اقمولا وبلىسىندا كۇننىڭ كۇرت جىلىنۋى جانە نوسەر جاڭبىر سۋ تاسقىنىنا تۇرتكى بولدى. باستى نازار بۇلاندى اۋدانىنا اۋىپ وتىر. الايدا، جاۋاپتى قىزمەتتەردىڭ ۇيلەسىمدى جۇمىسىنىڭ ارقاسىندا جاپپاي سۋ تاسقىنىنا جول بەرىلمەدى. اعىن سۋ كوشەلەر مەن ءۇي اۋلالارىنا جايىلعانىمەن تۇرعىن ۇيلەرگە جەتپەدى.
قارعىن سۋدىڭ كوپ مولشەرى ماكينسكى قالاسىندا بايقالادى. قالا ەرىگەن قار سۋىنىڭ كولەمىنە توتەپ بەرە المادى، ارىقتار سۋعا تولدى. ارنايى تەحنيكا جانە كەزەكشى توپتار-كوممۋنالدىق قىزمەتكەرلەر، قۇتقارۋشىلار، جەرگىلىكتى بيلىك-ءۇزىلىسسىز جۇمىس ىستەپ جاتىر. سۋ سورۋ جۇمىستارى جۇرگىزىلۋدە، ينەرتتى ماتەريالى بار قاپتار توسەلۋدە. جاعداي تۇراقتانۋدا.
يۆانكوۆكا اۋىلىندا اعىن سۋدىڭ ەكپىنى كۇشتى بولعانى سونشالىقتى، كىرەبەرىس كوپىردەن اسىپ تاسىدى. سۋ جولعا جايىلعانىنمەن، ودان ەشكىم زارداپ شەككەن جوق.
«سۋ تۇرعىن جاي ايماعىنا جەتكەن جوق. وتكەن جىلى 41 وتباسى قونىس اۋداردى. سۋ جايىلعان اۋماقتاردا ادامدار تۇرمايدى. سول سەبەپتى، قاۋىپتە جوق. بوگەتتەردىڭ بۇزىلۋى دا بولعان جوق. بۇل تۋرالى تاراپ جاتقان اقپارات جالعان»، — دەپ ءتۇسىندىردى وبلىس اكىمىنىڭ ورىنباسارى مۇرات بالپان.
بوقسىق وزەنىنىڭ بويىندا شيەلەنىستى جاعداي جالعاسۋدا. جۋراۆلەۆكا جانە كاپيتونوۆكا اۋىلدارىنىڭ اۋماعىندا سۋدىڭ وتۋىنە كەدەرگى كەلتىرەتىن مۇز كەپتەلىسى بولدى. جەرگىلىكتى قىزمەتتەر جارىلىس جۇمىستارىن ۇيىمداستىردى. سۋ اعىنى قالپىنا كەلتىرىلدى، بىراق جۇمىس جالعاسۋدا. تەك بۇگىن 600 كگ استام جارىلعىش زات پايدالانىلدى. مامانداردىڭ ايتۋىنشا، جۇمىستار مۇز كەپتەلىسى تولىق جويىلعانعا دەيىن جالعاسا بەرمەكشى.
سۋ اعىزۋ جۇمىستارى پروحوروۆ-كولوكولوۆ سۋ قويماسىنان دا جۇرگىزىلەدى.
«بوگەت تۇراقتى جۇمىس ىستەيدى. جاقىن ماڭداعى اۋىلدارعا قاۋىپ جوق. بايسۋات اۋىلىنىڭ اۋدانىندا اينالما ارنانى كەڭەيتۋ جۇمىستارى جۇرگىزىلۋدە. ول وبلىس اكىمى مارات احمەتجانوۆتىڭ تاپسىرماسى بويىنشا باستالدى، ول ءبىر كۇن بۇرىن اۋدانعا بارىپ، بوگەتتى ارالاپ، بۇلاندى جانە استراحان اۋداندارىنىڭ اكىمدەرىمەن كەڭەس وتكىزدى. جەتى جۇك كولىگى مەن ەكى تيەگىش تارتىلدى»، - دەپ حابارلادى وبلىس اكىمدىگىنەن.
قايراقتى وزەنىندەگى ۆوزنەسەنكا اۋىلىندا سۋ دەڭگەيىنىڭ كوتەرىلۋى بايقالادى. الايدا وزەننىڭ جاعالاۋدان شىعۋ قاۋپى جوق. وتكەن جىلدىڭ كۇزىندە مۇندا ۇزىندىعى ءبىر مىڭ مەتر بولاتىن جاعالاۋ سىزىعىن نىعايتۋ جۇمىستارى جۇرگىزىلدى. ناۋرىزدا جاڭا كوپىر اشىلدى، سونىڭ ارقاسىندا اۋىلدان بايلانىس اجىراتىلمادى. سۋ دەڭگەيى ۇنەمى باقىلانىپ وتىر.
دالادان اعىپ كەلگەن سۋ بوقسىق، قايراقتى جانە مات وزەندەرىنىڭ تابيعي ارنالارى ارقىلى وتەدى. قاجەت بولعان جاعدايدا ارىقتاردى تەرەڭدەتۋ جانە كەڭەيتۋ جۇرگىزىلەدى. جەكەلەگەن ۋچاسكەلەردە سۋ ءۇي ماڭىنداعى اۋماقتارعا جاقىنداعانى بايقالادى، بۇل جەرلەر قۇم سالىنعان قاپتارمەن نىعايتىلۋدا. بارلىق ۋچاسكەلەردەگى جاعداي ناقتى ۋاقىت رەجيمىندە باقىلانىپ وتىر.
وڭىرلىك دامۋ ءبولىمىنىڭ اقپاراتى بويىنشا، بۇلاندى اۋدانىندا سۋ تاسقىنىنا قارسى ءىس-شارالارعا جەكە قۇرامنىڭ 85 ادامى، 28 بىرلىك ينجەنەرلىك جانە سۋ ايداۋ تەحنيكاسى، 34 موتوپومپا جانە ءبىر ءجۇزۋ قۇرالى جۇمىلدىرىلعان. جۇمىستار ءۇزىلىسسىز جالعاسۋدا جانە جەدەل شتاب پەن جەرگىلىكتى اتقارۋشى ورگانداردىڭ تۇراقتى باقىلاۋىندا.
اۋدانداعى جاعداي شيەلەنىستى، بىراق باقىلاناتىن بولىپ قالا بەرەدى. قىزمەتتەر جەدەل جۇمىس ىستەۋدە جانە قازىرگى ۋاقىتتا بىردە-ءبىر ەلدى مەكەنگە بايلانىس ۇزىلگەن ەمەس، تۇرعىنداردىڭ ءومىرى مەن دەنساۋلىعىنا قاۋىپ ءتونىپ تۇرعان جوق.
