قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگى بانكتەردى تالداۋ جانە سترەسس-تەستىلەۋ دەپارتامەنتىنىڭ قىزمەتكەرى داۋلەت سالاۆاتۇلى چەريازدانوۆ پليۋشش ليگاسىنىڭ ەڭ ۇزدىك ۋنيۆەرسيتەتتەرىنىڭ ءبىرى – گارۆاردقا ءتۇستى. بۇل تۋرالى قنردا-نىڭ رەسمي سايتىندا جاريالادى، دەپ حابارلايدى “ادىرنا” ۇلتتىق پورتالى.
ايتا كەتەيىك، گارۆاردتا اقش-تىڭ 8 پرەزيدەنتى وقىعان جانە 40-تان استام نوبەل لاۋرەاتتارى ساباق بەرەدى.
“الەمنىڭ ەڭ ۇزدىك ۋنيۆەرسيتەتىنە ءتۇسۋ وڭاي ەمەس، بىراق الدىڭا وسىنداي ماقسات قويىپ، وعان بىرتىندەپ قول جەتكىزۋ ءۇشىن ەڭبەك ەتسەڭ، ءبارى مۇمكىن. داۋلەت چەريازدانوۆ ءوز ەڭبەك جولىن 2021 جىلى اقش-تىڭ ۋيليامس كوللەدجىن بىتىرگەن كەزدە باستادى، وندا ول جاراتىلىستانۋ، ماتەماتيكا جانە ستاتيستيكا باكالاۆرى ماماندىعى بويىنشا بىلىكتىلىككە يە بولدى. سول جىلدىڭ تامىز ايىندا وقۋىن اياقتاعاننان كەيىن ول قنردا-نىڭ بانكتەردى تالداۋ جانە سترەسس-تەستىلەۋ دەپارتامەنتىندە بانكتەردى سترەسس-تەستىلەۋ باسقارماسىنىڭ جەتەكشى مامانى بولىپ جۇمىس ىستەي باستادى”، دەلىنگەن حابارلامادا.
بانكتەردى تالداۋ جانە سترەسس-تەستىلەۋ دەپارتامەنتى قازاقستان رەسپۋبليكاسى بانك جۇيەسىنىڭ تۇراقتىلىعىن قامتاماسىز ەتۋدە شەشۋشى ءرول اتقارادى. دەپارتامەنت قىزمەتىنىڭ نەگىزگى باعىتى اكتيۆتەردىڭ ساپاسىنا تۇراقتى تۇردە باعالاۋ جۇرگىزۋ جانە ەكىنشى دەڭگەيدەگى بانكتەردىڭ جىل سايىنعى سترەسس-تەستىلەۋىن جۇزەگە اسىرۋ، ەكىنشى دەڭگەيدەگى بانكتەر ءۇشىن نەگىزگى تاۋەكەلدەردى انىقتاۋ جانە بولجاۋ.
«مەنىڭ ءرولىم وسى پروتسەستىڭ تەحنيكالىق بولىگىنە باعىتتالعان: مەن Python تىلىندە قاجەتتى سكريپتەردى ازىرلەيمىن، تاريحي دەرەكتەردى تازارتۋمەن جانە مودەلدەۋمەن اينالىسامىن»، - دەيدى داۋلەت چەريازدانوۆ.
ەكى جىل ىشىندە داۋلەت چەريازدانوۆ باسقارما باستىعىنىڭ ورىنباسارىنا دەيىن ءوستى. وسى ۋاقىت ىشىندە ول ءوز جۇمىسىنىڭ قىر-سىرىن تەرەڭ مەڭگەرە وتىرىپ، پراكتيكالىق تاجىريبە الدى. سونداي-اق، ول ءبىرشاما جەتىستىكتەرگە قول جەتكىزگەنىنە قاراماستان، ىزدەنۋىن توقتاتپادى. 2023 جىلدىڭ جازىندا داۋلەت ماگيستراتۋراعا تۇسۋگە نيەت ەتىپ، دايىندىعىن باستادى. ول الدىمەن ۋنيۆەرسيتەتتەر ءتىزىمىن انىقتاپ، ودان ءارى وقۋ ءۇشىن ماماندىعىن تاڭدادى.
داۋلەت ءوزى ءۇشىن جاساعان تىزىمدە پليۋشش ليگاسىنا كىرەتىن ۋنيۆەرسيتەتتەر بولدى: گارۆارد ۋنيۆەرسيتەتى (Harvard University), كولۋمبيا ۋنيۆەرسيتەتى (Columbia University), براۋن ۋنيۆەرسيتەتى (Brown University), كورنەلل ۋنيۆەرسيتەتى (Cornell University) جانە پەنسيلۆانيا ۋنيۆەرسيتەتى (University of Pennsylvania). بۇل ۋنيۆەرسيتەتتەرگە ءوتىنىش بەرۋدىڭ نەگىزگى تالاپتارىنا مىنالار جاتادى: GRE (Graduate Record Examination) تەستى، موتيۆاتسيالىق جانە تاقىرىپتىق ەسسەلەر، الدىڭعى پروفەسسورلار مەن قازىرگى جۇمىس بەرۋشىنىڭ ۇسىنىم حاتتارى جانە ۋنيۆەرسيتەتتىڭ ترانسكريپتى.
داۋلەت ءۇش ايدان استام ۋاقىتقا سوزىلعان مۇقيات دايىندىقتان كەيىن GRE (Graduate Record Examination) تەستىن تاپسىردى، ول تالاپكەرلەردىڭ تالدامالىق، جازباشا، اۋىزشا جانە ساندىق داعدىلارىن باعالايتىن ستاندارتتالعان تەستىنەن ءوتتى. ول ىقتيمال 340 بالدان جوعارى 320 بالل جينادى. قۇجاتتاردى تاپسىرۋدىڭ سوڭعى مەرزىمى 2024 جىلدىڭ قاڭتارىندا بولعان، ال ناۋرىزدا ول قۇجاتتارىن تاپسىرعان بارلىق بەس ۋنيۆەرسيتەتتەن شاقىرتۋ الدى. داۋلەت، وسى كورنەكتى بەستىكتىڭ ىشىنەن دجون ف. كەننەدي اتىنداعى گارۆارد مەملەكەتتىك باسقارۋ ينستيتۋتىن (Harvard Kennedy School) تاڭدادى. ول وقىتۋدىڭ ساپاسى مەن عىلىمي-زەرتتەۋ جۇمىستارىنىڭ اۋقىمى ارقاسىندا كوپتەگەن جىلدار بويى جەتەكشى الەمدىك رەيتينگتە ءبىرىنشى ورىنعا يە بولىپ وتىر.
«گارۆارد ماگيستراتۋراسىندا وقۋ ءۇشىن ماماندىق تاڭداۋعا قاتىستى، داۋلەت «مەملەكەتتىك ساياسات» (Master in Public Policy) ماماندىعىن تاڭدادى. ءوزىنىڭ تاڭداۋىن ماگيسترانت: «كاسىبي مانسابىمدى باستاعان ۋاقىتتان بەرى مەن قوعامعا قىزمەت ەتۋ جانە ازاماتتارىمىزدىڭ ءومىرىن جاقسارتۋ يدەياسىن ۇستاندىم، سوندىقتان مەملەكەتتىك قىزمەتكە بارىنشا دەن قويدىم. بولاشاقتا ەلىمىزگە پايدا كەلتىرۋ ءۇشىن مەملەكەتتىك باسقارۋ جانە ساياسات سالاسىندا ءبىلىم الۋدى وزىمە ماقسات ەتتىم»،- دەپ تۇسىندىرەدى.
«ۋنيۆەرسيتەتتەردىڭ قابىلداۋ كوميسسيالارى تاراپىنان مەملەكەتتىك قىزمەت سالاسىنداعى تاجىريبەنىڭ ماڭىزدىلىعى مەن جوعارى باعاسىنا ءمان بەرىلگەنىن ايتقان داۋلەت ماگيستراتۋراعا قۇجاتتار تاپسىرعان ۋاقىتتا ءوزىنىڭ بانكتەردى تالداۋ جانە سترەسس-تەستىلەۋ دەپارتامەنتىندەگى جۇمىسى مەن اگەنتتىكتەگى مانسابىنىڭ ماڭىزدى ءرول اتقارعانىن اتاپ وتەدى. «مەن ارىپتەستەرىمە، ءوزىمنىڭ باسشىلارىما جانە اگەنتتىكتىڭ جوعارى باسشىلىعىنا ولاردىڭ ماعان قولداۋ كورسەتكەندەرى جانە مەنىڭ وسۋىمە جاعدايلار جاساعانى ءۇشىن شىنايى العىس بىلدىرگىم كەلەدى. ولاردىڭ تالىمدەرى مەن كومەگىنسىز مەن مۇنداي تابىسقا قول جەتكىزە الماس ەدىم. مەنىڭ تاجىريبەمنىڭ وزدەرىنىڭ ءبىلىم دەڭگەيىن ارتتىرۋعا تالپىناتىن ارىپتەستەرىم مەن وتانداستارىم ءۇشىن ۇلگى بولاتىنىنا سەنەمىن»، - دەيدى داۋلەت.
