فوتو جي كومەگىمەن جاسالدى
قىرعىزستاندا ءدىني تاقىرىپتا جازبا جاريالايتىن بلوگەرلەرگە ارنايى كۋالىك الۋ تالابى ەنگىزىلدى، دەپ حابارلايدى "ادىرنا" ۇلتتىق پورتالى.
بۇل تۋرالى ۇلتتىق ءدىن ىستەرى جانە ەتنوسارالىق قاتىناستار اگەنتتىگىنىڭ باس مامانى نۋرگازى كىرگىزباەۆ ايتتى.
24 kg دەرەگىنشە، زاڭناماعا ء«دىني ۋاعىزشى» دەگەن جاڭا ۇعىم ەنگىزىلگەن. وسىعان بايلانىستى ءدىني تاقىرىپتا بلوگ جۇرگىزەتىن، پودكاست تۇسىرەتىن نەمەسە الەۋمەتتىك جەلىلەردە پىكىر بىلدىرەتىن اۆتورلار الدىمەن قىرعىزستان مۇسىلماندارىنىڭ ءدىني باسقارماسىنا جۇگىنىپ، ءدىني ءبىلىمىن راستاۋى كەرەك. سونداي-اق بلوگىندا قانداي ءدىني باعىتتاردى قامتيتىنىن الدىن الا كورسەتۋى ءتيىس.
تەكسەرۋدەن وتكەننەن كەيىن اۆتور مەملەكەتتىك ءدىن ىستەرى اگەنتتىگىنە جۇگىنىپ، ءبىر جىلعا جارامدى ارنايى كۋالىك الادى. قۇجاتتىڭ مەرزىمىن ۇزارتۋعا بولادى.
ەگەر بلوگەر ءدىني سالاعا قاتىستى جالعان اقپارات تاراتسا نەمەسە زاڭ تالاپتارىن بۇزسا، ونىڭ كۋالىگى جويىلادى. مۇنداي جاعدايدا جاڭا كۋالىك الۋ مۇمكىندىگى دە قاراستىرىلمايدى.
ۆەدومستۆو وكىلىنىڭ ايتۋىنشا، جاڭا تالاپ ءدىني تاقىرىپتا پودكاست جۇرگىزەتىن، پوست پەن پىكىر جاريالايتىن جانە ءدىني قىزمەتى تۋرالى اقپارات تاراتاتىن بلوگەرلەر مەن ءدىن وكىلدەرىنە قاتىستى. الايدا تالاپتاردىڭ يسلامنان وزگە ءدىن وكىلدەرىنە دە قولدانىلاتىنى تۋرالى ناقتى تۇسىنىكتەمە بەرىلمەگەن.
