وزبەكستان پارلامەنتىنىڭ تومەنگى پالاتاسى سپيكەرىنىڭ ورىنباسارى، «ميللي تيكلانيش» پارتياسىنىڭ جەتەكشىسى الىشەر قادىروۆ ءبىلىم، تەلەۆيدەنيە جانە باسقا دا سالالاردا ورىس ءتىلىنىڭ پايدالانىلۋىن قايتا قاراۋ قاجەتتىگىن ايتتى، دەپ حابارلايدى «ادىرنا» ءتىلشىسى.
«رەسەيدىڭ رەسمي وكىلدەرى شوۆينيستەردىڭ وعاش قىلىقتارىن ايتۋمەن عانا شەكتەلىپ وتىر. كەيىنگى كەزدە وسى تاقىرىپتان باسقا اڭگىمەلەردى ەستىمەيتىن بولدىق. مۇنداي جاعدايدا قارىم-قاتىناستى جاقسارتۋدىڭ پراكتيكالىق شارالارى تۋرالى ويلانۋىمىز كەرەك. ماسەلەن، ورىس ءتىلى ءبىلىم بەرۋ سالاسى مەن تەلەديداردا كەڭىنەن قولدانىلادى. الايدا ەلىمىزدە ءورىستىلدى ازاماتتارىمىزدىڭ ۇلەسى 3%-عا دا جەتپەيدى. بۇل تەڭگەرىمسىزدىكتى تۇزەتۋ كەرەك»،—دەدى ول.
سونداي-اق قادىروۆ باستاۋىش ءبىلىمدى انا تىلىندە وقىتۋدى زاڭمەن بەكىتۋ كەرەك ەكەنىن مالىمدەدى.
«قازاق، ءازىربايجان، قىرعىز، تۇرىكمەن، تۇرىك، تاجىك اعايىندارىمىزدىڭ تەلەباعدارلامالارىمەن الماسايىق. بۇل ماسەلەلەردى الداعى فراكتسيا وتىرىستارىندا تالقىلايتىن بولامىز»، — دەپ تولىقتىردى ساياساتكەر.
ەسكە سالايىق، بۇعان دەيىن رەسەيلىك تاريحشى ميحايل سمولين «مەستو ۆسترەچي» توك-شوۋىندا 1917 جىلعى رەۆوليۋتسياعا دەيىن قازاقتار دا، وزبەكتەر دە ۇلت رەتىندە بولماعانىن ايتقان ەدى.
