قازاقستان اۋماعىندا 700-دەن استام بۇلاق بارى انىقتالدى. بۇل تۋرالى سۋ رەسۋرستارى جانە يرريگاتسيا مينيسترلىگى مالىمدەدى، دەپ حابارلايدى «ادىرنا» ءتىلشىسى.
مينيسترلىك مالىمەتىنشە، "قازگيدروگەولوگيا" ۇلتتىق گيدروگەولوگيالىق قىزمەتى ەل اۋماعىنداعى بارلىق بۇلاقتى تۇگەندەۋ جۇمىستارىن جۇرگىزىپ جاتىر. الدىن الا دەرەكتەرگە سايكەس، بۇگىنگى تاڭدا 711 الەۋەتتى بۇلاق انىقتالعان.
سونىمەن قاتار قور جانە ارحيۆ ماتەريالدارى نەگىزىندە ەل اۋماعىنداعى 2772 بۇلاقتىڭ كارتاسى جاساقتالعان. ماماندار بۇلاقتاردى سۋ رەسۋرستارى تاپشىلىعى جاعدايىندا سۋمەن قامتۋدىڭ قوسىمشا كوزى رەتىندە قاراستىرىپ وتىر.
قازىرگى ۋاقىتتا قازاقستاندا اۋىزسۋ جانە تەحنيكالىق سۋمەن جابدىقتاۋ، سۋارۋ جانە وزگە دە ماقساتتارعا ارنالعان جەراستى سۋىنىڭ 4 803 كەن ورنى بارلانعان. مەملەكەتتىك بالانس بويىنشا تاۋلىگىنە 43,2 ملن تەكشە مەتر كولەمىندەگى پايدالانۋ قورى تىركەلگەن. ونىڭ ىشىندە قازىرگى تاڭدا شامامەن 1,5 ملن تەكشە مەتر نەمەسە 3,6% عانا پايدالانىلىپ وتىر. اتاپ ايتقاندا، شارۋاشىلىق-اۋىزسۋعا ارنالعان قور تاۋلىگىنە 21,2 ملن تەكشە مەتر. وندىرىستىك-تەحنيكالىق قاجەتتىلىكتەرگە ارنالعان قور تاۋلىگىنە 2,4 ملن تەكشە مەتر، ال سۋارۋ ماقساتىندا تاۋلىگىنە 19,6 ملن تەكشە مەتر قاراستىرىلعان.
«قازاقستاندا جەراستى سۋىنا ارنالعان مەملەكەتتىك مونيتورينگ جەلىسى جۇمىس ىستەيدى، وعان شامامەن 4 مىڭعا جۋىق باقىلاۋ ۇڭعىماسى كىرەدى. ولار سۋ دەڭگەيىن، تەمپەراتۋراسىن جانە ساپاسىن باقىلاۋعا مۇمكىندىك بەرەدى. گيدروگەولوگيا سالاسىن تسيفرلاندىرۋ ماقساتىندا مونيتورينگتىك جانە پايدالانۋ ۇڭعىمالارىن سۋ رەسۋرستارىنىڭ ۇلتتىق اقپاراتتىق جۇيەسىنە ەنگىزۋ جۇمىستارى جۇرگىزىلىپ جاتىر»،- دەپ ءتۇسىندىردى "قازگيدروگەولوگيا" ۇلتتىق گيدروگەولوگيالىق قىزمەتىنىڭ باسقارما توراعاسى بولات بەكنياز.
