ءاربىر شاقىرۋ ناۋقانى اسكەرگە شاقىرتۋدان باستاپ مەديتسينالىق تەكسەرۋدەن وتۋگە دەيىن بىرقاتار كەزەڭدەردى قامتيدى. تومەندە شاقىرتۋ قالاي بەرىلەدى، مارتەبەنى قالاي تەكسەرۋگە بولادى، كىمدەرگە كەيىنگە قالدىرۋ قاراستىرىلعان، ەگەر ءسىز وقۋدا بولساڭىز نەمەسە شەتەلدە جۇرسەڭىز نە ىستەۋ كەرەك سىندى ءاربىر اسكەرگە شاقىرىلۋشى ءبىلۋى ءتيىس نەگىزگى جايتتار قاراستىرىلعان.
شاقىرتۋ قاعازى قالاي بەرىلەدى جانە ونى العاننان كەيىن نە ىستەۋ كەرەك؟
شاقىرتۋ قاعازى – ازاماتتى جەرگىلىكتى اسكەري باسقارۋ ورگانىنا (اسكەري كوميسسارياتقا) شاقىرۋ شارالارىنا قاتىسۋ ءۇشىن شاقىراتىن رەسمي قۇجات. قاراپايىم سوزبەن ايتقاندا، اسكەرگە شاقىرۋ وسى رەسمي قۇجاتتان باستاۋ الادى، ال ونى ورىنداۋ - ءاربىز جاس ازامات ءۇشىن مىندەتتى زاڭدى تالاپ.
شاقىرتۋ بىرنەشە جولمەن جىبەرىلەدى. قول قويدىرۋ ارقىلى جەكە بەرىلەدى، جۇمىس بەرۋشى نەمەسە وقۋ ورنى ارقىلى جەتكىزىلەدى. سونىمەن قاتار، eGov.kz پورتالىنىڭ جەكە كابينەتى، eGov Mobile قوسىمشاسى جانە SMS ارقىلى جەتكىزۋ سەكىلدى تسيفرلىق حابارلامالار دا ەنگىزىلگەن. ول 2025 جىلدان باستاپ زاڭدى كۇشىنە ەندى.
قۇجاتتا كەلۋ كۇنى، ۋاقىتى جانە مەكەنجايى كورسەتىلەدى. دالەلدى سەبەپسىز كەلمەگەن جاعدايدا اكىمشىلىك جاۋاپكەرشىلىك قاراستىرىلعان، ال جۇيەلى تۇردە جالتارۋ، ياعني اسكەردەن ءتۇرلى سىلتاۋلارمەن قاشۋ – قىلمىستىق جاۋاپكەرشىلىككە اكەلۋى مۇمكىن.
شاقىرتۋ العاننان كەيىن دەرەكتەردىڭ دۇرىستىعىن تەكسەرۋ قاجەت: اتى-ءجونى، مەكەنجايى، كەلۋ كۇنى جانە شاقىرۋ ماقساتى (مەديتسينالىق كوميسسيا، دەرەكتەردى ناقتىلاۋ جانە ت.ب.). الدىن الا قاجەتتى قۇجاتتاردى دايىنداعان ءجون. ولاردىڭ قاتارىندا جەكە كۋالىك، تىركەۋ كۋالىگى (بار بولسا), ءبىلىم تۋرالى قۇجاتتار نەمەسە وقۋ ورنىنان انىقتاما، مەديتسينالىق قورىتىندىلار، سونداي-اق كەيىنگە قالدىرۋعا قۇقىق بەرەتىن قۇجاتتار بار.
ەگەر بەلگىلەنگەن ۋاقىتتا كەلۋ مۇمكىن بولماسا، جەرگىلىكتى اسكەري باسقارۋ ورگانىن (اسكەري كوميسسارياتتى) الدىن الا حاباردار ەتىپ، سەبەبىن قۇجاتپەن راستاۋ قاجەت. اۋرىپ قالعان جاعدايدا – مەديتسينالىق انىقتاما، وقۋ نەمەسە جۇمىسقا بايلانىستى بولسا – ءتيىستى راستايتىن قۇجاتتار ۇسىنىلادى. دالەلدى سەبەپ مىندەتتى تۇردە تىركەلۋى ءتيىس.
شاقىرتۋ قاعازى بىردەن اسكەرگە جىبەرۋدى بىلدىرمەيدى. ادەتتە بۇل دەرەكتەردى ناقتىلاۋ، مەديتسينالىق تەكسەرۋدەن ءوتۋ، جارامدىلىق ساناتىن انىقتاۋ جانە كەيىنگە قالدىرۋ نەگىزدەرىن تەكسەرۋ ءۇشىن جۇرگىزىلەدى. ۋاقتىلى دايىندىق بولعان جاعدايدا، بۇل ءراسىم ەش قيىندىقسىز وتەدى.
