«حالىقارالىق باعدارلامالار ورتالىعى» اقش-تىڭ فلوريدا شتاتىنداعى ۋنيۆەرسيتەت كامپۋسىندا بولعان وقيعاعا بايلانىستى رەسمي مالىمدەمە جاسادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، 17 ساۋىردە فلوريدا شتاتى ۋنيۆەرسيتەتىنىڭ كامپۋسىندا اتىس بولىپ, قايعىلى جاعداي ورىن الدى. سوڭعى مالىمەتتەر بويىنشا، اتالعان وقيعا سالدارىنان ەكى ادام قازا تاۋىپ، تاعى التى ادام جاراقات العان.
«حالىقارالىق باعدارلامالار ورتالىعى» اق ورىن العان جاعدايدى مۇقيات باقىلاۋدا ۇستاپ وتىر جانە وسى ۋنيۆەرسيتەتتە ءبىلىم الىپ جاتقان قازاقستاندىق ستيپەندياتتارمەن تۇراقتى بايلانىس ورناتقان.
«قازىرگى تاڭدا فلوريدا شتاتى ۋنيۆەرسيتەتىندە «بولاشاق» حالىقارالىق ستيپەندياسى اياسىندا 4 ستيپەنديات ءبىلىم الۋدا: ونىڭ 3-ەۋى ماگيستراتۋرا، 1-ءى دوكتورانتۋرا باعدارلاماسى بويىنشا. بارلىق ستيپەنديات امان-ەسەن، جەرگىلىكتى بيلىك ورگاندارىنىڭ نۇسقاۋلارىن بۇلجىتپاي ورىنداپ وتىر. ءبىز ستۋدەنتتەرىمىزگە دەر كەزىندە اقپارات بەرىپ، قاۋىپسىزدىك شارالارىن ساقتاعاندارى ءۇشىن العىس بىلدىرەمىز.
وقيعاعا بايلانىستى ۋنيۆەرسيتەت باسشىلىعى بارلىق وقۋ ۇدەرىسىن جانە ءىس-شارالاردى ۋاقىتشا توقتاتتى. «حالىقارالىق باعدارلامالار ورتالىعى» اق اقش اۋماعىندا جۇرگەن بارلىق ستيپەندياتتارعا ساقتىق شارالارىن قاتاڭ ساقتاۋدى، سەرگەك بولۋدى جانە كۇمان تۋدىراتىن جاعدايلار ورىن السا، دەرەۋ ورتالىقپەن بايلانىسقا شىعۋدى سۇرايدى.
«حالىقارالىق باعدارلامالار ورتالىعى» اق قازا تاپقاندار مەن زارداپ شەككەندەردىڭ جاقىندارىنا كوڭىل ايتا وتىرىپ، جاعدايدىڭ تەز ارادا تۇراقتانۋىنا ءۇمىت بىلدىرەدى»، - دەلىنگەن «حالىقارالىق باعدارلامالار ورتالىعى» حابارلاماسىندا.
