بۇگىن، 25 قاراشا كۇنى ءال-فارابي اتىنداعى قازاق ۇلتتىق ۋنيۆەرسيتەتىندە «ءال-فارابي شاكىرتتەرى - VIII» قالالىق پىكىرسايىس ءتۋرنيرى باستالدى، دەپ حابارلايدى «ادىرنا» ءتىلشىسى.
«ءال-فارابي شاكىرتتەرى - VIII» 2015 جىلدان بەرى جىل سايىن ۇيىمداستىرىلىپ كەلە جاتقان ءداستۇرلى دەبات ءتۋرنيرى. «التىن ساپا» ينتەللەكتۋالدى پىكىرسايىس كلۋبىنىڭ باستاماشىلدىعىمەن ءوتىپ جاتقان بيىلعى ويىنعا الماتى قالاسى بويىنشا 20-دان استام دەبات كلۋبتارىنان 64 فراكتسيا قاتىسۋدا.
ەكى كۇندىك تۋرنير سالتاناتتى اشىلۋمەن باستالدى. جاستار دومبىرا، قوبىز، ۆيولونچەل، گيتارا سىندى ءتۇرلى اسپاپتاردا ونەر كورسەتىپ، دەبات ويىنى تۋرالى ءوز ويلارىن ورتاعا سالدى.
بىرنەشە تۋرنيرلەردىڭ وتۋىنە ارقاۋ بولعان «ادىرنا» قوعامدىق قورىنىڭ پرەزيدەنتى ارمان اۋباكىر ويىن الدىندا قاتىسۋشىلارعا ساتتىلىك تىلەدى.
«دەبات ويىنى - ينتەللەكتۋالدى ويىنداردىڭ اراسىنداعى ۇلكەن كۇش. قازىرگى تاڭدا جەتىستىككە جەتىپ جاتقان ءتۇرلى تۇلعالاردىڭ كوبى دەباتشىلار. سوندىقتان «ادىرنا» قوعامدىق قورى بىرنەشە جىل قاتارىنان دەبات ويىندارىنا دەمەۋشىلىك ەتىپ كەلەدى. بۇگىنگى ويىنعا بارشاڭىزعا ساتتىلىك تىلەيمىن. ەلدىڭ دامۋىنا، وركەندەۋىنە نەگىز بولاتىن تۇلعا بولۋلارىڭىزعا شىن جۇرەكتەن تىلەكتەسپىن»، – دەدى ول.
اشىلۋ سالتاناتىنىڭ سوڭىندا «التىن ساپا» يپك كوورديناتورى اقشولپان سۇندەتوۆا ويىنشىلارعا جىلى لەبىزىن ءبىلدىرىپ، تۋرنير ەرەجەلەرىمەن ءتۇسىندىرىپ ءوتتى:
«تۋرنير تولىق فورماتتا ءداستۇرلى ەرەجەدە وتەدى. قۇرمەتتى دەباتشىلار بارشاڭىزعا ءساتتى ويىن تىلەيمىن. شىن مىقتى جەڭسىن»، – دەدى ول.
ەسكە سالا كەتەيىك، «التىن ساپا» ينتەللەكتۋالدى پىكىرسايىس كلۋبى 2007 جىلى قازاقستانداعى ەڭ العاش قۇرىلعان دەبات كلۋبى. كلۋب ماقساتى ءال-فارابي اتىنداعى قازۇۋ ستۋدەنتتەرى اراسىندا دەبات ويىنىن دامىتۋ جانە ناسيحاتتاۋعا، ينتەللەكتۋالدى، ۇلتجاندى جاستاردى قالىپتاستىرۋعا نەگىزدەلگەن.
«ادىرنا» ۇلتتىق پورتالى
