الەۋمەتتىك جەلىدە اعىندى سۋدان قىز بالانى ارقالاپ وتكەن ەر ادامنىڭ ارەكەتى تالقىلانىپ جاتىر، دەپ حابارلايدى "ادىرنا" ءتىلشىسى.
الەۋمەتتىك جەلىگە تاراعان ۆيدەودا توپان سۋدان وتە الماي تۇرعان قىزدى ەر ادام ارقالاپ، جاعاعا شىعارعان.
بەينەدە قىز بالانىڭ “قانداي اسەرلى ءسات” دەگەن داۋسى ەستىلەدى.
ءومىر شىنىبەكۇلى Facebook جەلىسىندەگى پاراقشادا:
"قىزدى ارقالاپ سۋدان وتكىزگەن جىگىتتىڭ اتى-ءجونى قاپيات داۋلەت ەكەن. اقشاسى تولەنگەن تاكسيدەن ءتۇسىپ كەتە بارعان قىزدى تانىساڭىزدار، جىگىتتىڭ بەتىنەن ء"شوپ" ەتكىزگەندە كەرەمەت كورىنىس بولار ەدى، اتتەڭ-اي... قىزدىڭ شەشەسىنە سالەم ايتىڭىزدار. قىزىنا ءتىپتى "راحمەت" ايتۋدى ۇيرەتپەپتى. ارينە جىگىت العىس الۋ ءۇشىن وتكىزگەن جوق... دەگەنمەن، كەز-كەلگەن ەڭبەكتىڭ وتەۋى ەڭ قۇرىسا ءبىر اۋىز جىلى ءسوز بولۋى كەرەك", - دەپ جازدى.
BI Group ديرەكتورلار كەڭەسىنىڭ توراعاسى ايدىن راحىمباەۆ ۆيدەوداعى جىگىت كومپانيا قىزمەتكەرى ەكەنىن جازدى.
“ونىڭ ەسىمى – قاپيات داۋلەت، ءبىزدىڭ قاتارداعى قىزمەتكەر، استاناداعى نىسانداردىڭ بىرىندە جەدەل ەسەپ مامانى. قيىن جاعدايدا ءسوزسىز كومەككە كەلەتىن جىگىتتەردى ماقتان تۇتامىن. وسى ءبىر توپان سۋ كۇنىندە اپاتتى جەڭۋگە كومەكتەسەتىن دە ءدال وسىنداي جىگىتتەر”، – دەپ جازدى راحىمباەۆ Facebook پاراقشاسىندا.
سونىمەن قوسا ايدىن راحىمباەۆ سۋ باسقان وڭىرلەرگە كومپانياسىنىڭ قارجىلاي كومەكتى ارتتىراتىنىن دا ايتتى.
“ناعىز جىگىتتەر وسىنداي قيىن كەزدەردە سىنالادى. داۋلەت دەگەن ءبىزدىڭ قاراپايىم جۇمىسشى، ناعىز ازامات. ەڭ باستىسى، ەل باسىنا كۇن تۋعاندا بىرىگىپ، ءبىر-بىرىمىزگە كومەك كورسەتسەك، ءبارىن جەڭەمىز”، – دەدى ول.
