قازاق ادەبيەتىنىڭ كلاسسيگى، اقىن، دراماتۋرگ ءىلياس جانسۇگىروۆ پەن فاتيما عابيتوۆانىڭ قىزى، قوعام قايراتكەرى سانجار جاندوسوۆتىڭ جۇبايى، دارىندى ۇستاز، يلفا ىلياسقىزى 89 جاسقا قاراعان شاعىندا ومىردەن وزدى، دەپ حابارلايدى “ادىرنا” ۇلتتىق پورتالى.
يلفا ىلياسقىزى 1935 جىلى 29-مامىردا الماتىدا دۇنيەگە كەلگەن، بىراق 1937 جىلى، نەبارى 2 جاسىنان باستاپ، "حالىق جاۋى وتباسىنىڭ" مۇشەسى رەتىندە استانادان الاستاتىلىپ، بۇكىل قازاقستان دالاسىن ارالاپ، كوشىپ كەتۋگە ءماجبۇر بولدى. سوعىس جىلدارىندا جامبىل وبلىسىنىڭ مەركى اۋىلىندا تۇراقتادى. تەك 1950-جىلداردىڭ باسىندا عانا الماتىعا قايتا ورالعان يلفا جانسۇگىروۆا شەت تىلدەرى ينستيتۋتىنا وقۋعا تۇسەدى. ونى بىتىرگەن سوڭ ق.ساتباەۆ اتىنداعى پوليتەحنيكالىق ينستيتۋتتا، اباي اتىنداعى قازاق پەداگوگيكالىق ينستيتۋىندا نەمىس ءتىلى ءپانىنىڭ وقىتۋشىسى بولىپ، قازسسر پەداگوگيكالىق قوعامىنىڭ عالىم حاتشىسى، سونىمەن قاتار قازسسر عىلىم اكادەمياسىنىڭ شەت تىلدەر كافەدراسىنىڭ وقىتۋشىسى بولىپ جۇمىس ىستەدى.
1958 جىلى يلفا ىلياسقىزى سانجار ورازۇلى جاندوسوۆقا تۇرمىسقا شىعادى، ەكەۋى بەس بالانى ءوسىردى. يلفا جاندوسوۆا تەك باتىر انا، جوعارى بىلىكتى ۇستاز عانا ەمەس، 34 جىل عۇمىرىن بىرگە وتكىزگەن ومىرلىك قوساعى، 1992 جىلى قايعىلى قازاعا ۇشىراعان مەملەكەت جانە قوعام قايراتكەرى س.جاندوسوۆتىڭ سەنىمدى سەرىگى دە بولا ءبىلدى. 1999 جىلى ول ءىلياس جانسۇگىروۆ قوعامدىق قورىن قۇرىپ، ونىڭ جۇمىسىن ءوزى باسقاردى. قور ءىلياس پەن فاتيما عابيتوۆانىڭ شىعارماشىلىق مۇراسىن جيناقتاپ، زەردەلەپ، اۋدارىپ، باسىپ شىعاردى، مەكتەپتەر مەن مۋزەيلەرگە قامقورلىق كورسەتىپ وتىردى.
ي.جاندوسوۆا-جانسۇگىروۆا "تاعدىرىمنىڭ ىزدەرى" اتتى ەستەلىكتەر جيناعىن شىعاردى. ءومىرىنىڭ سوڭعى ساعاتتارىنا دەيىن يلفا ىلياسقىزى قازاقستانداعى ازاماتتىق قوزعالىستار مەن ولاردىڭ بەلسەندىلەرىن قولداۋمەن ءوتتى.
“ادىرنا” ۇلتتىق پورتالىنىڭ ۇجىمى مارقۇمنىڭ تۋعان تۋىستارىنا قايعىرا كوڭىل ايتادى.
