ۇكىمەت الماتى وبلىسىنىڭ جامبىل اۋدانىندا ەكىنشى اتوم ەلەكتر ستانتسياسىن سالۋ تۋرالى شەشىمدى بەكىتتى. ءتيىستى قاۋلىعا بۇگىن، 26 قاڭتاردا پرەمەر-مينيستر ولجاس بەكتەنوۆ قول قويدى، دەپ حابارلايدى «ادىرنا» ءتىلشىسى.
«ەكىنشى اتوم ەلەكتر ستانتسياسى» يادرولىق قوندىرعىسىن سالۋ جانە الماتى وبلىسىنىڭ جامبىل اۋدانى – يادرولىق قوندىرعى سالىناتىن اۋدان تۋرالى شەشىم قابىلدانسىن. وسى قاۋلى قول قويىلعان كۇنىنەن باستاپ قولدانىسقا ەنگىزىلەدى»،- دەلىنگەن قاۋلى ماتىنىندە.
ەسكە سالايىق، 2025 جىلدىڭ 1 قازانىندا اتوم ەنەرگياسى اگەنتتىگىنىڭ توراعاسى الماسادام ساتقاليەۆ الماتى وبلىسىندا ەكىنشى اەس سالىناتىنىن حابارلاعان بولاتىن. ونىڭ ايتۋىنشا، ستانتسيانى جامبىل اۋدانىندا سالۋ ەلدىڭ وڭتۇستىگىن سەنىمدى ءارى تۇراقتى ەنەرگيامەن قامتاماسىز ەتۋ ءۇشىن قاجەت. سونداي-اق الەۋەتتى مەردىگەرلەرمەن كەلىسسوزدەر جۇرگىزىلىپ، قىتايلىق CNNC كومپانياسى باسىم ۇمىتكەر رەتىندە قاراستىرىلعان. جەرگىلىكتى تۇرعىندار جوبانى قولداعان.
وتكەن جىلدىڭ تامىز ايىندا الماتى وبلىسى جامبىل اۋدانىنداعى ۇلكەن اۋىلىندا اەس قۇرىلىسى جوباسى بويىنشا العاشقى جۇمىستار باستالعان ەدى. باس مەردىگەر رەتىندە رەسەيلىك «روساتوم» كومپانياسى بەلگىلەنگەن.
