27 ناۋرىز كۇنى باتىس قازاقستان وبلىسىنىڭ قاراتوبە اۋدانى قورجىن اۋىلى تاسقىن سۋدىڭ استىندا قالدى. وبلىس اكىمى ناريمان تورەعاليەۆ توتەنشە جاعدايلار دەپارتامەنتىنىڭ ماماندارىمەن بىرگە تىكۇشاقپەن اتالعان ەلدى-مەكەنگە بارىپ، تۇرعىنداردى قۇتقارۋ جۇمىستارىنا جەتەكشىلىك ەتتى.
ءوڭىر باسشىسى اۋىل حالقىمەن كەزدەسىپ، ولارعا مەملەكەت تاراپىنان كومەك كورسەتىلەتىنىن ايتتى.
“بارشالارىڭىزدى سابىرعا شاقىرامىن. تابيعي اپات سالدارىنان وبلىستىڭ بىرنەشە اۋداندارى زارداپ شەگۋدە. سىزدەرگە كەلگەن شىعىن بويىنشا ارنايى كوميسسيا قۇرىلادى. كەلتىرىلگەن زالالدىڭ ءبارى ەسەپتەلەدى. مەملەكەت تاراپىنان ءتيىستى كومەك بەرىلەدى. قازىر سىزدەردى توتەنشە جاعدايلار قىزمەتىنىڭ ماماندارىمەن بىرگە سۋ تاسقىنىنان قۇتقارۋعا كەلدىك. تىكۇشاقپەن بارشاڭىزدى اۋدان ورتالىعى قاراتوبەگە، قاۋىپسىز جەرگە جەتكىزەمىز.”-دەدى وبلىس اكىمى.
قورعانىس مينيسترلىگىنىڭ ماماندارى، توتەنشە جاعدايلار مينيسترلىگىنىڭ قۇتقارۋشىلارى 400-گە جۋىق اۋىل تۇرعىنىن تىكۇشاقپەن اۋدان ورتالىعىنا جەتكىزۋ جۇمىستارىن جۇرگىزۋدە.
ءبىرىنشى كەزەكتە بالالار مەن ايەلدەر، دەنساۋلىعى ناشار جانە مۇگەدەكتىگى بار جاندار جەتكىزىلدى.
اتاپ وتەرلىگى، باتىس قازاقستان وبلىسىنداعى سۋ تاسقىنىن الدىن الۋعا كورشى وبلىستاردان ماماندار مەن كۇش قۇرالدارى جۇمىلدىرىلدى.
