توتەنشە جاعدايلار دەپارتامەنتى اقمولا وبلىسىنىڭ تۇرعىندارى مەن قوناقتارىن سۋداعى قاۋىپسىزدىك ەرەجەلەرىن ساقتاۋعا شاقىرادى. قازىرگى تاڭدا وڭىردەگى سۋ ايدىندارىندا مۇز قاباتى جۇقا. وسىعان بايلانىستى مۇز ۇستىنە شىقپاۋدى، بالالاردىڭ قاۋىپسىزدىگىن قاداعالاۋدى جانە كوكتەمگى كەزەڭدەگى مۇز ۇستىندەگى قاۋىپ-قاتەر جايىندا ءتۇسىندىرۋ جۇمىستارىن جۇرگىزۋدە. بۇل تۋرالى بريفينگتە اقمولا وبلىسى تجد ازاماتتىق قورعانىس باسقارماسى باسشىسىنىڭ مىندەتىن اتقارۋشى الماز بەكباەۆ ءمالىم ەتتى، دەپ حابارلايدى.
ونىڭ ايتۋىنشا، بيىلعى جىلدىڭ 1 قىركۇيەگىنەن باستاپ اڭشىلىق جانە بالىق اۋلاۋ ماۋسىمىنىڭ اشىلۋىمەن دەپارتامەنت قىزمەتكەرلەرى كۇن سايىن حالىق اراسىندا ءتۇسىندىرۋ جۇمىستارىن جۇرگىزىپ كەلەدى. بۇل جۇمىستار پوليتسيا دەپارتامەنتىنىڭ جەرگىلىكتى بولىمشەلەرىمەن، كولىك ينسپەكتسياسىمەن بىرلەسە ۇيىمداستىرىلىپ وتىر.
«سۋ ايدىندارىنداعى قاۋىپسىزدىكتى ارتتىرۋ ماقساتىندا 350 راديو حابار، 8 بريفينگ وتكىزىلدى، 20 مىڭنان استام جادىناما مەن كىتاپشا تاراتىلىپ، 6 مىڭعا جۋىق QR-كودتار جاپسىرىلىپ، الەۋمەتتىك جەلىلەردە 304 ماتەريال جاريالاندى. بۇعان قوسا، 150 ماقالا ءباسپاسوز بەتتەرىندە جارىق كورگەن»، — دەدى ول.
توتەنشە جاعدايلار دەپارتامەنتى WhatsApp مەسسەندجەرىن دە ءتيىمدى پايدالانىپ كەلەدى. بالىقشىلار مەن اڭشىلاردىڭ وڭىرلىك توپتارىنا سۋداعى قاۋىپسىزدىك تۋرالى اقپارات تۇراقتى تۇردە جىبەرىلىپ تۇرادى. ارنايى قۇرىلعان توپتا 244 بالىقشى تىركەلگەن، ولار كۇندەلىكتى اۋا رايى بولجامى مەن قاۋىپسىزدىك ەرەجەلەرى تۋرالى سمس حابارلامالار الىپ وتىرادى. بۇل ءادىس سۋداعى قايعىلى وقيعالاردىڭ الدىن الۋعا سەپتىگىن تيگىزۋدە.
«دەگەنمەن، اڭشىلىق جانە بالىق اۋلاۋ ماۋسىمى كەزىندە 4 اۆتوكولىكتىڭ مۇز استىنا ءتۇسىپ كەتكەن جاعدايى تىركەلدى. ابىروي بولعاندا، ادام ءولىمى مەن جاراقاتتانۋ جاعدايلارى بولعان جوق. وسى ورايدا، توتەنشە جاعدايلار دەپارتامەنتى قر ءىىم 2015 جىلعى 19 قاڭتارداعى №34 بۇيرىعىنا سايكەس، ارنايى بەكىتىلگەن وتكەلدەردەن تىس جەرلەردە مۇز ۇستىنە كولىكپەن شىعۋعا تىيىم سالىناتىنىن ەسكەرتەمىز»، — دەدى سپيكەر.
تج دەپارتامەنتى جازعى ماۋسىمعا دايىندىق جۇمىستارىن دا الدىن الا باستادى. بيىل وبلىس اۋماعىندا 82 رەسمي شومىلۋ ورنى اشىلاتىنى جوسپارلانعان.
«كوپشىلىك جينالاتىن قوپا، زەرەندى، ششۋچينسك جانە بۋراباي كولدەرىنىڭ جاعاسىندا قاۋىپسىزدىكتى قامتاماسىز ەتۋ ماقساتىندا قۇتقارۋ بەكەتتەرى قويىلادى. بۇدان بولەك، وتكەن جىلعى تاجىريبە نەگىزىندە اتالعان ءتورت ءىرى سۋ ايدىنىندا بالالارعا ارنالعان جاعاجايلار ۇيىمداستىرىلاتىن بولادى»، — دەپ تولىقتىردى تجد وكىلى.
سۋداعى جازاتايىم وقيعالاردىڭ الدىن الۋ ماقساتىندا ۇكىمەتتىك ەمەس ۇيىمدارمەن مەموراندۋمدارعا قول قويىلىپ، سۋ ايدىندارىن جالعا الۋشىلارعا قۇتقارۋ بەكەتتەرىن جابدىقتاۋ قاجەتتىلىگى تۋرالى ۇسىنىس حاتتار جولداندى.
1 مامىردان باستاپ، سۋ ايدىندارىنىڭ ءتۇبىن تەكسەرۋ جۇمىستارى، قوعامدىق قۇتقارۋشىلاردى وقىتۋ مەن جازعى دەمالىس لاگەرلەرىندە ءتۇسىندىرۋ ساباقتارى ۇيىمداستىرىلادى. سونىمەن قاتار، مەكتەپتەردە ينتەراكتيۆتى ساباقتار مەن بەينەروليكتەر ارقىلى وقۋشىلارعا سۋداعى قاۋىپسىزدىك ەرەجەلەرى ۇيرەتىلۋدە. اتا-انالار چاتىنا دا ءتيىستى ۇسىنىستار جولدانىپ وتىر.
جازعى دەمالىس قارساڭىندا لاگەرلەردىڭ تالىمگەرلەرى ءۇشىن ارنايى سليوت وتكىزىلىپ، قۇتقارۋشىلار سۋداعى العاشقى كومەك كورسەتۋ جانە ادامدى قۇتقارۋ بويىنشا پراكتيكالىق ساباقتار وتكىزەتىن بولادى.
