تاۋەلسىزدىك العاننان كەيىن ەلىمىزدە يسلام ءدىنى قايتا وركەندەدى, كوپتەگەن مەشىتتەر بوي كوتەردى. سونىمەن قاتار يسلامنان بولەك اتىن بۇرىن سوڭدى ەستىپ كورمەگەن ءار ءتۇرلى دىندەر پايدا بولدى. ءاۋ باستا دىنگە وڭ كوزقاراستاعى ازاماتتار كەيبىر اعىم وكىلدەرىنىڭ ارەكەتىنەن كەيىن كەيبىر دىنگە نەگە سۋىپ قالدى؟
سەبەبى ءار ءتۇرلى اعىمداردىڭ وكىلدەرى سالتاناتتى جيىندا ءانۇراندى ورىنداماي، ءتىپتى بالاسىن اسكەرگە جىبەرۋگە قارسى بولدى. سودان كەيىن ادامداردىڭ اراسىندا مەملەكەتتىك انۇرانعا قۇرمەت كورسەتپەيتىن «بۇل قانداي ءدىن؟» دەگەن سۇراق تۋىندادى. سونداي-اق ازاماتتاردىڭ وتان الدىنداعى بورىشىن وتەۋدى قاجەت دەپ تاپپايتىن ارەكەتى كوپشىلىكتىڭ ءدىني اعىمداردان كوڭىلىن سۋىتتى. ەگەر ءدىن ادامدارى اتا زاڭدى، كونستيتۋتسيانى قۇرمەتتەسە، مۇنداي جاعىمسىز جاعداي بولۋشى ما ەدى؟ بۇل سۇراققا بەلگىلى ءدىنتانۋشى باقىتجان ساتەرشينوۆ جاۋاپ بەردى.
«جالپى ءدىن دەگەنىمىز مەملەكەتكە باعىنۋى كەرەك. سەبەبى مەملەكەتتىڭ قاۋىپسىزدىگى الدىنعى قاتاردا تۇرادى. يسلام دىنىنە كەلەتىن بولساق، ەلىمىزدە قازاقستان مۇسىلماندار ءدىني باسقارماسى بار. سونداي-اق ەلىمىزدە وزگە دىندەردىڭ ءدىني بىرلەستىكتەرى جۇمىس ىستەيدى. مەنىڭ بىلۋىمشە، سولاردىڭ ىشىندە پروتەستانتتىق باعىتتاعى جاڭا ءدىني اعىمدار ازاماتتاردىڭ اسكەرگە بارىپ، وتان الدىنداعى بورىشتى وتەگەنگە قارسى. سونىمەن قاتار ءبىزدىڭ يسلام ءدىنىنىڭ ىشىندە دە راديكالدى كوزقاراستى ۇستاناتىن ءدىني توپتار بار. ولار زايىرلى مەملەكەتتى مويىنداماي، كونستيتۋتتسيانىڭ ورنىنا شاريعاتپەن ءجۇرۋ كەرەك دەيدى. ياعني ولار اينالىپ كەلگەندە يسلامي مەملەكەت قۇرۋدى قوش كورەدى. بۇل ەندى جالپى مۇسىلمان جاماعاتىنا قاتىستى ەمەس، كەيبىر توپتاردىڭ ويلارى بولىپ سانالادى. ال قازاقستان مۇسىلماندار ءدىني باسقارماسىنا باعىناتىن ازاماتتاردا مۇنداي راديكالدى، بوتەن كوزقاراس جوق»، – دەيدى ءدىنتانۋشى.
ازاماتتاردىڭ ءانۇراندى ورىنداماي قويۋى قاۋىپتى مە؟ باقىتجان ساتەرشينوۆ مەملەكەتتىك رامىزدەرگە قۇرمەت بولۋى كەرەك ەكەنىن ەسكەرتتى. «يسلام دىنىندە «وتاندى ءسۇيۋ يماننان» دەپ ايتىلادى. تۋعان جەرگە دەگەن ماحاببات مۇحامەد پايعامباردىڭ حاديستەرىندە ايتىلادى. ونىڭ ۇستىنە ادامزاتتى اللا تاعالا ءار ءتۇرلى ۇلتقا ءبولىپ جاراتقاننان كەيىن ولاردىڭ ءوزىنىڭ وتانى مەن جەرى بار. سول سەبەپتى ءانۇران سەكىلدى مەملەكەتتىك رامىزدەرگە قۇرمەت بولۋ كەرەك. مىسالى كەيدە جەردە جاتقان تيىندى كوتەرىپ الىپ جاتامىز. ول اقشانى پايدا تابۋ ءۇشىن كوتەرىپ الىپ جاتقان جوقپىز، تەك تيىندا مەملەكەتتىك ءرامىز بولعاننان كەيىن ول اياق-استى بولماسىن دەپ كوتەرىپ الامىز. بۇل دەگەن ءسوز ازاماتتىڭ ءوز ەلىنە دەگەن پاتريوتتىق سەزىمىنىڭ بار ەكەنىن كورسەتەدى»، – دەدى ءدىنتانۋشى.
«ادىرنا» ۇلتتىق پورتالى
