ءار ۇرپاقتىڭ ءوز ەرەكشەلىگى بار عوي. ول ءومىر سۇرگەن كەزەڭىنە بايلانىستى بولار. توقسانىنشى جىلعى بالالاردىڭ كوزقاراسى ءبىر بولەك، 70-ءشى جىلعى اعالارىمىزدىڭ ۇستانىمى باسقا، 2005-تەن كەيىنگى ۇرپاقتىڭ وي-ءورىسى ءتىپتى بولەك. ولاي بولۋى زاڭدىلىق. قازىرگى جاستاردىڭ اراسىندا ميىندا شەكتەۋ از. جاساندى شەكارالارى مەن توسقاۋىلدارى دا از.
جاڭا ۇرپاق ءوسىپ كەلە جاتىر. بۇل عىلىم-ءبىلىم دامىعان، جي سالتانات قۇراتىن ءداۋىردىڭ بالالارى عوي. مەنىڭ بالام درون ۇشىرعاندى جانە روبوتوتەحنيكانى جاقسى كورەدى. بىلتىر درون الىپ بەرگەن ەدىم، بيىل اپاسى مەن اتاسى تاعى بىرەۋىن اپەردى. ارزانداۋ بولعان سوڭ، بىلتىرعىسى ءسال «قۋىپ» كەتتى.
قازىر بالالارىن ءبىر ۇيىرمەدەن ەكىنشى ۇيىرمەگە سۇيرەپ جۇرەتىن اتا-انا كوپ. بيدەن الىپ شىعىپ، كۇيگە اپارادى. ودان الىپ شىعىپ، شاحماتقا قاتىستىرادى. اعىلشىن ءتىلى كۋرسى، دومبىرا ۇيىرمەسى، سپورت جانە باسقاعا قاتىسادى. ءبىر بالا بىرنەشە ۇيىرمەدە جۇرەدى. بۇل بالانىڭ بولاشاعى ءۇشىن كەرەك داعدىلاردى قالىپتاستىرادى. يا، بالا بارلىعىن يگەرىپ كەتۋى ەكىتالاي. الايدا اتا-انانىڭ مىندەتى بالاسىن بارىنشا جان-جاقتى ەتىپ ءوسىرۋ، قابىلەتىن اشۋ، قاجەتتى داعدىلاردى قالىپتاستىرۋ.
تاعى ءبىر اتا-انالار بولادى. بالالارىنا جاستايىنان تەك ءدىني ءبىلىم بەرەدى. جاعدايى كەلسە دە، باسقا ۇيىرمەگە بەرمەيدى. پوزيتسيا سونداي. ونداي اتا-انالار كوپ ەمەس، بىراق بار. سونداي بىرنەشە اتا-انانى تانيمىن. 5-6 جاستاعى بالالارىنا تەك ءدىني ءبىلىم بەرەدى. «بالامىز يماندى بولعانىن قالايمىز» دەيدى. سويلەسكەنىمدە سولاي دەيدى. ونىسى دۇرىس قوي ارينە. ۇرپاقتىڭ يماندى بولعانى جاقسى عوي. بىراق تەك قانا ءدىني بىلىممەن مىنا زاماندا العا باسۋ قيىن. ءبىر عانا ءدىني بىلىممەن شەكتەلىپ قالۋعا بولمايدى. باسقا دا داعدىلاردى يگەرۋ قاجەت. اسىرەسە بالا كەزدە. ويتكەنى بالالار تەز قابىلدايدى، تەز ۇيرەنەدى. سونى ۇمىتپاۋ قاجەت.
قازىر ۇيىرمەلەر كوپ قوي. مەملەكەت تاراپىنان تەگىن بەرىلەتىنى دە جەتكىلىكتى. نيەت پەن ۋاقىت بولسا بولعانى.
ۇقساس جاڭالىقتار
