بيىل مىنە ەلدىگىمىزدىڭ قورعانى بولىپ جۇرگەن قارۋلى كۇشتەرىمىزگە 32 جىل تولعالى وتىر! وسى ورايدا ەل ءۇشىن ايانباي تەر توگىپ، قىزمەت ەتىپ جۇرگەن ساربازدارىمىزعا العىس ايتپاسقا بولماس!
ەكس-پرەزيدەنت نۇرسۇلتان ءابىشۇلى نازارباەۆتىڭ جارلىعىمەن قازاقستان رەسپۋبليكاسى قارۋلى كۇشتەرىن قۇرۋ تۋرالى زاڭعا 1992 جىلدىڭ 7 مامىرىندا قول قويدى.
قورعانىس مينيسترلىگىنىڭ اسكەري قۇرامىندا ءۇش قۇرىلىم بار:
- قۇرلىق اسكەرلەرى
- اۋە قورعانىس كۇشتەرى
- اسكەري تەڭىز كۇشتەرى
قۇرلىق اسكەرلەرى قۇرلىقتا ۇرىس قيمىلدارىن جۇرگىزۋگە مىندەتتەلگەن قارۋلى كۇشتەردىڭ ءتۇرى. بۇل اسكەر ءتۇرى 2009 جىلى 20 ساۋىردە قۇرىلدى. قۇرلىق اسكەرلەرىنىڭ نەگىزگى مىندەتتەرىنە مىنالار كىرەدى:
- كەز-كەلگەن اگرەسسياعا تويتارىس بەرۋ;
- قازاقستان رەسپۋبليكاسى ەگەمەندىگى مەن اۋماعىنىڭ تۇتاستىعىن قورعاۋ;
- بىتىمگەرشىلىك سىندى تاپسىرمالاردى ورىنداۋ;
اۋە قورعانىس كۇشتەرى 1998 جىلى 1 ماۋسىمدا قۇرىلدى. قازاقستان قورعانىسىنىڭ فلاگمانى اتالعان بۇل اسكەرلەردىڭ نەگىزگى مىندەتتەرى:
- ەلدىڭ اۋە شەبىن قورعاپ،
- مەملەكەتتىك جانە اسكەري وبەكتىلەردى اۋە شابۋىلىنان قورعاۋ;
اسكەري تەڭىز كۇشتەرى 2003 جىلى 7 مامىردا قۇرىلدى. بۇل اسكەري كۇشتەرىنىڭ نەگىزگى قيمىل اۋداندارىنا كاسپي تەڭىزىنىڭ شەكارا ايماقتارى كىرەدى.
اسكەري تەحنيكا تۇرلەرى
جالپى، ەلىمىزدىڭ قورعانىس كۇشتەرىندە كەڭەستىك رەسەيلىك تەحنيكانىڭ ۇلەسى 70% - دان اسىپ جىعىلادى، ياعني اسكەري تەحنيكانىڭ ءبىراز بولىگى ەسكىرگەن. سونىمەن قاتار بۇل تەحنيكالاردىڭ باسىم بولىگى وتكەن عاسىردىڭ 70-80 ءشى جىلدارى وندىرىلگەن ەكەن. بۇل تۋرالى مەملەكەت باسشىسى قاسىم-جومارت توقاەۆ ايتىپ، بۇل ماسەلەنىڭ شەشىمىن تابۋدى تاپسىرعان بولاتىن
“اسكەردەگى قارۋ-جاراقتىڭ دەنى - 30-50 جىل بولگان كەڭەس داۋىرىندەگى تەحنيكا. ەسكىرگەن تەحنيكالاردىڭ مەرزىمىنىڭ وتكەنىنە بايلانىستى قارۋ-جاراق پاركىن جاڭارتۋ ءۇشىن شۇعىل شارالار قابىلداۋ كاجەت. قارۋلى كۇشتەر زاماناۋي ءارى جوعارى تەحنولوگيالىق قارۋ-جاراقپەن، اسكەري تەحنيكامەن جابدىقتالۋى ءتيىس. قابىلداناتىن شارالار جۇيەلى بولۋى كەرەك. قارۋ-جاراق پەن اسكەري تەحنيكانى جوندەيتىن، ولارعا قىزمەت كورسەتەتىن وتاندىق ءوندىرىستى دامىتۋ قاجەت” ، دەدى - قاسىم-جومارت توقاەۆ.
قازىرگى كۇنى وسى ەسكى تەحنيكانى الماستىرۋ ماقساتىندا قورعانىس مينيسترلىگى ناقتى قادامدار جاساۋدا. قازاقستانمەن «Otokar» كومپانياسى بىرلەسىپ ازىرلەگەن «TULPAR» جانە «ARMA» بروندى جاۋىنگەرلىك ماشينالارىن ءبىر جىلعا جۋىق ۋاقىت بويى سىناقتان وتكىزۋدە. بۇل كولىكتەر الداعى ۋاقىتتا قازاقستان ارمياسىنىڭ قىزمەتىندە بولادى دەپ كۇتىلۋدە. كەيبىر اقپاراتتارعا سۇيەنسەك، قازاقستاندا وندىرىلەتىن “ARMA 8x8” جاۋىنگەرلىك ۇرىس كولىكتەرىنىڭ باعاسى 1,7 ملن دوللاردى قۇرايدى ەكەن. بۇل ەلىمىزدەگى ەڭ مىقتى جاۋىنگەرلىك ۇرىس كولىكتەرىنىڭ قاتارىنا كىرەدى.
حالىقارالىق اسكەري ىنتىماقتاستىقتى دامىتۋ شارالارى قالاي وتۋدە؟
ەلىمىزدە وتكەن جىلدىڭ سوڭىندا حالىقارالىق اسكەري ىنتىماقتاستىق اياسىندا 6 وقۋ-جاتتىعۋ وتكىزىلگەن ەكەن. بۇل وقۋ-جاتتىعۋ كەزىندە ساربازداردى قۇراما ساپتا جاۋىنگەرلىك دايىندىققا شاقىرۋ سىندى ماسەلەلەرى تالقىلاندى. بۇل تۋرالى قورعانىس ءمينيسترىنىڭ ورىنباسارى سۇلتان كامالەتدينوۆ بىلاي دەدى:
«وقۋ-جاتتىعۋ ناتيجەلەرى بويىنشا پرەزيدەنت ءبىلىم الۋشىلاردىڭ ءىس-ارەكەتتەرىنە جوعارى باعا بەردى، قك دامىتۋ، ەلدىڭ قورعانىس الەۋەتىن نىعايتۋ بويىنشا بىرقاتار مىندەتتى بەلگىلەدى. اتاپ ايتقاندا، ول اسكەرلەردى دايارلاۋعا جانە كومانديرلەردىڭ كاسىبيلىگىنە جوعارى تالاپتار قويدى. العا قويىلعان مىندەتتەردى شەشۋگە اقىلعا قونىمدى باستامالار كوتەرىپ، شىعارماشىلىقپەن قاراۋدىڭ ماڭىزدىلىعىن اتاپ ءوتتى»
قازىرگى كۇنى ەلىمىزدىڭ قورعانىس قىزمەتى جاڭا زاماناۋي تەحنولوگيالاردى قارقىندى قولدانىپ كەلەدى. بۇرىنعى ەسكى قاعاز جۇيەلەرى ەلەكتروندىق، ساندىق جۇيەلەرگە اۋىستىرۋعا كوشىپ، ساربازدارعا دەگەن تالاپ كۇشەيتىلىپ جاتىر.
قارۋلى كۇشتەر – ەلىمىزدىڭ قورعانى بولىپ جۇرە بەرگەي!
ايگۇل مۇراتقىزى
