بۇگىن ءال-فارابي اتىنداعى قازاق ۇلتتىق ۋنيۆەرسيتەتىنە – 90 جىل.
1934 جىلدىڭ 15 قاڭتارى قازاقستانداعى تۇڭعىش كوپ سالالى ۋنيۆەرسيتەت ءال-فارابي اتىنداعى قازاق ۇلتتىق ۋنيۆەرسيتەتىنىڭ رەسمي اشىلۋ كۇنى بولىپ سانالادى.
1934 جىلدىڭ 15 قاڭتارى كۇنى ۋنيۆەرسيتەتتىڭ العاشقى ستۋدەنتتەرى قابىلدانىپ، 19 قاڭتار كۇنى ۆەرنىي ەرلەر گيمنازياسىنىڭ ەسكى عيماراتىندا بيولوگيا جانە فيزيكا-ماتەماتيكا فاكۋلتەتتەرىنىڭ 54 ستۋدەنتى وقۋعا كىرىستى. وسى جىلدىڭ 1 قىركۇيەگىندە حيميا فاكۋلتەتى اشىلدى.
ۋنيۆەرسيتەتتىڭ تۇڭعىش رەكتورى بولىپ قازسسر حالىق اعارتۋ كوميتەتىنىڭ ورىنباسارى قىزمەتىندە بولعان ف.ت.وليكوۆ تاعايىندالدى. ۋنيۆەرسيتەتتىڭ عىلىمي جانە وقىتۋ جۇمىستارى رەسپۋبليكادان تىسقارى جەرلەردە ارنايى دايىندىقتان وتكەن 18 وقىتۋشى قۇرامىمەن باستالدى. 1934 جىلدىڭ 2 جەلتوقسانىندا ۋنيۆەرسيتەتكە س.م.كيروۆ ەسىمى بەرىلدى.
ۋنيۆەرسيتەت ءومىرىنىڭ جارقىن بەتتەرى، سونىڭ ىشىندە عىلىم مەن مادەنيەتىنىڭ ەڭ ۇزدىك جەتىستىكتەرى 70-80 جىلدارعا سايكەس كەلەدى. وسى كەزەڭدە ۋنيۆەرسيتەتتى بەلدى قوعام قايراتكەرى، اكادەميك ءو. جولداسبەكوۆ (1970-1986) باسقاردى. ۋنيۆەرسيتەتتىڭ كەرەمەت ستۋدەنتتەر قالاشىعى قۇرىلىسىنىڭ ءبىرىنشى كەزەڭى باستالىپ، عىلىم مەن ءبىلىمنىڭ جاڭا داستۇرلەرى تۋىنداپ، دامىپ، نىعايا ءتۇستى. ۋنيۆەرسيتەت ستۋدەنتتەرى دە عىلىم، ونەر جانە سپورت سالاسىنداعى ۇلكەن جەتىستىكتەرگە قول جەتكىزدى. ول ازاماتتىڭ بەدەلى، قايرات-قاجىرى مەن تاباندىلىعىنىڭ ارقاسىندا ۋنيۆەرسيتەتكە قالاشىق سالۋ ءۇشىن تاماشا تەرريتوريا جانە وسى كەرەمەت جوبانى جۇزەگە اسىرۋ ءۇشىن قارجى مەن قاراجات-كۇش ءبولىندى.
كەيىن قازسسر مينيسترلەر كابينەتىنىڭ № 629 قاۋلىسىمەن 1991 جىلى 23 قازانىندا قازاق مەملەكەتتىك ۋنيۆەرسيتەتىنە ۇلى فيلوسوف، ەنتسيكلوپەديست عالىم ءال-فارابي اتى بەرىلىپ، 1993 جىلدىڭ 9 قاڭتارىنداعى №1059 قر پرەزيدەنتى ن.ءا.نازارباەۆتىڭ قاۋلىسىمەن ءال-فارابي اتىنداعى قازاق مەملەكەتتىك ۇلتتىق ۋنيۆەرسيتەتى دەپ اتالاتىن بولدى.
ايتا كەتەيىك، ۋنيۆەرسيتەتكە بىلتىر رەبرەندينگ جاسالعان بولاتىن. ەندى وقۋ ورداسى ءال-ءفارابيدىڭ ورنىنا فارابي ۋنيۆەرسيتەتى اتالا باستادى.
