5 ءساۋىر كۇنى كوكشەتاۋ قالاسىندا ون ەكى اۋدان شارۋالارىنىڭ قاتىسۋىمەن اۋقىمدى جارمەڭكە ءوتتى. تاڭەرتەڭنەن «تاۋەلسىزدىك» الاڭى مەرەكەلىك كوڭىل-كۇيگە تولدى. جارمەڭكەگە اعىلعان حالىق تومەن باعادا، ساپالى ءونىم الۋعا اسىقتى. اۋقىمدى شارا اقمولا وبلىسى اكىمدىگىنىڭ باستاماسىمەن ۇيىمداستىرىلدى.
جارمەڭكەگە ارشالى، اتباسار، استراحان، ەگىندىكول، ەسىل، ەرەيمەنتاۋ، جاقسى، جارقايىڭ، قورعالجىن، تسەلينوگراد اۋداندارى مەن كوكشەتاۋ جانە قوسشى قالالارىنان كەلگەن اۋىل ەڭبەككەرلەرى ءوز ونىمدەرىن اكەلدى. ءار ءوڭىردىڭ ءدامى مەن ەڭبەگى جارمەڭكەنىڭ ءسانىن كەلتىردى. ۇسىنىلعان ونىمدەردىڭ كولەمى 100 توننادان استى. باعاسى نارىقتاعىدان 10–15% ارزان.
«باستى ماقسات — حالىققا ساپالى ءونىمدى ەش دەلدالسىز، ءتيىمدى باعامەن جەتكىزۋ. بۇل جولى جاس مالدىڭ ەتى مولىنان اكەلىندى. ساپانى ۆەتەرينارلىق قىزمەت قاتاڭ باقىلاپ وتىر. بۇل شارا – الەۋمەتتىك ماڭىزى بار ازىق-تۇلىك باعاسىن تۇراقتاندىرۋدىڭ ناقتى ءبىر قادامى»، — دەدى وبلىس اكىمىنىڭ ورىنباسارى ەرنار جاركەشوۆ.
قوسشى قالاسىنداعى «Il TOV» جشس-ءنىڭ وكىلى مەرۋەرت گۋمانوۆا بالالارعا ارنالعان، تەز ءارى وڭاي دايىندالاتىن جارتىلاي فابريكات ونىمدەرىن تانىستىرىپ، كوپشىلىكتىڭ قىزىعۋشىلىعىن تۋدىردى.
سونىمەن قاتار، 30 جىلدان بەرى تابيعي بال وندىرۋمەن اينالىسىپ جۇرگەن ارشالى اۋدانىنىڭ تۇرعىنى پاۆەل رۋبوسول دا ءوز ونىمدەرىن جارمەڭكەدە ۇسىندى. ونىڭ حوش ءيىستى، تابيعي بالدارى ءتۇرلى وڭىرلەردە جوعارى سۇرانىسقا يە بولىپ ۇلگەرگەن.
«مەن وسىنداي اۋىل شارۋاشىلىق جارمەڭكەلەرىن وتكىزبەۋگە تىرىسامىن. ءبىزدىڭ ءونىم سۇرانىسقا يە. باعاسى دا ءتيىمدى»، دەدى ول.
جارمەڭكە تەك ساۋدا ورنى عانا ەمەس، ناعىز مادەني شاراعا اينالدى. الاڭدا ورناتىلعان ساحنادا جەرگىلىكتى ونەرپازدار ءان شىرقاپ، كورەرمەندەردىڭ كوڭىلىن كوتەردى. قازاقتىڭ اۋەزدى اندەرى مەن حالىق كۇيلەرى شىرقالىپ، كەلگەن قوناقتارعا كوتەرىڭكى كوڭىل-كۇي سىيلادى.
«جارمەڭكە وتە جاقسى ۇيىمداستىرىلعان. تىكەلەي وندىرۋشىدەن تومەن باعامەن ساتىپ الۋ بۇل حالىققا ۇلكەن كومەك. ەتتىڭ باعاسى باسقا جەرلەرگە قاراعاندا الدەقايدا ارزان. ءوزىم ەت الۋعا ارنايى كەلدىم. وسىنداي شارالار ءجيى بولىپ تۇرسا ەكەن»، دەپ العىسىن جەتكىزدى قالا تۇرعىنى.
ۇيىمداسترىۋشىلار كوكشەتاۋدا وتكەن اۋىل شارۋاشىلىعى جارمەڭكەسىندە قالا تۇرعىندارىنا ساپالى، قولجەتىمدى ءونىم ۇسىنۋ ارقىلى، حالىققا دەگەن شىنايى جاناشىرلىقتى كورسەتتى.
