قوستاناي وبلىسىنىڭ 90 جىلدىق مەرەيتويى حالىقارالىق دەڭگەيدەگى ماڭىزدى وقيعامەن جالعاستى. وبلىس ورتالىعىندا وتكەن Qostanai Invest Forum 2026ءوڭىردىڭ باي تاريحىن عانا ەمەس، ونىڭ ەرتەڭگى دامۋ باعىتىن ايقىندايتىن ينۆەستيتسيالىق جوبالار مەن جاڭا باستامالاردى ءبىر الاڭعا توعىستىردى.
يندۋستريالىق ايماقتاعى «تەحنوپارك KZ» اۆتوكومپونەنتتەر زاۋىتىنىڭ اۋماعىندا وتكەن فورۋمعا مەملەكەتتىك ورگانداردىڭ باسشىلارى، حالىقارالىق قارجى ينستيتۋتتارىنىڭ وكىلدەرى، ءىرى ينۆەستورلار، كاسىپكەرلەر مەن ساراپشىلار قاتىستى. باسقوسۋدىڭ نەگىزگى وزەگى – قوستانايدىڭ وندىرىستىك الەۋەتىن تانىستىرۋ، جاڭا ينۆەستيتسيالىق جوبالاردى ۇسىنۋ جانە ءوڭىردىڭ ۇزاق مەرزىمدى دامۋ پەرسپەكتيۆالارىن تالقىلاۋ بولدى.
فورۋمنىڭ پلەنارلىق وتىرىسىن اشقان قوستاناي وبلىسىنىڭ اكىمى قۇمار اقساقالوۆ مەملەكەت باسشىسى قاسىم-جومارت توقاەۆتىڭ قۇتتىقتاۋىن وقىپ بەردى.
پرەزيدەنت ءوز قۇتتىقتاۋىندا قوستانايدى ەلدىڭ ءوسىپ-وركەندەۋىنە ولشەۋسىز ۇلەس قوسقان قاسيەتتى ءوڭىر دەپ اتاپ، ونىڭ تاريحى مەن بۇگىنگى جەتىستىگىنە جوعارى باعا بەردى.
«قوستاناي – ىرىسى مول، ىنتىماعى جاراسقان قاستەرلى ولكە. وسى ۋاقىت ارالىعىندا ءوڭىر ءوسىپ-وركەندەپ، استىقتى ايماققا اينالدى… وسى ورايدا وبلىستى كوركەيتۋ ءۇشىن ايانباي ەڭبەك ەتىپ كەلە جاتقان ازاماتتارعا شىنايى ريزاشىلىعىمدى بىلدىرەمىن. بارشاڭىزعا زور دەنساۋلىق، باق-بەرەكە تىلەيمىن! توبىل – تورعاي ولكەسى وركەندەي بەرسىن!» – دەلىنگەن مەملەكەت باسشىسىنىڭ قۇتتىقتاۋىندا.
قۇمار اقساقالوۆ ءوز بايانداماسىندا قوستاناي وبلىسىنىڭ توقسان جىلدىق تاريحى تەك اكىمشىلىك قۇرىلۋ كەزەڭىنەن باستالمايتىنىن، ونىڭ تامىرى ۇلى دالا وركەنيەتىنە جالعاساتىنىن اتاپ ءوتتى. اكىم ءوڭىردىڭ تىڭ يگەرۋ داۋىرىنەن باستاپ يندۋستريالاندىرۋ كەزەڭىنە دەيىنگى دامۋ جولىنا توقتالىپ، بۇگىندە قوستاناي قازاقستانداعى ماشينا جاساۋ، اگروونەركاسىپ جانە كولىك-لوگيستيكا سالالارى قارقىندى دامىپ كەلە جاتقان جەتەكشى وڭىرلەردىڭ بىرىنە اينالعانىن ايتتى. ونىڭ سوزىنشە، جاڭا ينۆەستيتسيالار، جوعارى تەحنولوگيالىق وندىرىستەر، تەرەڭ وڭدەۋ جوبالارى مەن ادامي كاپيتالدى دامىتۋ الداعى ەكونوميكالىق ءوسىمنىڭ نەگىزگى تىرەگى بولماق.
فورۋمنىڭ ىسكەرلىك باعدارلاماسى ءوڭىر ەكونوميكاسىنىڭ باسىم باعىتتارىن قامتىدى. Allur كومپانيالار توبى ديرەكتورلار كەڭەسىنىڭ توراعاسى اندرەي لاۆرەنتەۆماشينا جاساۋ سالاسىنىڭ بۇگىنگى دامۋ قارقىنى مەن بولاشاقتاعى مۇمكىندىكتەرىنە توقتالسا، Freedom Holding Group كومپانياسىنىڭ نەگىزىن قالاۋشى ءارى باس اتقارۋشى ديرەكتورى تيمۋر تۋرلوۆ قازاقستانداعى ينۆەستيتسيالىق احۋال مەن قوستاناي ءوڭىرىنىڭ جاڭا ەكونوميكالىق ءوسىم نۇكتەلەرى جونىندە پىكىر ءبىلدىردى.
ال ERG كومپانياسىنىڭ باس ديرەكتورى قۇدىرەت شاميەۆفورۋمداعى باستى ينۆەستيتسيالىق جوبالاردىڭ ءبىرى – رۋدنىي قالاسىندا سالىناتىن جاڭا وكاتىش ءوندىرۋ فابريكاسىن تانىستىردى. قۇنى 305,4 ميلليون اقش دوللارىن قۇرايتىن جوبا ىسكە قوسىلعاننان كەيىن جىلىنا 5 ميلليون توننا ءونىم ءوندىرىلىپ، جۇزدەگەن جاڭا جۇمىس ورنى اشىلادى. سونىمەن قاتار جاڭا تەحنولوگيالاردىڭ ارقاسىندا ءوندىرىستىڭ ەكولوگيالىق تيىمدىلىگى ارتىپ، ءونىمنىڭ ەكسپورتتىق الەۋەتى كەڭەيمەك.
فورۋمدا سونداي-اق «نيپي “استاناگەنپلان”» جشس-ءنىڭ باس ديرەكتورى رۋسلان جاقىپوۆ قوستاناي قالاسىنىڭ جاڭارتىلعان باس جوسپارىن تانىستىرسا، قارجى ساراپشىسى راسۋل رىسمامبەتوۆ ءوڭىردىڭ سولتۇستىك قازاقستانداعى ينۆەستيتسيا مەن بيزنەستىڭ جاڭا ورتالىعىنا اينالۋ مۇمكىندىكتەرىنە توقتالدى.
ىسكەرلىك باعدارلامامەن قاتار فورۋم قوناقتارى قوستاناي كاسىپورىندارىندا شىعارىلعان اۆتوكولىكتەردىڭ، اۋىل شارۋاشىلىعى جانە ارنايى تەحنيكالاردىڭ كورمەسىن ارالاپ، ءوڭىردىڭ اگرارلىق تاريحىنا ارنالعان مۋزەيلىك ەكسپوزيتسيامەن تانىستى.
Qostanai Invest Forum 2026 ءوڭىردىڭ وندىرىستىك الەۋەتىن تانىستىراتىن الاڭ عانا ەمەس، قوستانايدىڭ الداعى ونداعان جىلدارعا ارنالعان دامۋ باعىتىن ايقىندايتىن ماڭىزدى ديالوگ الاڭىنا اينالدى. فورۋمدا ۇسىنىلعان باستامالار مەن ينۆەستيتسيالىق جوبالار وبلىستىڭ ەكونوميكالىق مۇمكىندىگىن كەڭەيتىپ قانا قويماي، جاڭا وندىرىستەردىڭ اشىلۋىنا، ەكسپورت كولەمىنىڭ ارتۋىنا جانە حالىقتىڭ ءال-اۋقاتىن جاقسارتۋعا نەگىز بولاتىنى ايتىلدى.
