مەكەمەلەر بار. جىلۋ تاريفتەرىن قايتا ەسەپتەۋ ماسەلەسى دە وتكىر تالقىلاندى.
«ءبىز تالداۋ جۇرگىزىپ، جىلۋدىڭ جەتكىلىكسىز بەرىلگەنىن انىقتادىق. سونىڭ ناتيجەسىندە تۇتىنۋشىلارعا 33,5 ميلليون تەڭگە قايتارىلۋى ءتيىس. بۇل وتكەن جىلمەن سالىستىرعاندا ەكى ەسە كوپ» – دەدى دەپارتامەنت باسشىسى اسىلبەك قۋاندىقۇلى.
تاعى ءبىر وزەكتى ماسەلە – ينجەنەرلىك جەلىلەردىڭ توزۋ دەڭگەيىنىڭ جوعارى بولۋى. ەلەكتر جەلىلەرىنىڭ 62%-ى، سۋ بۇرۋ جۇيەلەرىنىڭ 64%-ى، ال جىلۋ جۇيەلەرىنىڭ 58%-ى ابدەن توزعان. وسىعان بايلانىستى 2,6 مىڭ شاقىرىم جەلىنى جاڭارتۋعا 15,4 ميلليارد تەڭگە ينۆەستيتسيا تارتۋ جوسپارلانىپ وتىر.
بۇعان قوسا، 2024 جىلدىڭ اقپانىنان باستاپ تاريف بەلگىلەۋدىڭ جاڭا ەرەجەلەرى كۇشىنە ەندى. وعان سايكەس، الەۋمەتتىك تۇتىنۋ نورمالارى ەنگىزىلىپ، تولەم مولشەرى تۇرعىن ءۇيدىڭ كولەمى مەن پايدالانىلعان رەسۋرس كولەمىنە قاراي بەلگىلەنەدى.
«مىسالى، سۋ تۇتىنۋدا ءتورت سانات بەكىتىلدى – ءار ادامعا ايىنا 3-تەن 10 جانە ودان دا كوپ تەكشە مەترگە دەيىن. بۇل شارا رەسۋرستاردى ۇنەمدەۋگە باعىتتالعان» – دەپ ءتۇسىندىردى سپيكەر.
وبلىس بويىنشا الەۋمەتتىك نورمالار قازىردىڭ وزىندە التى تابيعي مونوپوليا سۋبەكتىسىنىڭ جەتى قىزمەتىندە ەنگىزىلدى. ولاردىڭ ىشىندە «كوكشەتاۋ جىلۋ»، «كومحوز»، «تسەلينوگراد كوممۋنالدىق قىزمەتى»، «كوكشەتاۋ سۋ ارناسى» جانە باسقا دا مەكەمەلەر بار.
ەنەرگەتيكا مەن تۇرعىن ءۇي-كوممۋنالدىق شارۋاشىلىق سالاسىن جاڭعىرتۋعا ارنالعان ۇلتتىق جوبا اياسىندا اقمولا وبلىسىنا 7,3 ميلليارد تەڭگە ينۆەستيتسيا تارتۋ جوسپارلانۋدا. قاراجات جىلۋ، سۋ جانە كارىز جۇيەلەرىن قايتا قۇرۋعا جۇمسالادى. باستى جوبالاردىڭ قاتارىندا – كوكشەتاۋداعى جىلۋ ماگيسترالىن جاڭارتۋ، ستەپنوگورسك جىلۋ ەلەكتر ورتالىعىن مودەرنيزاتسيالاۋ،
ششۋچينسك پەن سوفيەۆكادا سۋ قۇبىرلارىن سالۋ جانە كارىز كوللەكتورلارىن جاڭارتۋ جۇمىستارى بار.
بۇل باستامالار وڭىردەگى تۇرعىندارعا ساپالى كوممۋنالدىق قىزمەتتەر ۇسىنىپ، تاريفتەردىڭ ءادىل ءارى اشىق بولۋىن قامتاماسىز ەتۋگە باعىتتالعان.
