Aqmola oblysynyń orman sharýashylyǵy kásiporyndaryna Mitsubishi bazasyndaǵy 9 jańa orman patrýldik keshenderi tapsyryldy.
Ár mashına kez-kelgen jerden esh qıyndyqsyz óte alady. Tipti, arnaıy órt sóndirý quraldarymen jabdyqtalǵan. Kólik 5 adamǵa shaqtalǵan. Arnaıy tehnıka oblystyq bıýdjetten bólingen qarjydan satyp alyndy.
Aqmola oblysynyń ákimi Marat Ahmetjanov orman sharýashylyǵy kásiporyndaryna arnaıy kólikterdiń kiltterin saltanatty túrde tabys etti.
Aımaq basshysy óz sózinde orman sharýashylyǵy qyzmetkerleriniń óńirdegi ekologııalyq ahýaldy jaqsartýǵa qosqan úlesi orasan zor ekenin atap ótti.
«Ormanda aǵash ósirý - óte kúrdeli jáne jaýapty sharýa. Orman qoryn saqtaý jáne qorǵaý – orman sharýashylyǵy mekemeleri qyzmetkerleriniń aldynda turǵan basty mindet. Bizdiń óńir erekshe tabıǵaty men janýarlar dúnıesine baı. Osy baılyqty saqtaý úshin ormanshylar aýa-raıynyń qolaısyzdyǵyna qaramastan táýlik boıy kezekshilik jasaıdy. Ekologııalyq sektordy saqtaý jáne damytý úshin memleket orman sharýashylyǵy uıymdarynyń materıaldyq-tehnıkalyq bazasyn nyǵaıtýǵa jáne orman sharýashylyǵy jumystaryn júrgizýge qarajat bóledi. Orman kúzeti qyzmetkerleriniń kıimderi jańartyldy, órtke qarsy kıimder jınaqtary alyndy. Sońǵy úsh jylda bul maqsatqa 1 mıllıard teńgeden astam qarjy bólindi», - dedi Marat Ahmetjanov.
Shara sońynda orman sharýashylyǵy qyzmetkerlerin «Ekologııa salasynyń úzdigi» tósbelgilerimen oblys ákiminiń alǵys hattary tabystaldy.
Barlyǵy óńirde 13 orman sharýashylyǵy bar. Onda 500-ge jýyq memlekettik orman kúzetshisi jumys isteıdi.
Memleket basshysy Qasym-Jomart Toqaevtyń 2021-2023 jyldarǵa arnalǵan Aqmola oblysynda elimizdiń orman qoryn, qalalary men aýyldaryn aýqymdy abattandyrý boıynsha alǵa qoıǵan mindetterin iske asyrý aıasynda 40 mıllıonǵa jýyq kóshet pen 6 myń gektardan astam japyraqty aǵash kóshetteri otyrǵyzý kózdelip otyr. Bıyl kóktemgi ýaqytta 12,5 mıllıonǵa jýyq kóshet otyrǵyzyldy.
