وزبەكستان ۇكىمەتى قوعامدىق ورىنداردا نيقاب تاعاتىندارعا ايىپپۇل سالا باستايتىنىن مالىمدەدى. ايتۋلارىنشا، جاڭا زاڭ — ەلدەگى ءدىني ەكسترەميزمگە قارسى اۋقىمدى كۇرەستىڭ ءبىر بولىگى. ءتيىستى جارلىققا وزبەكستان پرەزيدەنتى قول قويدى، دەپ حابارلايدى «ادىرنا» ءتىلشىسى.
ادىلەت مينيسترلىگى زاڭ قوعامدىق قاۋىپسىزدىكتى قورعاۋ ءۇشىن قاجەت دەگەن مالىمدەمە جاسادى.
«قوعامدىق ورىنداردا تۇلعانى انىقتاۋعا مۇمكىندىك بەرمەيتىن دارەجەدە بەتىن جاۋىپ ءجۇرۋ 3,3 ميلليوننان 4,95 ميلليون سۋمعا دەيىن (126 مىڭ تەڭگەدەن 189 مىڭ تەڭگەگە دەيىن — رەد.) ايىپپۇل سالۋعا اكەپ سوعادى»،—دەلىنگەن حابارلامادا.
ەلدە زاڭدى سىناۋشىلار دا بار. ولار بۇنداي شارا ءدىني سەنىم بوستاندىعىنا نۇقسان كەلتىرەدى دەيدى. ايتۋلارىنشا، نيقاب ايەلدىڭ جەكە تاڭداۋى جانە ۇكىمەت ولاردىڭ ءدىني سەنىمدەرىنە ارالاسپاۋى كەرەك.
ەسكە سالايىق، بۇعان دەيىن وزبەكستاندا دۇكەننىڭ ءدىني اتاۋلارىن وزگەرتىپ، ارابشا جازۋلاردى الىپ تاستاۋ تاپسىرىلعانىن جازعان ەدىك.
