Táýelsizdik alǵannan keıin elimizde ıslam dini qaıta órkendedi, kóptegen meshitter boı kóterdi. Sonymen qatar ıslamnan bólek atyn buryn sońdy estip kórmegen ár túrli dinder paıda boldy. Áý basta dinge oń kózqarastaǵy azamattar keıbir aǵym ókilderiniń áreketinen keıin keıbir dinge nege sýyp qaldy?
Sebebi ár túrli aǵymdardyń ókilderi saltanatty jıynda ánurandy oryndamaı, tipti balasyn áskerge jiberýge qarsy boldy. Sodan keıin adamdardyń arasynda memlekettik ánuranǵa qurmet kórsetpeıtin «Bul qandaı din?» degen suraq týyndady. Sondaı-aq azamattardyń Otan aldyndaǵy boryshyn óteýdi qajet dep tappaıtyn áreketi kópshiliktiń dinı aǵymdardan kóńilin sýytty. Eger din adamdary Ata zańdy, Konstıtýııany qurmettese, mundaı jaǵymsyz jaǵdaı bolýshy ma edi? Bul suraqqa belgili dintanýshy Baqytjan Satershınov jaýap berdi.
«Jalpy din degenimiz memleketke baǵynýy kerek. Sebebi memlekettiń qaýipsizdigi aldynǵy qatarda turady. Islam dinine keletin bolsaq, elimizde Qazaqstan musylmandar dinı basqarmasy bar. Sondaı-aq elimizde ózge dinderdiń dinı birlestikteri jumys isteıdi. Meniń bilýimshe, solardyń ishinde protestanttyq baǵyttaǵy jańa dinı aǵymdar azamattardyń áskerge baryp, Otan aldyndaǵy boryshty ótegenge qarsy. Sonymen qatar bizdiń ıslam dininiń ishinde de radıkaldy kózqarasty ustanatyn dinı toptar bar. Olar zaıyrly memleketti moıyndamaı, Konstıtýtııanyń ornyna sharıǵatpen júrý kerek deıdi. Iaǵnı olar aınalyp kelgende ıslamı memleket qurýdy qosh kóredi. Bul endi jalpy musylman jamaǵatyna qatysty emes, keıbir toptardyń oılary bolyp sanalady. Al Qazaqstan musylmandar dinı basqarmasyna baǵynatyn azamattarda mundaı radıkaldy, bóten kózqaras joq», – deıdi dintanýshy.
Azamattardyń ánurandy oryndamaı qoıýýy qaýipti me? Baqytjan Satershınov memlekettik rámizderge qurmet bolýy kerek ekenin eskertti. «Islam dininde «Otandy súıý ımannan» dep aıtylady. Týǵan jerge degen mahabbat Muhamed paıǵambardyń hadısterinde aıtylady. Onyń ústine adamzatty Alla Taǵala ár túrli ultqa bólip jaratqannan keıin olardyń óziniń otany men jeri bar. Sol sebepti ánuran sekildi memlekettik rámizderge qurmet bolý kerek. Mysaly keıde jerde jatqan tıyndy kóterip alyp jatamyz. Ol aqshany paıda tabý úshin kóterip alyp jatqan joqpyz, tek tıynda memlekettik rámiz bolǵannan keıin ol aıaq-asty bolmasyn dep kóterip alamyz. Bul degen sóz azamattyń óz eline degen patrıottyq seziminiń bar ekenin kórsetedi», – dedi dintanýshy.
«Adyrna» ulttyq portaly
