قازاقستان وزبەكستانمەن جانە قىتايمەن ترانسشەكارالىق وزەندەردەگى سۋدى ءبولۋ تۋرالى كەلىسىمدەرگە قول قويۋ جۇمىستارىن جۇرگىزۋدە، دەپ حابارلايدى “ادىرنا” ۇلتتىق پورتالى.
بۇل تۋرالى ۇكىمەت وتىرىسىندا سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ ءمالىم ەتتى.
مينيستر ترانسشەكارالىق سۋ اعىندارىن بىرلەسىپ پايدالانۋ جانە كورشىلەس مەملەكەتتەرمەن ىنتىماقتاستىقتى دامىتۋ جونىندەگى ءىس-شارالارعا توقتالدى. ەلدەگى 8 سۋ باسسەينىنىڭ 7-ءى ترانسشەكارالىق بولىپ تابىلادى. سونىڭ سالدارىنان قازاقستان نەگىزىنەن كورشى ەلدەردىڭ (قىتاي حالىق رەسپۋبليكاسى، رەسەي فەدەراتسياسى جانە ورتالىق ازيا ەلدەرى) سۋ شارۋاشىلىعى ساياساتىنا تاۋەلدى بولىپ وتىر.
مينيسترلىك ترانسشەكارالىق سۋ وبەكتىلەرىن پايدالانۋ جانە قورعاۋ ماسەلەلەرى بويىنشا كەلىسسوزدەر توبى مۇشەلەرىنىڭ قۇزىرەتىن كۇشەيتۋدى كوزدەپ وتىر.
“سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىندا قازاقستان ۇكىمەتىنىڭ وزبەكستانمەن كەلىسىمدەرگە قول قويۋى جانە قىتاي ترانسشەكارالىق سۋ وبەكتىلەرىندەگى سۋدى بىرلەسىپ باسقارۋ، پايدالانۋ جانە ءبولۋ تۋرالى – بۇل مەملەكەتارالىق سۋ قاتىناستارىن دامىتۋعا ىقپال ەتەدى. سونىمەن قاتار، مينيسترلىك ورتالىق ازيا ەلدەرى اراسىنداعى سۋ-ەنەرگەتيكالىق ىنتىماقتاستىق تۋرالى كەلىسىم جوباسىن ازىرلەۋدە، - دەدى مينيستر نۇرجان نۇرجىگىتوۆ ۇكىمەت وتىرىسىندا.
“ادىرنا” ۇلتتىق پورتالى
