جاڭاارقا اۋدانىنىڭ اكىمى "ادىرنا" ۇلتتىق پورتالىنىڭ الەۋمەتتىك جەلىدەگى پاراقشاسىندا جاريالانعان جازباعا جاۋاپ بەردى.
"ادىرنا" پورتالىنىڭ Instagram الەۋمەتتىك جەلىسىندەگى پاراقشاسىندا ەرلان تولەۋتايدىڭ "جاڭاارقادا سۇراپىل جۇت بولىپ جاتىر" دەگەن جازباسى جاريالانعان بولاتىن. سول جازباعا ۇلىتاۋ وبلىسى جاڭاارقا اۋدانىنىڭ اكىمى قانات قوجىقاەۆ جاۋاپ بەردى.
"ەلدە – جاڭاارقادا ءجۇرمىن. ارقادا، ونىڭ ىشىندە جاڭاارقا اۋدانىندا قۇلاق ەستىپ، كوز كورمەگەن (مەن تۋعالى) جۇت بولىپ جاتىر، اعايىن. كەشە ءوزىم ءوسىپ، ەرجەتكەن جاڭاارقا اۋدانى، بايدالى بي اۋىلىندا بولىپ، ءوز كوزىممەن كوردىم، جىلقى جارىقتىق قىرىلىپ جاتىر، قىرىلماعانى ابدەن ارىپ، تۋلاققا اينالعان.ءتۇرتىپ قالساڭ – قۇلاعالى تۇر. قۇلاعانى تۇرمايدى – پىشاققا ىلىنەدى. بيەلەر تەگىس قۇلىن تاستاعان. تۇتاس ۇيىرلەر جوعالىپ، ءىز-ءتۇسسىز كەتكەن. مال باققان، ونىڭ سۇمەسىنە قاراپ وتىرعان ەلدىڭ ەڭسەسى تۇسىڭكى. جەم-ءشوپ جەتپەيدى. جىلقى قولعا قاراعان سوڭ – ەلدىڭ ءشوبى تۇگەسىلۋگە تاياۋ", - دەگەن ەرلان تولەۋتايدىڭ جازباسى اپاتتى جاعدايدان حابار بەرەتىن ەدى.
جەلىدەگى سول جازباعا ۇلىتاۋ وبلىسى جاڭاارقا اۋدانىنىڭ اكىمى قانات قوجىقاەۆ بىلاي جاۋاپ بەردى.
"جاڭاارقا اۋدانىنداعى جىلقى مالىنا بايلانىستى ورىن الىپ جاتقان جاعدايعا الاڭداتۋشىلىق تانىتقان كوپتەگەن ازامات ءوز پىكىرلەرىن جازۋدا.
ەڭ الدىمەن، وسىنداي جاعدايدا تىسقارى قالماي، ەلگە جاناشىرلىق بىلدىرگەن جاندارعا ريزاشىلىعىمىزدى بىلدىرەمىز. قىس سوڭىندا ورىن العان قيىنشىلىقتارمەن تولىق تانىسپىز. بۇل باعىتتا اۋداندىق شتاب قۇرىلىپ، ءتيىستى مەكەمەلەر، كەنت، اۋىلدىق وكرۋگ اكىمدەرى مەن كاسىپورىندارمەن، كاسىپكەرلەرمەن بىرلەسكەن شارالار قولعا الىنۋدا.
شىعىنعا ۇشىراعان مال سانىن انىقتاۋ، شارۋا قوجالىقتارىنا جىلقىلاردى ءتيىستى ورىندارعا جەتكىزىپ الۋ ءۇشىن ماتەريالدىق-تەحنيكالىق كومەك كورسەتۋ، جەم-ءشوپ باعاسىن تۇراقتى ۇستاپ تۇرۋ جۇمىستارى جۇرگىزىلۋدە.
قازىرگى ۋاقىتتا دالادا تابىلعان جىلقىلاردىڭ يەلەرى انىقتالماۋدا.
ءوزىڭىز كوتەرىپ وتىرعان ماسەلە - كەڭەستىك كەزەڭدە وسىنداي جاعدايدا مەملەكەت تاراپىنان ۇلكەن كۇش سالىنعانى راس. دەگەنمەن، ول ۋاقىتتا مال تولىعىمەن مەملەكەتتىك مەنشىكتە، ياعني، ورتانىڭ مالى بولىپ تابىلدى. سوعان سايكەس، ءتيىستى شارالار قابىلداندى. قازىرگى جاعداي مۇلدەم بولەك. جىلقى مالى تولىق جەكە مەنشىك يەلەرىندە. سوندىقتان، ولاردى بازاعا تىركەۋ، جەم-ءشوپ قورىن دايارلاۋ، ولاردىڭ باعىلۋىن ۇيىمداستىرۋ مەملەكەتتىك ورگان قۇزىرەتىنە كىرمەيدى. جەم-ءشوپ شىعىنىن قايتارۋ ءۇشىن مەملەكەت تاراپىنان بەرىلەتىن سۋبسيدياعا دا اركىم ارنايى جۇيەگە (بازاعا) كىرىپ، ەلەكتروندى قول قويۋ ارقىلى، جەرگىلىكتى اكىمدىكتىڭ قاتىسۋىنسىز سۇرانىس بەرە الادى", - دەپ جازدى اكىم.
سونىمەن قاتار، اكىم ءشوپتىڭ تونناسىنىڭ باعاسى 120 مىڭ دەگەن دەرەك نەگىزسىز ەكەنىن ايتتى.
"قىزىلوردا مەن شىمكەنت جاقتان جوڭىشقا جەتكىزىلىپ، ساتىلۋدا. اۋدان ىشىندە ءشوپ قورى بار، شارۋاشىلىقتار تونناسىن 35-60 مىڭ ارالىعىندا ساتۋدا. كەبەك قورى جەتكىلىكتى. ولار ءار پۋنكتتە قابى 1350 -1450 تەڭگەدەن ساتىلۋدا. اۋدان اكىمدىگى جەم-ءشوپ باعاسىن كوتەرمەۋ ءۇشىن كاسىپكەرلەرمەن كەلىسىمگە كەلۋ جۇمىستارىن جۇرگىزىپ جاتىر.
جالپى، جاڭاارقا اۋدانىندا اگروونەركاسىپتىك كەشەنىندە 12- جشس، 987 شارۋا قوجالىقتارى جۇمىس جاسايدى.
2023 جىلى وبلىس اكىمدىگىنىڭ قاۋلىسىمەن بەكىتكەن ەرەجەسىنە سايكەس، تالاپقا ساي كەلەتىن شارۋا قوجالىقتارىنا وبلىستىق بيۋدجەت ەسەبىنەن اۋدانىمىزدىڭ 584 شارۋا قوجالىعىنا جەم-ءشوپ شىعىنىن وتەۋ ءۇشىن بارلىعى 749 ملن. 294 مىڭ تەڭگە كولەمىندە سۋبسيديا بەرىلدى.
جاڭاارقا اۋدانىندا قاراستى شارۋا قوجالىقتارىنا سۋبسيديا ۇلەستىرۋدى ۇلىتاۋ وبلىسىنىڭ اۋىل شارۋاشىلىق باسقارماسى جۇزەگە اسىرادى. ول ءۇشىن EGov ەلەكتروندى ۇكىمەت پورتالى ارقىلى ءوتىنىم بەرۋگە بولادى", - دەپ كوممەنتاري جازدى اكىم قانات قوجىقاەۆ.
