بىلتىر جاساقتالعان سۋ رەسۋرستارى جانە يرريگاتسيا ءمينيسترى ەلدەگى وبلىستاردىڭ باسىم بولىگىن سۋ باسىپ جاتقاندا ءىس باسىندا، ەل اراسىندا كورىنگەن جوق. تۋعان كۇنى قارساڭىندا پرەزيدەنتتەن قاتاڭ سوگىس العان شەنەۋنىكتىڭ 7 ايعا جۋىق ۋاقىت ىشىندە اتقارعاندارىنا شولۋ جاساپ كوردىك.
كوكتەم كەلدى. قار ەرىدى. جىلعالاردان سۋ اققانى بىلاي تۇرسىن، بۇل جولى سۋ تاسىپ، حالىقتىڭ جيعان-تەرگەنىن ءبىر ساتتە اعىزىپ ءوتتى. ءۇيى قۇلاپ، مالى سۋدا قىرىلعانىن كورگەن حالىق شاراسىز كۇيگە ەندى.
قازاقستاننىڭ ون وبلىسىن سۋ باستى. توتەنشە جاعدايلار مينيسترلىگىنىڭ حابارلاۋىنشا، اقتوبە، اقمولا، اتىراۋ، قوستاناي، باتىس قازاقستان، شىعىس قازاقستان، ۇلىتاۋ، قاراعاندى، پاۆلودار جانە اباي وبلىستارىنا قاۋىپ ءتونىپ تۇر. 31 ناۋرىز كۇنگى پرەمەر-مينيستر ولجاس بەكتەنوۆ وتكىزگەن شتاب وتىرىسىندا توتەنشە جاعدايداعى اۋماقتان 11 306 ادام ەۆاكۋاتسيالانعانى، 5 مىڭنان استام ادام ۋاقىتشا پۋنكتەردە تۇرىپ جاتقانى ايتىلدى.
اپات ايتىپ كەلمەيدى. دەگەنمەن، جىل سايىن قاتەلىكتەر قايتالانا بەرمەك پە؟ ءتيىستى سالا باسشىلارى قايدا؟
قۇرعاقشىلىقتان – تاسقىنعا دەيىنگى قاتاڭ سوگىس
2023 جىلدىڭ كۇزىندە قازاقستاندا سۋعا جاۋاپتى سۋ جاڭا مينيسترلىك قۇرىلدى. ونى سول جىلدىڭ 1 قىركۇيەگىندە مەملەكەت باسشىسى قاسىم-جومارت توقاەۆ جولداۋىندا ايتتى.
"ەلىمىز ءۇشىن سۋدىڭ ماڭىزى مۇناي، گاز نەمەسە مەتالدان كەم ەمەس. سۋ شارۋاشىلىعى جۇيەسىن ءتيىمدى دامىتۋ ماسەلەسىمەن دەربەس مەكەمە اينالىسۋى قاجەت دەپ سانايمىن. سوندىقتان سۋ رەسۋرستارى جانە يرريگاتسيا مينيسترلىگى قۇرىلادى", - دەدى توقاەۆ پارلامەنت پالاتالارىنىڭ بىرلەسكەن وتىرىسىندا.
ەكولوگيا جانە تابيعي رەسۋرستار مينيسترلىگىنەن ءبولىنىپ قۇرىلعان مينيسترلىككە سۋ قورىن پايدالانۋ جانە قورعاۋ، سۋمەن جابدىقتاۋ، سۋ بۇرۋ سالاسىنداعى فۋنكتسيالار مەن وكىلەتتىلىكتەر بەرىلدى. دەمەك، سۋعا جاۋاپتى كىم بولسا، كىنالى دە سول بولماق.
كوپ كۇتتىرمەي مەملەكەت باسشىسىنىڭ جارلىعىمەن سۋ رەسۋرستارى جانە يرريگاتسيا ءمينيسترى بولىپ نۇرجان نۇرجىگىتوۆ تاعايىندالدى.
ەڭبەك جولىن مەحانيك بولىپ باستاعان مينيستر ءار جىلدارى تولە بي اتىنداعى اگروبىرلەستىكتىڭ باس ينجەنەرى، جۋالى اۋدانى اكىمى اپپاراتىنىڭ مامانىنان اكىم قىزمەتىنە دەيىن كوتەرىلدى. 2019 جىلدان 2021 جىلعا دەيىن بايزاق اۋدانى اكىمى قىزمەتىن اتقارسا، 2021 جىلى جامبىل وبلىسى اكىمىنىڭ ورىنباسارى، 2022 جىلدىڭ ءساۋىر ايىنان باستاپ 2023 جىلدىڭ قىركۇيەگىنە دەيىن جامبىل وبلىسىنىڭ اكىمى قىزمەتىن اتقاردى. 2023 جىلدىڭ 4 قىركۇيەگىنەن باستاپ سۋ رەسۋرستارى جانە يرريگاتسيا ءمينيسترى بولدى.
سۋ مينيسترلىگى قازاق سسر كەزىندە بولعان. 1990 جىلى بيلىككەگى نازارباەۆ پرەزيدەنت اتانعان سوڭ، سول كەزدەگى مەليوراتسيا جانە سۋ شارۋاشىلىعى مينيسترلىگى جابىلىپ، فۋنكتسياسى بولىسكە تۇسكەن. ال ارادا 34 جىلدان كەيىن قايتا قۇرىلعان مينيسترلىككە كىم باسشى بولادى دەگەن سۇراق كۇزدە كوپتى كۇپتى قىلعانى راس. باسقاسى باسقا، سول كەزدە جامبىل وبلىسىن باسقارعاندا ايماق قۇرعاقشىلىققا ۇرىنعان نۇرجان نۇرجىگىتوۆتىڭ مينيستر بولعانى دا تاڭعالدىرعان. وتكەن جىلى جامبىل وبلىسى شەكتەسەتىن قىرعىزستانمەن ارادا سۋ ماسەلەسى تۋىنداعان.
نۇرجان نۇرجىگىتوۆ مينيسترلىككە كەلگەن 7 ايعا جۋىق ۋاقىتتىڭ ىشىندە 2 رەت وسى ورىنعا تاعايىندالدى. ءبىرىنشىسى جوعارىدا ايتىلدى. ەكىنشىسى اقپان ايىندا جاڭا پرەمەر ولجاس بەكتەنوۆتىڭ كابينەتى جاساقتالعاندا، نۇرجان نۇرجىگىتوۆ مينيستر بولىپ قايتا تاعايىندالعان.
الايدا، مينيستر بولعانىنا 1 جىل تولماعان شەنەۋنىك پرەزيدەنت توقاەۆتان ءبىر دەمدە قاتاڭ سوگىس الىپ ۇلگەردى. 30 ناۋرىز كۇنى پرەزيدەنت ۇكىمەت پەن اكىمدەردى ىسىنە نەمقۇرايلى قارايدى جانە كاسىبي مىندەتىنە سايكەس كەلمەيدى دەپ سىنعا الدى. پرەزيدەنت سۋ تاسقىنىنا قارسى ۋاقىتىلى شارا قابىلداماعانى ءۇشىن پرەمەر-ءمينيستردىڭ ءبىرىنشى ورىنباسارى رومان سكليارعا، سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆكە جانە اتىراۋ، اقمولا، الماتى، پاۆلودار جانە اباي وبلىستارىنىڭ اكىمدەرىنە – قاتاڭ سوگىس جاريالاپ، ال اقتوبە، قوستاناي، باتىس قازاقستان وبلىستارىنىڭ اكىمدەرىنە قاتاڭ سوگىسپەن بىرگە قىزمەتتىك مىندەتتەرىنە تولىق ساي كەلمەۋىنە بايلانىستى ەسكەرتۋ بەردى.
ايتپاقشى، قاتاڭ سوگىس العان سوڭ، ءبىر كۇن وتكەندە، كەشە، 31 ناۋرىز كۇنى نۇرجان نۇرجىگىتوۆ 57 جاسقا تولدى. تۋعان كۇنىنە قاراي قاتاڭ سوگىس العان مينيستر سوڭعى بىرنەشە كۇن بويى وبلىستاردى سۋ باسىپ جاتقاندا وقيعا ورنىندا كورىنگەن جوق. ول ءۇشىن مينيسترلىكتىڭ رەسمي سايتىنا قاراساڭىز، نەمەسە ءمينيستردىڭ تەلەگرام-پاراقشاسىنا قاراساڭىز، جەتكىلىكتى. سۋ ءمينيسترى 10 وبلىستى سۋ باسىپ بولعان سوڭ، كەشە عانا اپاتقا بايلانىستى ءبىرىنشى رەت ءۇن قاتتى. سونىڭ بارىنە تۋعان كۇننىڭ تۋرا كەلگەنى جاي عانا سايكەستىك بولار...
ءسۋميننىڭ سۋداعى جولى
بالاپاندى سانايتىن كۇزدە قۇرىلعان سۋ رەسۋرستارى جانە يرريگاتسيا مينيسترلىگىنىڭ سايتىن شولىپ وتسەك، نۇرجىگىتوۆ قىزمەتكە تاعايىندالعاننان كەيىن اقپارات 9 قازاننان باستالعان. ءمينيستردىڭ العاشقى ساپارى قىزىلوردا وبلىسىنانا باستالىپتى.
كەيىن 11 قازاندا نۇرجان نۇرجىگىتوۆ قاراعاندى جانە پاۆلودار وبلىستارىنا جۇمىس ساپارىمەن بارىپ، «قازسۋشار» رمك «ق.ساتباەۆ اتىنداعى كانال» فيليالىنىڭ نىساندارىن ارالاعان.
مينيستر كانالدىڭ قۇرىلىمىمەن جانە جۇمىسىمەن تانىسىپ، فيليالدىڭ باسشىلىق قۇرامىمەن جانە پايدالانۋ ۋچاسكەلەرىنىڭ باسشىلارىمەن كەڭەس وتكىزگەن. كەڭەستە كانالدان ەسىل وزەنىنە دەيىن سۋ قۇبىرىن قايتا جاڭارتۋ قاجەتتىلىگى، سونداي-اق №4 سۋ تورابىنىڭ №87 بوگەتىن رەكونسترۋكتسيالاۋ ماسەلەلەرىن تالقىلاپ، سورعى ستانتسيالارى مەن قوسالقى ستانتسيالارداعى جابدىقتاردى ۇزاق مەرزىمدى جۇمىس مەرزىمىنە بايلانىستى جاڭارتۋ قاجەتتىلىگى ايتىلعان.
سونداي-اق، مينيستر جوعارىدا اتالعان بارلىق ماسەلەلەر بويىنشا جۇمىس ىستەپ، ەگجەي-تەگجەيلى زەردەلەيتىنىن مالىمدەگەن. دەگەنمەن، ءالى كۇنگە دەيىن اتالعان بوگەتكە قاتىستى شارا تۋرالى حابارلانبادى.
ايتا كەتسەك، سۋ تاسقىنىنان زارداپ شەگىپ وتىرعان وبلىستاردىڭ ءبىرى – قاراعاندى مەن پاۆلودار وبلىسى. قازىردىڭ وزىندە قاراعاندى وبلىسىنىڭ شەت اۋدانىنداعى ءۇش ەلدى مەكەندى سۋ باسقان. وبلىس اكىمدىگىنىڭ حابارلاۋىنشا، 292 ادام ەۆاكۋاتسيالانعان. ال پاۆلودار وبلىسى اقتوعاي اۋدانىنىڭ جالاۋلى اۋىلىندا 15 ءۇي سۋ استىندا قالعان.
اپاتتىق جاعدايدا دەپ جاريالانعانىنا ون شاقتى جىل وتكەن جوعارىداعى بوگەتتى سۋ بۇزىپ وتەر بولسا، استانانى قوسقاندا بىرقاتار ءىرى قالانىڭ حالقى جازدا اۋىزسۋسىز قالۋ قاۋپى سەيىلمەگەن.
قاراشانى نۇرجىگىتوۆ كورشى ەلدەرگە ساپارىمەن باستادى. 2 قاراشادا تاشكەنتتە ورتالىق ازيا ەلدەرىنىڭ سۋ شارۋاشىلىعى ۆەدومستۆولارى باسشىلارىنىڭ قاتىسۋىمەن مەملەكەتارالىق سۋ شارۋاشىلىعىن ۇيلەستىرۋ كوميسسياسىنىڭ 85-ءشى وتىرىسىنا قاتىستى. 15 قاراشادا قىرعىزستانعا بارىپ، ەلدىڭ اۋىل شارۋاشىلىعى ءمينيسترى اسقاربەك جانىبەكوۆپەن كەزدەستى. تاراپتار شۋ-2 اينالما كانالىن سالۋ ماسەلەسىن تالقىلادى.
28 قاراشادا مينيستر شىعىس قازاقستان جانە اباي وبلىستارىنا جۇمىس ساپارىمەن بارىپ، سۋ قويمالارى مەن كانالداردى جوندەۋ، سۋ تاسقىنىنان قورعاۋ جانە «قازسۋشار» رمك جاڭا فيليالىن اشۋ تۋرالى ماسەلە قوزعادى. «قاندىسۋ» سۋ قويماسىنا بارىپ، ونى جوندەۋدى باستاۋ بويىنشا جۇمىستى جەدەلدەتۋ قاجەتتىگىن ايتتى. دەگەنمەن، اتالعان تاپسىرما ورىندالمادى ما، الدە دۇرىس قاداعالانبادى ما، اباي وبلىسى دا سۋ تاسقانىنان امان قالمادى. قازىرگى كەزدە وبلىستا سۋ تاسقىنى سالدارىنان ءۇش ادام جوعالىپ كەتتى. ءالى كۇنگە دەيىن دەنەسى تابىلمادى.
جەلتوقساندا مينيستر نۇرجىگىتوۆ قازاقستاننىڭ باتىس بولىگىنە اياق باستى. ماڭعىستاۋ، اتىراۋ وبلىستارىنا ساپارلادى. مينيستر ءوڭىر تۇرعىندارىن ساپالى اۋىز سۋمەن قامتۋ، سۋ شارۋاشىلىعى نىساندارىن رەكونسترۋكتسيالاۋ جانە دامىتۋ جوبالارىن ىسكە اسىرۋ بارىسىمەن تانىستى.
سونداي-اق، ول سۋ شارۋاشىلىعىن دامىتۋدىڭ 2024-2030 جىلدارعا ارنالعان كەشەندى جوسپارى شەڭبەرىندە ەلىمىزدەگى 15 سۋ قويماسى رەكونسترۋكتسيادان وتەتىنىن ايتتى. اتاپ ايتقاندا، كۇردەلى جوندەۋ جۇمىستارى قازاقستاننىڭ 9 وبلىسىندا جۇرگىزىلەتىن بولادى دەلىنگەن. بۇل نىسانداردىڭ جالپى كولەمى 1,9 تەكشە شاقىرىمدى قۇرايدى.
مينيستر اتالعان سۋ قويمالارىن رەكونسترۋكتسيالاۋ 70 مىڭ ادام تۇراتىن 64 ەلدى مەكەندى سۋ باسۋ قاۋپىن ازايتۋعا، سونداي-اق 74 مىڭ گا سۋارمالى جەرگە سۋ بەرۋدى جاقسارتۋعا مۇمكىندىك بەرەتىنىن ايتقان بولادى. بىراق ايتقانىمەن، ەرىگەن سۋ مۇنى كۇتە المادى. ەلدىڭ 10 وبلىسىن سۋ شايىپ ءوتتى.
قازاقستاننىڭ سۋ سالاسى ءۇشىن جاڭا جىل جاڭالىقپەن باستالدى. 2024 جىلدان باستاپ حالىقارالىق ارالدى قۇتقارۋ قورىنا توراعالىق ەتۋ كەزەگى قازاقستانعا ءوتتى. ودان كەيىن قازاقستاندا 4 يەسىز قالعان بوگەت، 1 سۋ قويماسى جانە 3 توعان مەملەكەت مەنشىگىنە بەرىلدى. بۇلار – اقتوبە وبلىسىنداعى 4 بوگەت، سونداي-اق شىعىس قازاقستان وبلىسىنداعى 3 توعان مەن سۋ قويماسى. سونداي-اق، كاسپي تەڭىزىن عىلىمي-زەرتتەۋ ينستيتۋتى قۇرىلاتىنى حابارلاندى. ۇكىمەت سۋ رەسۋرستارى جانە يرريگاتسيا مينيسترلىگى ازىرلەگەن ينستيتۋت قۇرۋ تۋرالى قاۋلىنى بەكىتتى.
ال اقپاندا ۇكىمەت سۋ رەسۋرستارىن باسقارۋ جۇيەسىن دامىتۋدىڭ 2024-2030 جىلدارعا ارنالعان تۇجىرىمداماسىن بەكىتتى. سۋ رەسۋرستارى جانە يرريگاتسيا مينيسترلىگى ازىرلەگەن جاڭا سۋ كودەكسىنىڭ جوباسى پارلامەنت ماجىلىسىنە ەنگىزىلدى.
ناۋرىزدىڭ باسىندا مينيستر نۇرجىگىتوۆ تاعى دا قىزىلوردا مەن تۇركىستان، جامبىل وبلىستارىنا ساپارلادى.
ول باسقاراتىن مينيسترلىكتىڭ سايتىندا سالاعا قاتىستى اقپاراتتتاردى توپتاستىرىپ، اپتالىق شولۋ بەرىلىپ تۇراتىن. الايدا سايت بەتىنەن اپتالىق شولۋ 17 ناۋرىزدان بەرى جاسالماعانىن كورەمىز. سۋ تاسقىنى باستالعاننان كەيىن 26 ناۋرىزدا سايت بەتىنە سۋ رەسۋرستارى جانە يرريگاتسيا مينيسترلىگى اقمولا وبلىسىندا ەسىل سۋ رەتتەگىشىن سالۋ ءۇشىن جوبالاۋ-سمەتالىق قۇجاتتامانى ازىرلەۋ جۇمىسىن اياقتاپ جاتقانى تۋرالى جاريالاندى.
اقپارات بويىنشا، نىسان اقمولا جانە سولتۇستىك قازاقستان وبلىستارىنداعى ەلدىمەكەندەردى سۋ باسۋ قاۋپىن ازايتۋعا، سونداي-اق جالپى اۋدانى 25 مىڭ گەكتارعا دەيىن اقمولا وبلىسىنىڭ سۋارمالى جەرلەرىن سۋمەن قامتاماسىز ەتۋگە مۇمكىندىك بەرەدى.
31 ناۋرىز كۇنى رەسپۋبليكانىڭ سۋ تاسقىنى ايماقتارىندا سۋ رەسۋرستارى جانە يرريگاتسيا مينيسترلىگىنىڭ 1000-نان استام مامانى مەن 280-نەن استام تەحنيكاسى جۇمىس ىستەپ جاتىرعانى حابارلاندى.
«مينيسترلىك جانىنان قۇرىلعان جەدەل شتاب جەرگىلىكتى اكىمدىكتەرمەن ءوزارا تىعىز ءىس-قيمىل جاساپ جاتىر. رەسپۋبليكالىق مەنشىكتەگى بارلىق گيدروتەحنيكالىق قۇرىلىستاردا تاسقىن سۋىن اپاتسىز وتكىزۋ جونىندە ءىس-شارالار جوسپارى مەن سۋ قويمالارىنىڭ جۇمىس كەستەسى بەكىتىلدى. جاۋاپتى مەكەمە قىزمەتكەرلەرى سۋ شارۋاشىلىعى احۋالىنا تاۋلىك بويى باقىلاۋ جۇرگىزەدى»،- دەدى سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
سونداي-اق، نۇرجىگىتوۆ سۋ تاسقىنىنا قاتىستى مينيسترلىكتىڭ جۇرگىزىپ جاتقان جۇمىسى تۋرالى بايانداعان. دەگەنمەن، مينيستر كابينەتىنەن شىعىپ، توتەنشە جاعدايداعى اۋماقتاردى ارالاپ، جاعدايىمەن تانىسقانى تۋرالى اقپارات جوق.
قازاقشا كوممۋنيكاتسيا بويىنشا وبسە ۇلتتىق كونسۋلتانتى ايبار ولجاەۆشا ايتساق: «بىزدە يرريگاتسيانىڭ ءوزى جوق، تەك مينيسترلىگى بار. ول مەكەمە كومپيۋتەردە ءبىر اپتا وتىرىپ، «2024-2030 جىلدارعا ارنالعان تۇجىرىمداما» جاساپ ءبىتتى دە، شارشاپ قالدى».
تۇجىرىمداما جاساعاننان شارشادى ما، الدە مينيستر حالىق الدىنا بارۋدان قورقا ما، بەلگىسىز.
تاعايىنداۋلار تاساسىنداعى جاۋاپكەرشىلىك
2022 جىلى دا قازاقستاندا 200-دەن استام ەلدى مەكەن قاۋىپتى ايماقتا قالعان. ول كەزدە سۋ تاسقىنىنا قاردىڭ ۋاقىتىلى شىعارىلماۋى، ارىقتاردىڭ تازالانباۋى ماسەلەنىڭ سەبەبى رەتىندە ايتىلعان.
ال بيىل بارلىق وبلىستا دەرلىك قاۋىپ بار. سول كەزدەگى قاتەلىك ءالى دە تۇزەلمەگەن. بۇل تۋرالى «ادىرنا» تىلشىسىنە «بايتاق» پارتياسىنىڭ توراعاسى ازاماتحان ءامىرتاي ايتىپ بەردى.
- بيىل قار قالىڭ ءتۇستى. كەيبىر جەردە كۇرەلمەدى. ول ەرىپ، قانشاما جەرلەر سۋعا اعىپ كەتتى. قاراپ وتىرساق، بۇل توتەنشە جاعدايدى قولدان جاساپ وتىرمىز. بىرىنشىدەن، كەڭەس وداعىندا سۋ تاسقىنى بولماس ءۇشىن ارنايى ارىقتار بولدى، سولاردى ارنايى تازارتىپ وتىردى. كەيىن ول كانالدارعا اعاشتار ءوسىپ كەتتى. ارنايى ينفراقۇرىلىم بولماعاننان كەيىن، قار ەرىگەن كەزدە ۇيلەردى باسىپ قالىپ جاتىر. ول ءۇشىن قايتادان سول ارىقتاردى، كانالداردى تازارتىپ، قار ەرىگەندە اعىستار قالاي كەتەدى، سونى ويلاستىرىپ جاساۋ كەرەك. سونىمەن قاتار، قار قالىڭ تۇسكەن كەزدە قىستى كۇنى جيناقتاپ، ارنايى جەرگە اپارۋ كەرەك ەدى. وسىنداي جاعداي قالىپتاسپاس ءۇشىن سۋ قويمالارى دا كەرەك، - دەيدى ازاماتحان ءامىرتاي.
ول ماسەلەنىڭ باستى سەبەبىن جاۋاپكەرشىلىكپەن بايلانىستىرادى.
- قاي سالانى الساق تا مەملەكەتتىك مەكەمەلەردىڭ جاۋاپكەرشىلىگى از. ءوزارا بايلانىس جوق. اكىمدىك وزىمەن-ءوزى، مينيسترلىكتەر وزىمەن-ءوزى، ارقايسىسى جاۋاپكەرشىلىكتى وزىنە المايدى، سوڭىندا ەشكىم جاۋاپتى بولماي قالادى. جۇيەلى ەشتەڭە قارالمايدى. سوندىقتان جىل سايىن ءبىر وقيعا وسىلاي قايتالانا بەرەدى، -دەيدى ازاماتحان ءامىرتاي.
وسى ارادا ايتا كەتۋ كەرەك، كەشە، 31 ناۋرىز كۇنى پرەمەر-ءمينيستردىڭ جەتىنشى ورىنباسارى بولىپ قانات بوزىمباەۆ تاعايىندالدى. ونىڭ قۇزىرىنا باسقا دا ماسەلەلەرمەن قاتار توتەنشە جاعدايلار جانە سۋ رەسۋرستارى ماسەلەلەرىنە جەتەكشىلىك ەتۋ ەنگىزىلگەن. بۇل بۇرىن وسى سالانى سۇيرەيدى دەگەن پرەمەردىڭ ءبىرىنشى ورىنباسارى، اقىرى قاتاڭ سوگىس العان رومان سكلياردىڭ جاۋاپكەرشىلىگىن ءبولىسۋ مە، الدە سوڭعى جىلدار قۇرىلعان توتەنشە جاعداي مينيسترلىگى مەن سۋ رەسۋرستارى جانە يرريگاتسيا مينيسترلىگىنىڭ ءىسىن ىلگەرىلەتۋ ۇددەسى مە – رەسميلەردەن ەشكىم تۇسىندىرمەدى. انىق ەشكىم تۇسىندىرمەگەن سوڭ، بولجام مەن جورامالعا جول بەرىلەتىنى بەلگىلى. ودان دا انىعى – قوعام ءوز سالاسىن بىردەن ءيىرىپ اكەتەتىن، جۇلقىنا جۇمىس ىستەيتىن سۋ ءمينيسترىن كورىپ تۇرعان جوق.
دانا نۇرمۇحانبەت
«ادىرنا» ۇلتتىق پورتالى
