ماسكەۋ قازاقستان مەكتەپتەرىنە مۇعالىم جىبەرۋگە دايىن ەكەنىن جەتكىزدى، دەپ حابارلايدى "ادىرنا" ءتىلشىسى Russkiymir.ru-عا سىلتەپ.
رەسەي بيلىگى ورىس ءتىلىن ىلگەرىلەتۋ ماقساتىندا ورىس ءتىلى جانە باسقا دا ءپان مۇعالىمدەرىن قازاقستان مەكتەپتەرىنە جىبەرۋگە دايىن ەكەنىن ايتتى.
العاشقى ساپارىن رەسەيدەن باستاعان قر ۇكىمەت باسشىسى ولجاس بەكتەنوۆ 4 ناۋرىز كۇنى رەسەيدىڭ ۇكىمەت ۇيىندە بولدى.
رەسەي پرەمەرىمەن كەزدەسكەن ولجاس بەكتەنوۆ گۋمانيتارلىق ىنتىماقتاستىق جانە قازاقستاندا ورىس ءتىلىن ىلگەرىلەتۋ ماسەلەلەرىن تالقىلادى. رەسەي ۇكىمەتىنىڭ باسشىسى ەكى مەملەكەت تىعىز مادەني جانە گۋمانيتارلىق قاتىناستارمەن بايلانىستى ەكەنىن اتاپ ءوتتى.
ودان بولەك ءبىلىم سالاسىنىڭ ماماندارى دا جۇزدەستى. رەسەيدىڭ وقۋ-اعارتۋ ءمينيسترىنىڭ ورىنباسارى دەنيس گريبوۆ پەن قازاقستان رەسپۋبليكاسىنىڭ وقۋ-اعارتۋ ءمينيسترىنىڭ ءبىرىنشى ورىنباسارى ناتاليا جۇمادىلداەۆانىڭ كەزدەسۋىندە رەسەيدىڭ قازاقستان پەداگوگتارىنىڭ بىلىكتىلىگىن ارتتىرۋعا قاتىستى بىرقاتار ماسەلەسى تالقىلاندى.
كەزدەسۋ بارىسىندا "كاسىپقويلىق" فەدەرالدىق جوباسىن ىسكە اسىرۋداعى رەسەيلىك تاجىريبەنى زەردەلەۋدىڭ ناتيجەسىندە كاسىپتىك ءبىلىم بەرۋ سالاسىنداعى ىنتىماقتاستىق ماسەلەلەرى قوزعالدى. رەسەي تاراپى ورىس ءتىلى مەن ورىس تىلىندەگى وقۋ پاندەرىنىڭ مۇعالىمدەرىن قازاقستان مەكتەپتەرىنە جىبەرۋدى ۇسىندى.
ءسوز سوڭىندا ميحايل ميشۋستين قازاقستاندىق تاراپقا ورىس ءتىلىن دامىتىپ جاتقانى ءۇشىن ريزاشىلىعىن ءبىلدىردى.
الايدا الەۋمەتتىك جەلىدە بۇل جاڭالىقتى اجۋاعا اينالدىرعاندار كوپ. جەلى قولدانۋشىلارى: "ولارعا ەرىك بەرسەڭ ۇكىمەتىن دە قازاقستانعا كوشىرىپ اكەلەدى", "رەسەيدىڭ "قامقورلىعىنان" شىعا المايتىن بولدىق قوي", ء"بىز ودان دا ءوز انا ءتىلىمىزدى ۇيرەنەيىك" ء"بىز ورىس ءتىلىن قازاق تىلىنەن دە جاقسى بىلەمىز", "مەن ورىس ءتىلى ءپانىنىڭ مۇعالىمىمىن. بىراق جۇمىسقا كىرە الماي ءجۇرمىن. مەكتەپكە ورنالاسۋ ءۇشىن پارا بەرۋ كەرەك" دەپ ءوز پىكىرىن جارىسا جازىپ جاتىر.
