عىلىم جانە جوعارى ءبىلىم ءمينيسترى ساياسات نۇربەك وڭتۇستىك قازاقستان ۋنيۆەرسيتەتىنە شورتى كيگەنى ءۇشىن كىرە الماعان قىزدىڭ جاعدايىنا بايلانىستى پىكىر ءبىلدىردى. بۇل وقيعا Threads جەلىسىندە تاراعان بولاتىن، دەپ حابارلايدى “ادىرنا”.
قىزدىڭ ايتۋىنشا، قاسىنداعى قۇربىسىن شورتى كيىپ كەلگەنى ءۇشىن كۇزەتشىلەر دەكاناتقا وتكىزبەگەن.
“قاتتى تاڭعالىپ وتىرمىن. وڭتۇستىك قازاقستان مەملەكەتتىك ۋنيۆەرسيتەتىنە دەكاناتقا پەچات قويدىرۋ ءۇشىن كەلگەنبىز. جانىمداعى قىزدى وتكىزبەدى. كۇزەتشىلەر “ۋنيۆەرسيتەتتىڭ زاڭى سولاي، سەن بۇلاي كىرسەڭ، ءبىز قارايمىز” دەيدى. كۇزەتشى اعايدىڭ ءوزى سولاي ايتىپ تۇر. بۇل جوعارى وقۋ ورنى، ەشكىم اشىق-شاشىق كيىنىپ تۇرعان جوق، ءبارى جيناقى. سونىڭ وزىندە وسىلاي ايتىپ تۇر. تاڭدانىپ تۇرمىن. جالپى مۇنداي زاڭ بار ما؟” – دەدى بويجەتكەن.
بۇل ساۋالعا مينيستر ساياسات نۇربەك بىلاي جاۋاپ بەردى:
"شىنىمەن دە كيىمگە قاتىستى جەكە تالاپتار جوق. مۇندا ورتا بىلىمنەن وزگەشە. ۋنيفورما نەمەسە كيىم ەلەمەنتتەرىنە قويىلاتىن تالاپتار جوق. قازىر ءبىز ءبىر جاعىنان كۇزەتشىنىڭ سىرتقى تۇرگە قاتىستى تۇسىنىكسىز ارەكەتتەرىن قاراستىرامىز. ۋنيۆەرسيتەتتە سىرتقى تۇرگە قويىلاتىن تالاپتار بار ما، سونى دا انىقتايمىز", – دەدى ول.
ءمينيستردىڭ ايتۋىنشا، جوعارى ءبىلىم جۇيەسى اشىق ءارى دەموكراتيالىق.
ء"وزىم دە امەريكادا وقىعاندا شورتى كيىپ ءجۇردىم، مۇنى جاسىراتىن ەشتەڭە جوق. امەريكادان كەلگەن سوڭ ەۆرازيالىق ۋنيۆەرسيتەتتە دە شورتىمەن ءجۇردىم. ءبارى "قاراڭىزدار، امەريكالىق كەلدى" دەپ جۇگىرىپ ءجۇردى. سوندىقتان ءبىز قاتاڭ تالاپتار قويمايمىز", – دەپ باسا ايتتى ول.
سونىمەن بىرگە ءمينيستردىڭ ايتۋىنشا، ۋنيۆەرسيتەت قوعامدىق ورىن بولعاندىقتان، وقۋ ورىندارى وزدەرىنىڭ ىشكى ستاندارتتارى مەن كيىم كودەكسىن بەلگىلەي الادى.
