فوتو: رolisia.kz
قازاقستاندا عيماراتتارعا گراففيتي، ءتۇرلى جازۋلار مەن سۋرەتتەر سالعانى ءۇشىن جاڭا ايىپپۇل ەنگىزۋ جوسپارلانىپ وتىر. وسىعان بايلانىستى زاڭناماعا وزگەرىستەر دايىنداۋ جونىندە ىشكى ىستەر مينيسترلىگىنە پرەمەر-مينيستر ولجاس بەكتەنوۆ تاپسىرما بەردى. بۇل تۋرالى ول 21 قىركۇيەكتە وتكەن ۇكىمەت وتىرىسىندا مالىمدەدى، دەپ حابارلايدى "ادىرنا".
«قوعامدىق ورىندارعا زيان كەلتىرەتىن گراففيتيدىڭ بارلىق تۇرىنە تولىق تىيىم سالۋ، ۆانداليزم مەن بۇزاقىلىقتىڭ الدىن الۋ ماقساتىندا زاڭناماعا وزگەرىستەر ەنگىزۋ بويىنشا ۇسىنىستار ازىرلەۋ قاجەت»، – دەدى ولجاس بەكتەنوۆ.
ىشكى ىستەر ءمينيسترى ەرجان سادەنوۆتىڭ ايتۋىنشا، قازاقستاندا ەسكەرتكىشتەر مەن تابيعي نىسانداردى قورلاۋ فاكتىلەرى بويىنشا 11 قىلمىستىق ءىس تەرگەلگەن.
سونىمەن قاتار پوليتسيا قىزمەتكەرلەرى ۆولونتەرلەرمەن بىرگە ەسىرتكى جارناماسى جازىلعان شامامەن 80 مىڭ جازۋدى جويعان.
ءمينيستردىڭ مالىمەتىنشە، ەسىرتكىنى ناسيحاتتاۋ جانە جارنامالاۋ فاكتىلەرى بويىنشا ەلىمىزدە بارلىعى 81 قىلمىستىق ءىس قوزعالىپ، ونىڭ ىشىندە 19 ادام سوتتالعان.
ۇكىمەتتەگى بۇل جيىن پرەزيدەنت قاسىم-جومارت توقاەۆتىڭ «تازا قازاقستان» ەكولوگيالىق اكتسياسى اياسىنداعى سوزىنەن بىرنەشە كۇن وتكەن سوڭ ءوتتى.
مەملەكەت باسشىسى سول كەزدە قوعامدىق عيماراتتارعا گراففيتي سالۋعا تىيىم ەنگىزۋ جونىندە بىرقاتار تاپسىرما بەرگەن بولاتىن.
پرەزيدەنتتىڭ ءباسپاسوز قىزمەتى حابارلاعانداي، قاسىم-جومارت توقاەۆ قالالارداعى قوعامدىق اۋماقتاردىڭ سىرتقى كورىنىسىن بۇزاتىن مۇنداي ارەكەتتەرگە جول بەرمەۋ ءۇشىن زاڭنامالىق جانە نورماتيۆتىك شارالار قابىلداۋ قاجەت ەكەنىن ايتقان.
قازاقستاندا گراففيتيگە بايلانىستى بىرنەشە رەزونانستى جاعداي بولعان.
مىسالى، وتكەن جىلى استانادا بەلگىسىز ادامدار LRT ۆاگوندارىنا سۋرەتتەر مەن جازۋلار سالعان. ءىس پوليتسياعا بەرىلىپ، ۆاگوندارداعى جازۋلار ارنايى قۇرالداردىڭ كومەگىمەن تازارتىلعان.
بۇعان دەيىن بىرنەشە جىل بۇرىن بەلگىسىز ادامدار بايقوڭىر عارىش ايلاعىنا كىرىپ، سالىنىپ بىتپەگەن «بۋران» عارىش كەمەسىنە گراففيتي سالعان.
قازىرگى تاڭدا جاڭا شەكتەۋلەردىڭ قالا كوشەلەرىندە پايدا بولاتىن مۋرالدارعا قاتىستى بولا ما، جوق پا – ناقتى بەلگىسىز.
قازاقستان قالالارىندا قوعامدىق ماڭىزى بار تاقىرىپتارعا ارنالعان ۇلكەن قابىرعا سۋرەتتەرى – مۋرالدار ءجيى سالىنىپ تۇرادى.
مىسالى، جاقىندا الماتى قالاسىنداعى مۇستافين كوشەسىندە كوك-جايلاۋ شاتقالىن قورعاۋعا ارنالعان مۋرال ورنالاستىرىلعان.
الداعى ۋاقىتتا زاڭناماعا ەنگىزىلەتىن وزگەرىستەر گراففيتيدىڭ قانداي تۇرلەرىنە قاتىستى بولاتىنى جانە رۇقسات ەتىلگەن ونەر تۋىندىلارىنىڭ مارتەبەسى قالاي انىقتالاتىنى قوسىمشا ءتۇسىندىرىلۋى مۇمكىن.
