قازاقستان پرەمەر-ءمينيسترى ولجاس بەكتەنوۆ 2024 جىلعى 27 اقپانداعى ۇكىمەت وتىرىسىندا استانا اگلومەراتسياسىنىڭ نەگىزگى پروبلەمالارى تۋرالى ايتتى، دەپ حابارلايدى "ادىرنا" ۇلتتىق پورتالى ۇكىمەتتىڭ رەسمي سايتىنا سىلتەمە جاساي وتىرىپ.
پرەمەردىڭ ايتۋىنشا، استانا اگلومەراتسياسىنىڭ نەگىزگى پروبلەمالارى قالا ماڭىنداعى حالىق سانىنىڭ كۇرت ءوسۋى جانە ەلورداعا كۇندەلىكتى كەلىپ-كەتەتىن ادامدار لەگى بولىپ وتىر.
"بۇل استانا قالاسىنىڭ ينفراقۇرىلىمى مەن ەكولوگياسىنا جانە قاۋىپسىزدىگىنە تۇسەتىن جۇكتەمەنى ەداۋىر ارتتىرادى. ادامدار ەلورداعا جاقىن ماڭدا تۇرعىسى كەلەدى. ونى تۇسىنۋگە بولادى. الايدا، مۇنداي كوشى-قون ەڭبەك نارىعىنا اسەرىن تيگىزەدى، وبلىستا جۇمىسسىزدىقتىڭ وسۋىنە ىقپال ەتەدى. سوندىقتان، اتالعان ماسەلەلەردى شەشۋ ءۇشىن اۋقىمدى جۇمىس ىستەۋگە تۋرا كەلەدى", - دەدى پرەمەر-مينيستر.
سونداي-اق ول قالا ماڭىنداعى ەلدى مەكەندەرگە تۇراقتى جۇمىس ورىندارىن اشۋ كەرەكتىگىن دە اتاپ ءوتتى.
"سونداي-اق 45 اۋىلدىق ەلدى-مەكەننىڭ ارقايسىسىنا وزىندىك ەكونوميكالىق ەرەكشەلىك بەرۋ قاجەت. سول كەزدە اۋىلدارمەن قاتار، استانا قالاسى دا مال جانە وسىمدىك شارۋاشىلىعىنىڭ، قۇرىلىس يندۋسترياسىنىڭ، سونداي-اق باسقا دا سالالاردىڭ قاجەتتى ونىمدەرىمەن ءوزىن-ءوزى قامتاماسىز ەتۋگە قول جەتكىزە الادى", - دەدى ولجاس بەكتەنوۆ.
ايتا كەتەيىك، وسى ماسەلەگە قاتىستى بۇعان دەيىن استانا اكىمى جەڭىس قاسىمبەك استاناعا كۇنىنە 200 مىڭ ادام جۇمىسقا كەلەتىنىن مالىمدەگەن بولاتىن.
"ادىرنا" ۇلتتىق پورتالى
