پرەمەر-مينيستر ولجاس بەكتەنوۆ حالىقتىڭ بەنزين ساپاسىنا قاتىستى شاعىمدارى جيىلەگەنىنە بايلانىستى جولدانعان دەپۋتاتتىق ساۋالعا جاۋاپ بەردى، دەپ حابارلايدى «ادىرنا» ءتىلشىسى.
قىركۇيەكتە دەپۋتات اسحات راحىمجانوۆ قازاقستاندىقتاردىڭ جانارماي ساپاسىنا قاتىستى شاعىمدارىنان كەيىن جانارماي قۇيۋ بەكەتتەرىنەن اياقاستى سىناما الۋدى ۇسىنعان بولاتىن. ونىڭ ايتۋىنشا، سوڭعى ۋاقىتتا اي-95 جانە اي-98 ماركالى اۆتوموبيل بەنزينىنىڭ ساپاسى كۇرت ناشارلاعانىنا بايلانىستى ازاماتتاردان كوپتەگەن شاعىم تۇسكەن.
«جانارماي قۇيعاننان كەيىن كولىكتەر دۇرىس جۇمىس ىستەمەي، وتالدىرۋ بىلتەلەرى، كاتاليزاتورلار جانە باسقا دا قىمبات بولشەكتەر ىستەن شىعا باستايدى. كەيبىر جاعدايدا كولىك يەلەرى جوندەۋگە 200 مىڭنان 600 مىڭ تەڭگەگە دەيىن جۇمساۋعا ءماجبۇر. بۇل كوپتەگەن وتباسىنىڭ بيۋدجەتىنە ەداۋىر سالماق تۇسىرەدى»، – دەگەن ەدى ول.
دەپۋتات سول كەزدە ساۋالىن ۇكىمەت باسشىسىنا جولداعان. ولجاس بەكتەنوۆتىڭ جاۋابى بۇگىن قۇرىلتايدىڭ رەسمي سايتىندا جاريالاندى.
پرەمەر-مينيستر 2026 جىلدىڭ باسىنان بەرى قازاقستاندا بەنزيننىڭ 78 سىناماسى زەرتتەلگەنىن حابارلادى. الماتى قالاسىندا، قىزىلوردا وبلىسىندا جانە جەتىسۋ وبلىسىندا الىنعان ءۇش سىنامانىڭ زەرتحانالىق تالداۋى جانارمايدىڭ بەلگىلەنگەن تالاپتارعا سايكەس كەلمەيتىنىن راستاعان.
تەحنيكالىق رەتتەۋ جانە مەترولوگيا كوميتەتى جانارماي قۇيۋ بەكەتتەرىندە جوسپاردان تىس تەكسەرۋلەر مەن باقىلاۋ ماقساتىندا ساتىپ الۋدى قوسا العاندا، 76 باقىلاۋ ءىس-شاراسىن وتكىزگەن. انىقتالعان زاڭبۇزۋشىلىقتار بويىنشا زاڭناماعا سايكەس شارالار قابىلدانعان.
«جانارمايدىڭ بەلگىلەنگەن تالاپتارعا سايكەس كەلمەيتىنى انىقتالعان جاعدايدا كىنالى تۇلعا مەملەكەتتىك باقىلاۋ مەن زەرتحانالىق زەرتتەۋلەردىڭ ناتيجەلەرى نەگىزىندە ايقىندالادى»، – دەپ جاۋاپ بەردى بەكتەنوۆ.
سونداي-اق ول 25 تامىزدا پاۆلودار مۇناي-حيميا زاۋىتىندا تەكسەرۋ جۇرگىزىلگەنىن ەسكە سالدى. زاۋىتتا الىنعان بەنزين سىنامالارىنا جۇرگىزىلگەن زەرتحانالىق زەرتتەۋلەر ولاردىڭ بەلگىلەنگەن تالاپتارعا تولىق سايكەس كەلەتىنىن كورسەتكەن.
قازىر ۆەدومستۆوارالىق كوميسسيا بەنزين وندىرۋدەن باستاپ ونى تۇپكىلىكتى تۇتىنۋشىعا وتكىزۋگە دەيىنگى بارلىق تەحنولوگيالىق جانە لوگيستيكالىق پروتسەستەرگە اۋديت جۇرگىزىپ جاتىر. ونىڭ قورىتىندىسى بويىنشا وتىن اينالىمىنىڭ ساپاسىن باقىلاۋدى كۇشەيتۋگە باعىتتالعان قاجەتتى شارالار ازىرلەنەدى.
بۇدان بولەك، مۇناي ونىمدەرىنىڭ ساپاسىن قاداعالاپ وتىرۋدى قامتاماسىز ەتۋ ءۇشىن قۇرىلتايدىڭ قاراۋىندا زاڭ جوباسى جاتىر. وندا مەملەكەتتىك باقىلاۋدىڭ ءبىر ءتۇرى رەتىندە تەرگەپ-تەكسەرۋ تەتىگىن ەنگىزۋ كوزدەلگەن.
«بۇل انىقتالعان سايكەسسىزدىكتەردىڭ سەبەپتەرىن انىقتاۋعا جانە ءونىمنىڭ جەتكىزىلۋ تىزبەگىن وندىرۋشىگە نەمەسە يمپورتتاۋشىعا دەيىن قاداعالاۋعا مۇمكىندىك بەرەدى»، – دەلىنگەن دەپۋتاتتىق ساۋالعا بەرىلگەن جاۋاپتا.
سونىمەن قاتار وتىننىڭ ءار پارتياسىن وندىرۋشىدەن نەمەسە يمپورتتاۋشىدان باستاپ ناقتى جانارماي قۇيۋ بەكەتىنە دەيىن قاداعالاۋ شارالارى پىسىقتالىپ جاتىر. بۇل رەتتە وتىننىڭ شىعۋ تەگى مەن زەرتحانالىق باقىلاۋ ناتيجەلەرى تۋرالى مالىمەتتەرگە QR-كود بەرۋ ماسەلەسى دە قاراستىرىلۋدا.
بۇعان دەيىن الەۋمەتتىك جەلىلەردە قازاقستاندىقتاردىڭ اي-92 جانە اي-95 ماركالى بەنزيننىڭ ساپاسىنا شاعىمدانعان جازبالارى جاريالانعان بولاتىن. كەيبىر قولدانۋشى كولىكتەرىنىڭ بۇزىلعانىن دا حابارلاپ، مۇنى ساپاسىز جانارمايمەن بايلانىستىرۋى مۇمكىن ەكەنىن ايتقان.
