ارمەنيا پرەمەر-ءمينيسترى نيكول پاشينيان قازاقستان مەن قىرعىزستانعا TRIPP جوباسىنىڭ اكتسيونەرى بولۋدى ۇسىندى. بۇل ماسەلە ارمەنيا پرەمەر-ءمينيسترى نيكول پاشينيان مەن قازاقستان پرەزيدەنتى قاسىم-جومارت توقاەۆتىڭ تەلەفون ارقىلى سويلەسۋى بارىسىندا تالقىلاندى، دەپ حابارلايدى «ادىرنا» ءتىلشىسى open.kg-عا سىلتەمە جاساپ.
بۇل — ارمەنيا اۋماعى ارقىلى ازەربايجان مەن ناحچىۆاندى بايلانىستىرۋى ءتيىس كولىك ءدالىزى. باستاپقى كەزەڭدە اقش-پەن بىرلەسىپ جۇزەگە اسىرىلىپ جاتقان TRIPP — «حالىقارالىق بەيبىتشىلىك پەن وركەندەۋ ءۇشىن ترامپ باعىتى» جوباسىنىڭ 26 پايىزدىق ۇلەسىنە يە بولۋى ءتيىس. ەرەۆان وسى ۇلەستىڭ 5 پايىزىن قازاقستانعا، تاعى 5 پايىزىن قىرعىزستانعا بەرۋگە دايىن.
وسىلايشا قازاقستان مەن قىرعىزستان جاڭا كولىك ءدالىزىنىڭ جاي عانا قاتىسۋشىسى ەمەس، ونىڭ اكتسيونەرىنە اينالۋى مۇمكىن.
تەلەفون ارقىلى سويلەسۋ بارىسىندا تاراپتار ارمەنيانىڭ تەمىرجولدارىن باسقارۋدى قازاقستان تاراپىنا بەرۋ مۇمكىندىگىن دە تالقىلادى. استانا بۇل سالادا بەلسەندىرەك ءرول اتقارا الاتىن الەۋەتتى سەرىكتەس رەتىندە قاراستىرىلىپ وتىر.
اڭگىمە قورىتىندىسى بويىنشا قاسىم-جومارت توقاەۆ قازان ايىندا ارمەنياعا رەسمي ساپارمەن بارۋ نيەتىن راستادى.
TRIPP جوباسى اقش-تىڭ اراعايىندىعىمەن جۇزەگە اسىرىلىپ جاتىر. ول ارمەنيا اۋماعى ارقىلى وتەتىن جانە ازەربايجاننىڭ نەگىزگى بولىگىن ناحچىۆان اۆتونوميالىق رەسپۋبليكاسىمەن بايلانىستىراتىن كولىك ءدالىزىن قۇرۋدى كوزدەيدى. جوبا پارسى شىعاناعى مەن قارا تەڭىز وڭىرلەرى اراسىندا تەمىرجول قاتىناسىن اشۋى مۇمكىن كەڭىرەك كولىك باعىتىنىڭ ءبىر بولىگى رەتىندە دە قاراستىرىلىپ وتىر.
بۇعان دەيىن ايتىلعان اقپاراتقا سايكەس، جوبانى جۇزەگە اسىرۋمەن امەريكالىق كومپانيا اينالىسۋى ءتيىس. وعان ينفراقۇرىلىمدى 99 جىلعا دەيىن باسقارۋعا ايرىقشا قۇقىق بەرىلۋى مۇمكىن.
قىرعىزستان ءۇشىن TRIPP جوباسىنا ىقتيمال قاتىسۋ، ەڭ الدىمەن، ەۋرازياداعى كولىك جانە ساۋدا بايلانىستارىن كەڭەيتۋ تۇرعىسىنان ماڭىزدى. الايدا ازىرگە بۇل تەك ارمەنيا تاراپىنىڭ ۇسىنىسى بولىپ وتىر. قىرعىزستاننىڭ جوبا اكتسيونەرلەرىنىڭ قاتارىنا قوسىلۋعا كەلىسىمى تۋرالى رەسمي اقپارات جاريالانعان جوق.
