سولتۇستىك قازاقستان وبلىسىنداعى سەرگەەۆ سۋ قويماسى 153% تولىپ كەتتى، دەپ حابارلايدى "ادىرنا" ءتىلشىسى.
بۇل تۋرالى سقو تجد اقپاراتتىق-اناليتيكالىق توبىنىڭ باس مامانى جازيرا قوجاحمەتوۆا ايتتى.
ونىڭ سوزىنشە ەسىل وزەنىندە سۋ دەڭگەيى ءالى جوعارىلاپ جاتىر.
قازىرگى ساتتە اتالعان وبلىستا 2023 ءۇي جانە 1115 ءۇي ماڭىنداعى اۋماقتاردى سۋ باسقان.«وبلىسىمىزداعى جاعداي ءالى دە كۇردەلى. سەرگەەۆ سۋ قويماسى 153% تولىپ، سۋ بوگەت شەگىنەن 2 مەتر 67 سم استى. تاۋلىك ىشىندە بۇل دەڭگەي 8 سم تومەندەسە دە، ەسىل وزەنىندە سۋ دەڭگەيى ءالى جوعارىلاۋدا. وسى ورايدا وزەن جاعاسىنىڭ ماڭىندا ورنالاسقان قىزىلجار اۋدانىنىڭ ەلدى مەكەندەرى مەن پەتروپاۆل قالاسىندا ۇيلەردى سۋ باستى»، - دەدى سپيكەر رەسپۋبليكالىق اقپاراتتىق شتابتا وتكەن بريفينگتە.
جالپى وبلىس بويىنشا بارلىعى 10 345 ادام، ونىڭ ىشىندە 2328 بالا قاۋىپسىز جەرگە ەۆاكۋاتسيالانعان. سونىمەن قاتار، 3530 مال قاۋىپسىز جەرگە ايدالعانى دا ءمالىم بولدى.«نەگىزگى سوققى قىزىلجار اۋدانىنىڭ كەنتتەرىنە كەلدى. سونداي-اق، پەتروپاۆل قالاسىنىڭ حرومزاۆود جانە ويقالا شاعىن اۋداندارىندا تاۋلىك ىشىندە 1 324 ءۇيدى سۋ باستى. وندا 5072 ادام كوشىرىلدى»، - دەيدى باس مامان.
ۇقساس جاڭالىقتار
