ۋكرايناداعى سوعىس قيمىلدارى بارىسىندا تۇتقىنعا تۇسكەن شەتەل ازاماتتارىنىڭ ىشىندە وزبەكستان ازاماتتارى ەڭ كوپ ەكەنى انىقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى ۋكرايندىق «حوچۋ جيت» جوباسىنىڭ دەرەكتەرىنە سۇيەنە وتىرىپ، حالىقارالىق باق حابارلاعان.
اتالعان جوبا تۇتقىندار مەن دەزەرتيرلەر تۋرالى مالىمەتتەردى جيناۋمەن اينالىسادى. اقپاراتقا سايكەس، 2025 جىلدىڭ باسىنان بەرى كەمىندە 902 وزبەكستاندىق ازامات رەسەي قارۋلى كۇشتەرىمەن كەلىسىمشارتقا وتىرعان. جالپى العاندا، جوبانىڭ زەرتتەۋى بويىنشا 1 100-دەن استام وزبەكستاندىقتىڭ رەسەي ارمياسى قاتارىندا ەكەنى بەلگىلى بولعان.
"100-دەن استامى قازا تاپتى", - دەپ مالىمدەدى جوبا وكىلدەرى.
رەسەيدە ەڭبەك ميگرانتى رەتىندە جۇرگەن وزبەكستاندىقتار جوعارى جالاقى، قۇرىلىس نەمەسە تىل بولىمدەرىندە جەڭىل جۇمىس جانە رەسەي ازاماتتىعىن الۋ مۇمكىندىگى سىندى ۋادەلەرمەن اسكەرگە تارتىلعان.
«حوچۋ جيت» جوباسىنىڭ دەرەكتەرىنە سايكەس، قازىرگى تاڭدا ۋكراينادا تۇتقىندا 33 مەملەكەتتىڭ ازاماتتارى بار. سولاردىڭ ىشىندە وزبەكستان ازاماتتارىنىڭ سانى ەڭ كوپ.
اتالعان اقپارات وزبەك قوعامىندا ۇلكەن رەزونانس تۋدىرىپ وتىر.
