پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ەلىمىزدەگى 7 ملن بالانى قولداۋعا باعىتتالعان «قازاقستان بالالارى» تۇجىرىمداماسى قارالدى، دەپ حابارلايدى "ادىرنا" ۇلتتىق پورتالى.
وتىرىستا وقۋ-اعارتۋ ءمينيسترى جۇلدىز سۇلەيمەنوۆا، دەنساۋلىق ساقتاۋ ءمينيسترى اقمارال ءالنازاروۆا جانە ىشكى ىستەر ءمينيسترى ەرجان سادەنوۆ بايانداما جاسادى.
پرەمەر-ءمينيستردىڭ ايتۋىنشا، تۇجىرىمداما ءبىلىم بەرۋ، دەنساۋلىق ساقتاۋ، قاۋىپسىزدىك، الەۋمەتتىك قامسىزداندىرۋ جانە وتباسىنىڭ ءال-اۋقاتى سالاسىندا بالالاردىڭ قۇقىقتارىن قورعاۋ بويىنشا ناقتى ءىس-شارالاردى قامتيدى.
سونداي-اق، جاڭا جۇيە بويىنشا 1 اقپاننان باستاپ بارلىق ءبىلىم بەرۋ ۇيىمدارىندا «توسىننان تەكسەرۋ» قاعيداتى ەنگىزىلەدى. 5 مىڭ بالاعا كەمىندە ءبىر مامان تاعايىندالاتىن جاڭا شتاتتىق نورماتيۆ ەنگىزىلىپ، وڭىرلەردە بالا قۇقىقتارىن قورعاۋ باسقارمالارى قۇرىلۋدا.
كاسىبي وتباسىنا بالالاردى ورنالاستىرۋ تاجىريبەسى ەنگىزىلىپ، قاراجات كوزدەلگەن، بىراق وڭىرلەردە ىسكە اسىرۋ باياۋ ءجۇرىپ جاتىر. بالالاردىڭ دەنساۋلىعى مەن تسيفرلىق قاۋىپسىزدىگىن قامتاماسىز ەتۋ ماسەلەلەرى نازاردا بولادى، اۋىل بالالارىنىڭ زاماناۋي ءبىلىم الۋ مۇمكىندىگى ارتتىرىلادى.
پرەمەر-مينيستر مۇددەلى مەملەكەتتىك ورگاندار مەن اكىمدىكتەرگە تۇجىرىمداماداعى ءىس-شارالاردى ساپالى ءارى ۋاقتىلى ورىنداۋدى، بالا قۇقىقتارى جونىندەگى ۋاكىلمەن ءوزارا ءىس-قيمىلدى كۇشەيتۋدى، سونداي-اق اقپاراتتىق ناۋقان ۇيىمداستىرۋدى تاپسىردى.
ۇكىمەت داۋىس بەرۋ ناتيجەسىندە «قازاقستان بالالارى» تۇجىرىمداماسىن بەكىتىپ، جالپى ۇيلەستىرۋدى پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆاعا جۇكتەدى.
