«AMANAT» پارتياسى فراكتسياسىنىڭ مۇشەسى، دەپۋتات ۇلىقبەك تۇماشينوۆ شىعىس قازاقستان وبلىسىنداعى مارقاكول اۋدانىنىڭ تابيعي ەرەكشەلىگىن اتاپ، ۇلتتىق پارك ەتۋدى ۇسىندى، دەپ حابارلايدى "ادىرنا" ۇلتتىق پورتالى. دەپۋتاتتىق ساۋال قر پرەمەر-ءمينيسترى ءاليحان سمايىلوۆقا جولداندى.
تۇماشينوۆ ءوز دەپۋتاتتىق ساۋالىندا شىعىس قازاقستان وبلىسىندا شەكارالىق كاتون-قاراعاي، مارقاكول اۋداندارىنىڭ قۇرىلۋىن اتاپ، تۇرعىنداردىڭ پرەزيدەنت شەشىمىنە ريزاشىلىعىن بىلدىرگەنىن جەتكىزدى.
اتالمىش اۋداندار مەملەكەت باسشىسى قاسىم-جومارت توقاەۆتىڭ شەشىمىمەن قۇرىلعان بولاتىن.
"قاڭتاردىڭ ءبىرىنشى ونكۇندىگىندە، وڭىرلەردى ارالاۋ كەزىندە وسى اۋدانداردا، ياعني قاتون-قاراعاي، ۇلكەن نارىن، مارقاكول، كۇرشىم ايماقتارىندا بولىپ قايتتىق، سونداعى قاراپايىم حالىقتىڭ ريزاشىلىعى مەن قۋانىشىن، پرەزيدەنتىمىزگە دەگەن زور ىقىلاسى مەن العىسىن كوردىك!" دەدى ول.
سونداي-اق، ول جاڭادان قۇرىلعان اۋداندارعا ەرەكشە كوڭىل ءبولۋ كەرەك ەكەنىن اتاپ ءوتتى:
"اتالعان مارقاكول اۋدانىنىڭ ايماعىندا «مارقاكول قورىعى» ورنالاسقان. بۇل قورىق كەنەس وداعىنىڭ كەزىندە قۇرىلعان. بۇگىنگى كۇنى «قاتون- قاراعاي» جانە «تارباعاتاي» ۇلتتىق پاركتەرىمەن كورشىلەس ورنالاسقان. قورىق بولۋ سەبەبىنەن، زاڭمەن تۋريستىك وبەكتىلەردى سالۋعا، دامىتۋعا تىيىم سالىنعان. حالىقپەن كەزدەسۋ كەزىندە، سايلاۋشىلارىمىزدىڭ سۇراۋى بويىنشا وڭىردىن ەكونوميكاسىن، ءتۋريزمدى دامىتۋ ماقساتىندا، تۇرعىنداردى جۇمىسپەن قامتاماسىز ەتۋ، قوسىمشا تابىس تابۋ جانە وسى اۋداننىڭ بايىرعى تۇرعىندارىنىڭ ءوز ولكەسىنە قايتىپ ورالۋىنا قىزىعۋشىلىق تۋدىرۋ ءۇشىن «مارقاكول قورىعىنىڭ» ستاتۋسىن وزگەرتىپ، «مارقاكول ۇلتتىق پاركى» رەتىندە قاراستىرۋ قاجەت. بۇل دەگەنىمىز - وسى ولكەنىڭ ەرتەڭ قازاقستان ەلىنىڭ ءىنجۋ- مارجانىنا اينالۋىنا قوسىلعان ۇلكەن ۇلەسى بولار ەدى" دەدى ول.
دەپۋتات ۇلىقبەك تۇماشينوۆ "مارقاكول قورىعى" ستاتۋسىن "مارقاكول ۇلتتىق پاركى" ستاتۋسىنا وزگەرتۋ ارقىلى ءوڭىردىڭ ەكونوميكالىق، تۋريزمدىك تۇرعىدان دامۋىنا جول اشاتىنىن ايتىپ، ماسەلە كوتەردى:
"تاجىريبە كورسەتكەندەي، ۇلتتىق پارك ستاتۋسى اۋداننىڭ ەكونوميكالىق تىنىس-تىرشىلىگىن ارتتىرىپ، تۋريستەردىڭ سانىن كوبەيتىپ، اۋدانعا وتە قاجەت كىشى بيزنەستى دامىتۋعا جان-جاقتى مۇمكىندىك بەرەدى. «AMANAT» پارتياسى شەكارالىق اۋدانداردى دامىتۋدىڭ جۇيەلى تەتىكتەرىن جاساۋ قاجەت دەپ ەسەپتەيدى!" دەدى ول.
پرەمەر-مينيسترگە ۇكىمەت جانىنان قۇزىرلى مينيسترلىك وكىلدەرى ساناتىنان، ءماجىلىس دەپۋتاتتارىمەن بىرگە وسى ماسەلە جونىندە توپ قۇرىپ، شەشۋ تەتىكتەرىن قاراستىرۋ قاجەتتىگىن ايتتى.
