الەۋمەتتىك جەلىدە ءتيىستى ءبىلىمى بولماسا دا، ەمشىمىن دەيتىندەر كەزدەسەدى. مەدەۋ تۇتىپ ەم ىزدەپ، سولارعا بارىپ قارالاتىندار دا بار. سوڭىنان ەم قونباي الدىنىپ قالدىم دەگەندەر دە بارشىلىق. ەمشىسىنىڭ نامىسىن جىرتاتىندار دا از ەمەس. جەتىلگەن مەديتسينا تۇرىپ، ادامداردىڭ ەمشىگە جۇگىنۋىنىڭ سالدارى ارقيلى بولىپ جاتادى.
بۇگىندە اۋرۋىن بىلگەندەر مەديتسينا قىزمەتىنە جۇگىنبەي، ەمشى-بالگەرگە اسىعاتىن بولعان. بۇل ادامنىڭ عانا ەمەس، قوعامنىڭ دەرتىنە اينالىپ بارادى. ايتەۋىر دەرتىنە داۋا ىزدەگەن ادامدار ەمشىدەن دە مەدەت سۇرايدى. ەمشىگە قارالعان سوڭىنان ەم قونباعانى ءوز الدىنا، وكىنىشتى جاعدايعا ۇرىنعاندارى دا كەزدەسەدى. بۇل قانشالىقتى دۇرىس؟
«مەنەن ۇيرەنىپ باسقالاردى دا ەمدەيسىڭ»
باحىت كارىمقىزى - «اۋرۋىڭدى ىستىقپەن ەمدەپ جازامىن» دەگەندەرگە الدانىپ، دەرتىن اسقىندىرىپ العانداردىڭ ءبىرى. اۋەلدە اۋرۋعا شالدىققانىن ەستىگەن ول تەزىرەك ەمدەلۋدىڭ بارلىق جولىن قاراستىرعانىن ايتادى. سوندايدا ينستاگرامنان ەلدىڭ ءبارى جاقسى بولدىق جازىلىپ كەتتىم دەپ ايتىپ جاتقان ەمشىگە بارىپ قارالعان ەكەن. «جازىلامىن» دەگەن وي بولعان دەيدى ول.
- باحىت حانىم، ءسىز دەرتىڭىزدىڭ بارىن قاشان ءبىلدىڭىز؟
- 2021 جىلى سكرينينگتەن ءوتتىم، سول كەزدە قاتەرلى ىسىك بار دەدءى. باسىندا دارىگەرلەردەن ەم الىپ ءجۇردىم. بىراق كەيىن ينستاگرامنان شۋلاتىپ ۆيدەو سالىپ جاتاتىن ەمشىلەردىڭ بىرىنە باردىم. 9 مامىر مەن 19 مامىر ارالىعىندا ەم الدىق.
- ەمنىڭ اقىسى قانشا بولدى؟
- ءار كۇنگە 10 مىڭ تەڭگە تولەدىم. ءار سەانس قۇنى ون مىڭ تەڭگە ەدى. ودان بولەك 350 مىڭ تاعى تولەدىك. ول وقۋ اقىسى بولدى. «مەنەن ادامداردى قالاي ەمدەۋدى ۇيرەنىپ، باسقالاردى دا ەمدەيسىڭ» دەپ ايتتى. ونىڭ دا ۇزاقتىعى – 10 كۇن. سولاي وقىپ، سەرتيفيكات الدىق.
- ەمنىڭ دارىماعانىن قالاي ءبىلدىڭىز؟ دارىگەرلەر نە دەيدى؟
- ىستىق باسقان سوڭ ءبىر جاق بۇيرەگىم اۋىرىپ شىقتى. قارالدىم، تەكسەرىلدىم. كەيىن ءىسىكءتىڭ ودان سايىن ۇلكەيىپ كەتكەنى انىقتالدى.
- سىزگە قانداي ەم قولداندى؟ نەمەن ەمدەدى؟
- قاي جەرىڭ اۋىرسا دا ءجانجابىل (يمبير) جاعۋ كەرەك دەدى. سوسىن ماسساج جاسادى نۇكتەلەردى باسىپ. قانشاما اقشاعا ءجانجابىلدىڭ شايىن، ۇنتاعىن الدىم.
- سىزگە ەم دارىماعان سوڭ ەمشىگە ەسكەرتتىڭىز بە اۋرۋىڭىزدىڭ ودان سايىن اسقىنعانىن؟
- ايتتىم. «مەندە ىسىك ودان سايىن ءوسىپ كەتىپتى. ءسىز مەنى سەندىردىڭىز عوي جازىلاسىڭ دەپ. ءتىپتى سەندە ىسىك جوق، دارىگەرلەر ايتا بەرەدى دەپ تە ايتتىڭىز» دەپ حابارلاستىم، تەلەفونىن ءوشىرىپ تاستادى. ينستاگرامعا دا جازعانمىن. «بۇيرەكتىڭ ءىسۋى ىستىقپەن ەمدەلمەيدى» دەپ پاراقشالارىنا جازدىم. مەنى قارا تىزىمگە سالدى.
- سىزدەن باسقا كىمدەر بولدى؟ باسقا اۋرۋعا قانداي ەم قولداندى؟
- باسقا ەم جوق. ەپيلەپسيك، قانت ديابەتىنە دە، ديالەز، قان قىسىمى، جۇرەك اۋرۋلارى بولسا دا سول ەم. پسوريازبەن اۋىرىپ كەلگەن ءبىر بالا بولدى، وعان دا سول ەمدى قولداندى. ونىڭ دا اۋرۋى اسقىنعان. ونى دا يمبيرمەن ەمدەدى.
«سول جاقتا جاقسى بولىپ، ۇيدە اسقىندىردىم»
«الەۋمەتتىك جەلىدە سەبەپتى نۇكتەنىڭ نەگىزىن قالاۋشى، دەنساۋلىق ترەنەرى» دەگەن اتپەن تانىلعان ماسساج مامانىنىڭ جەلىدەگى جازىلۋشىسى 170 مىڭنان اسادى. «ەم الدىم، اۋرۋىمنان جازىلدىم» دەگەندەر قاتارى دا كوپ.
ال تەرى اۋرۋىنان ارىلۋعا بارعان ەرنازار ەسىمدى ازامات ءوزى ەمدى دۇرىس الماعانىن ايتادى.
- مەن ول كىسىدەن ەم الدىم ون كۇن. سول جاقتا جاتىپ، جاقسى بولدىم. بىراق تولىق ەمەس، قالعان ەمدى اۋىلىما بارىپ الدىم. ءۇي جاعدايىندا ەمدى دۇرىس جاساماي، اۋرۋدى اسقىندىردىم، - دەيدى.
الماتىلىق ەڭلىك ەسىمدى بويجەتكەن دە ەمشىلەردىڭ ەمىنەن زارداپ شەككەندەردىڭ ءبىرى. ول مۇرىن قۋىسىنىڭ قابىنۋىنان بولاتىن گايموريت اۋرۋىمەن اۋىرعان. 17 جاسىندا اۋرۋىن بىلگەن ناۋقاس وپەراتسياسىز ەمدەلۋدى ءجون ساناعان. الايدا ۋاقىتى مەن قاراجاتىن شىعىنداعان بويجەتكەن كەيىن ءبارىبىر وپەراتسيا جولىمەن ەمدەلگەنىن ايتادى.
وسى ەمشىگە ءبىز دە حابارلاسىپ كوردىك. ول ءبىر جولعى ەم باعاسى 10 مىڭ تەڭگە ەكەنىن ايتىپ، كەلىپ قارالىپ كورۋءدى ناسيحات ەتتى. ال «ءجۋرناليسپىن»دەپ ىسكە كوشكەنىمدە ەمشىمىز تەلەفونىن بىردەن ءوشءىرىپ تاستادى. ول وزىنە قولايسىز سۇراقتارعا جاۋاپ بەرۋگە دايىن بولماي شىقتى...
«دۇرىس ەم قابىلدايمىن دەسەڭىز، ەمشىگە سەنبەڭىز»
ال دارىگەرلەر اۋرۋدىڭ الدىن الۋ ءۇشىن دۇرىس ەم الۋ كەرەكتىگىن ايتادى. 13 جىلدىق تاجىريبەسى بار ونكولوگ، حيرۋرگ، ماممولوگ جانات باقىتقىزى اۋرۋدىڭ العاشقى بەلگىلەرى بايقالعاننان-اق دارىگەرگە قارالۋ كەرەك دەيدى.
- ىسىكتى ىستىقپەن ەمدەۋ مەديتسينا تۇرعىسىنان قانشالىقتى دۇرىس؟
- ىسىك ىستىقتى جاقسى كورەدى، ول ىستىقتا كەرىسىنشە قاتتى ءوسىپ كەتەدى. ءتىپتى باسقا ورگاندارعا دا تاراپ كەتۋ قاۋپى جوعارى بولادى. ونكولوگياداعى ەمنىڭ تۇرلەرى: حيميالىق، وپەراتسيالىق، ساۋلەلىك تەراپيا. باسقا ەشقانداي ەم جوق. ىستىقپەن نە سۋىقپەن ەمدەلەتىن اۋرۋ ەمەس بۇل.
- قازىرگى تاڭدا اۋرۋىن ەمشى، بالگەرگە اپارىپ، اسقىندىرىپ الاتىندار كوپ پە؟
- وكىنىشكە وراي كەزدەسەدى. مەنىڭ تاجىريبەمدە دە سونداي ناۋقاستارىم بولدى. ونداي جاعدايدا پسيحولوگپەن كەڭەسەمىز. مۇلدەم كونبەگەن ناۋقاسىم بولدى. وكىنىشكە وراي ول كىسى قايتىس بولدى.
جەكە پسيحولوگ ايگۇل باسارقىزى اۋرۋىن انىقتاسا ەمشىلەرگە جۇگىنەتىندەردى سوكتى.
- ەڭ وكىنىشتىسىدە وسى. ەمشىلەرگە بارىپ، ەمدەلەمىن دەپ اۋرۋلارىن اسقىندىرىپ جىبەرگەندەر قازىر قوعامدا ءوتە كوپ. ءتىپتى ارتى قايعىلى وقيعالارعا ۇلاسقاندار بار. ال كوزى اشىق، كوكىرەگى وياۋ ازاماتتار ءبىرىنشى كەزەكتە دارىگەرگە بارادى. ناۋقاس بولساڭىز, ەمشى، بالگەرگە سەنبەڭىز. بىلىكتى، وقىعان، تاجىريبەلى اق حالاتتىلارعا جۇگىنگەن ءجون. سوندىقتان ۋاقىتىڭىزدى ەڭ باستىسى دەنساۋلىعىڭىزدى جوعالتپاۋ ءۇشىن دۇرىس ەم قابىلداۋدى ۇيرەنىڭىز، - دەپ كەڭەس بەردى.
Cىمبات ناۋحان
«ادىرنا» ۇلتتىق پورتالى
