ۇكىمەتكە تاڭعالام. جۋرناليست بولعان سوڭ ۇكىمەتتىڭ، پرەزيدەنتتىڭ نە ىستەپ، نە قويىپ جاتقانىن باقىلاپ وتىرامىز.
«سەن - ءۇيدىڭ ۇلكەنىسىڭ. اقىلىڭ بار عوي، قارىنداسىڭ مەن ىنىلەرىڭە يە بول» دەپ پرەزيدەنت الدىڭگۇنى قىتاي ەلىنە ۇلكەن شارۋامەن كەتىپ قالدى. ءۇش كۇننەن كەيىن قايتىپ كەلسە، ءۇيدىڭ ءىشىن سۋ الىپ كەتكەن. اعاسى دەپ تاپسىرىپ كەتكەن ۇكىمەت اي قاراپ، جۇلدىز ساناپ ءجۇر. توتەنشە جاعداي مينيسترلىگى شوشقا تاعالاپ وتىر.
پرەزيدەنت كەلە سالىسىمەن ەلدەگى احۋالدى دەرەۋ باقىلاۋىنا الىپ، شۇعىل جيىن وتكىزدى.
جينالىستا پرەزيدەنت ۇكىمەت پەن اكىمدەردىڭ سۋ تاسقىنى كەزىندەگى سالعىرتتىعىن سىنادى. جىل سايىن جازعىتۇرىم وزەندەر ارناسىنان تاسىپ، قار ەرىپ، جاپپاي سۋ تاسقىنى بولاتىنىن وبلىس اكىمدەرى دە، جەرگىلىكتى اۋدان اكىمدەرى دە جاقسى بىلەدى عوي. جىلدا قايتالاناتىن ءجايت. بيىل دا شەنەۋنىكتەر ارقانى كەڭگە سالىپ، جايباراقات وتىرعانىن كوردىك. سونىڭ كەسىرىنەن قانشاما حالىق ءۇي-جايى مەن مالىنان ايىرىلىپ، باس ساۋعالاپ كەتتى.
پرەزيدەنتتىڭ ايتقان سىنى وتە ورىندى. ياعني، ۇكىمەت پەن جەرگىلىكتى اتقارۋشى ورگانداردىڭ اراسىندا جۇيەلى بايلانىس بولماعان. قاسىم-جومارت توقاەۆ زارداپ شەككەن ءوڭىر تۇرعىندارىنا ۇلكەن كولەمدە شىعىن كەلگەنىن ايتا كەلە، وعان قىنجىلاتىنىن جەتكىزدى. مەملەكەت باسشىسى قيىن جاعدايعا بايلانىستى حالىقتان كەشىرىم سۇراپ، بارلىق ازاماتقا كومەك كورسەتىلەتىنىن ايتتى.
اقتوبە، اباي، الماتى، اقمولا، اتىراۋ، بقو، شقو، سقو، قوستاناي، قاراعاندى، ۇلىتاۋ جانە پاۆلودار وبلىسىندا وبلىستىق جەدەل شتابتار جۇمىس ىستەپ جاتىر. ايتا كەتەرلىگى، تۇركىستان، اقتوبە، قوستاناي، باتىس قازاقستان، اقمولا، ۇلىتاۋ جانە اباي وبلىستارىندا 10 587 ادام، ونىڭ ىشىندە 5 101 بالا قۇتقارىلىپتى. اقتوبە، باتىس قازاقستان، اقمولا، اباي وبلىستارىنداعى ۋاقىتشا ورنالاستىرۋ پۋنكتتەرىنە 5 497 ادام، ونىڭ ىشىندە 1 739 بالانى ورنالاستىرعان.
ءدال قازىرگى جاعدايدا بەلسەندى قوعام مۇشەلەرىنىڭ ارقاسىندا زارداپ شەككەندەرگە قولداۋ كورسەتىلىپ جاتىر. مىسالى، ەلوردالىقتار قوستاناي وبلىسىنداعى سۋ تاسقىنىنان زارداپ شەككەندەر مەن قۇتقارۋشىلارعا كومەك جىبەردى. بىرنەشە جۇك كولىگىنە جىلى كيىم، رەزەڭكە ەتىك، راتسيا، قۇتقارۋ جۇمىستارىنا قاجەتتى زاتتار تيەلگەن ەكەن. قاراپايىم تۇرعىندار بىرلەسىپ قاراجات جيناپ بەردى. وسىنداي قوعامدىق جۇمىستار ەلىمىزدىڭ ءار وڭىرىندە جۇرگىزىلىپ جاتىر.
پرەزيدەنت سۋ تاسقىنىنا قارسى ۋاقىتىلى شارا قابىلداماعان بىرقاتار شەنەۋنىكتەردى سىنعا الدى. ونىڭ ىشىندە پرەمەر-ءمينيستردىڭ ءبىرىنشى ورىنباسارى رومان سكليار، سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ قاتاڭ سوگىس السا، اقتوبە، قوستاناي، باتىس قازاقستان وبلىسىنىڭ اكىمدەرىنە دە قاتاڭ سوگىس جاريالاندى. بۇل تىزىمدە اتىراۋ، اقمولا، الماتى، پاۆلودار جانە اباي وبلىستارىنىڭ اكىمدەرى دە بار.
پرەزيدەنت جاعدايدى قالىپقا كەلتىرۋ ءۇشىن شۇعىل شارالار قابىلداۋمەن قاتار، ازاماتتاردىڭ قاۋىپسىزدىگىن قامتاماسىز ەتۋ جونىندە تاپسىرما بەردى.
اپات سالدارىنان كەلگەن شىعىندار ەسەپتەلىنەدى. ياعني، كەلتىرگەن ماتەريالدىق شىعىن كولەمىن انىقتاۋ ماقساتىندا ارنايى كوميسسيا قۇرىلدى. الداعى ۋاقىتتا ءۇي-جايى مەن مالىنان ايىرىلعان ادامدارعا وتەماقى بەرىلەتىن بولادى. بۇل دا كوڭىلگە مەدەت.
ءبىزدىڭ ۇكىمەت پرەزيدەنت ءوزى كىرىسپەسە، كوزدەرى جىپىلىقتاپ وتىرا بەرە مە؟ سوعان تاڭعالام.
Aidos Juqanuly
