ۇكىمەت ۇيىندە وتكەن ءباسپاسوز ءماسليحاتىندا ۇلتتىق ەكونوميكا ءمينيسترى الىبەك قۋانتىروۆ قولما-قول اقشاعا جاپپاي كوشۋ جانە ءموبيلدى اۋدارىمداردان باس تارتۋ تۋرالى ايتتى، دەپ حابارلايدى “ادىرنا” ۇلتتىق پورتالى.
“مەنىڭ ويىمشا، بۇل – ۋاقىتشا قۇبىلىس. كەيبىر كاسىپكەرلەردىڭ تاراپىنان تۇسىنبەۋشىلىكتەر ورىن العان سوڭ، وسىنداي دۇربەلەڭ پايدا بولدى. ءبىز مەملەكەت ءۇشىن جۇمىس ىستەگىمىز كەلەدى، بۇل جەردە ماڭىزدىسى كاسىپكەرلەردىڭ مۇنى ءوز ەلى ءۇشىن جاساۋ كەرەكتىگىن ءتۇسىنۋى. ءسىز سۇر ايماقتاردا جۇمىس ىستەي المايسىز. قازاقستان الەمدەگى قارجىلىق تەحنولوگيالار مەن ءموبيلدى اۋدارىمدار بويىنشا الەمدەگى تسيفرلاندىرىلعان ەلدەردىڭ ءبىرى.بىزگە اقش-تان، ەۋروپادان كەلگەن شەتەلدىكتەر تسيفرلاندىرۋ دەڭگەيىن كورىپ، تاڭعالادى، - دەدى الىبەك قۋانتىروۆ.
ۇلتتىق ەكونوميكا ءمينيسترى بۇعان دەيىن قارجى مينيسترلىگىنەن شاعىمدار بولسا، ءتيىستى مالىمدەمە جاساۋعا بولادى دەگەن ۇندەۋ بولعانىن ەسكە سالدى. دەگەنمەن، الىبەك قۋانتىروۆ جاعداي جاقسارادى دەپ ەسەپتەيدى.
“مەن ءوزىم ەلەكتروندى گادجەتتەردى بەلسەندى پايدالانامىن. بۇل وتە ىڭعايلى. ال ەكونوميكا ءۇشىن ايرىقشا پروبلەمالار تۋىندايدى دەپ ويلامايمىن. بارلىق ادامدار اقشاعا بولسا دا تاۋارلاردى ساتىپ الادى. بانكتەر بانكوماتتارعا كوبىرەك قولما-قول اقشا سالۋى كەرەك”، - دەپ تولىقتىردى مينيستر.
ايتا كەتەيىك، قازاقستاندىق كاسىپكەرلەر ءموبيلدى اۋدارىمدارعا سالىناتىن سالىققا نارازىلىق بىلدىرگەن ەدى. ناتيجەسىندە ولار تاۋارلار مەن قىزمەتتەر ءۇشىن ءموبيلدى تولەم تۇرىنەن باس تارتىپ، قولما-قول تولەم تۇرىنە كوشكەن بولاتىن.
“ادىرنا” ۇلتتىق پورتالى
