ءال-فارابي اتىنداعى قازاق ۇلتتىق ۋنيۆەرسيتەتىندە ستۋدەنتتەردىڭ جەكە اقپاراتىن تاراتقانداردىڭ كىم ەكەنى انىقتالدى، دەپ حابارلايدى "ادىرنا" ءتىلشىسى.
مينيستر ساياسات نۇربەك جەلىدە شۋ بولعان ءتىزىمدى جاريالاعانداردىڭ جاۋاپقا تارتىلاتىنىن مالىمدەگەن بولاتىن.
جوعارى وقۋ ورنىنىڭ وكىلدەرى ستۋدەنت قىزداردىڭ ءتىزىمىن مەديتسينالىق قىزمەت كورسەتەتىن مەكەمەنىڭ قىزمەتكەرى جىبەرگەنىن حابارلادى. 6 اقپان كۇنى قازۇۋ-عا كەلىسىمشارت نەگىزىندە مەديتسينالىق قىزمەت كورسەتەتىن "Smart Health University City" جشس مەدبيكەسى Whatsapp مەسسەندجەرى ارقىلى مەحانيكا-ماتەماتيكا فاكۋلتەتىنىڭ فليۋوروگرافيالىق زەرتتەۋدەن وتپەگەن 3-4-كۋرس ستۋدەنتتەرىنىڭ Excell فورماتىنداعى قۇجاتتارىن دايىنداپ، ونى فاكۋلتەت دەكاناتىنىڭ مامانىنا جىبەرگەن.
“بەرىلگەن قۇجاتتاردا ستۋدەنتتەردىڭ تەگى مەن اتى-جونىنەن باسقا مەديتسينالىق قۇپياعا قاتىستى مالىمەتتەر دە بولعان. كەيىننەن ۋنيۆەرسيتەت ستۋدەنتتەرىنە قاتىستى دارىگەرلىك قۇپيانى قۇرايتىن دەربەس دەرەكتەر مەن مالىمەتتەر مەسسەندجەرلەر ارقىلى تاراپ كەتكەن”، – دەلىنگەن رەسمي حابارلامادا.
اتالعان فاكت بويىنشا ۋنيۆەرسيتەتتە قىزمەتتىك تەكسەرۋ جۇرگىزىلەتىن بولادى.
“الماتى قالاسىنىڭ پروكۋراتۋراسىنا وسى فاكت بويىنشا پروكۋرورلىق ارەكەت ەتۋ شارالارىن قابىلداۋدى جانە ستۋدەنتتەردىڭ قۇقىعىن قورعاۋدى قامتاماسىز ەتۋدى سۇراپ ءوتىنىش جولداندى. ۋنيۆەرسيتەت "Smart Health University City" جشس-مەن شارتتى بۇزۋ تۋرالى ماسەلەنى قاراستىرىپ جاتىر”، – دەلىنگەن.
