بۇگىن، 1 ماۋسىمدا الماتىدا ادام ولىمىنە اكەلگەن جول-كولىك وقيعاسىنا قاتىستى ءىس بويىنشا نەگىزگى سوت تالقىلاۋى باستالدى، دەپ حابارلايدى «ادىرنا» ءتىلشىسى.
سوتتالۋشى الەكساندر پاك وزىنە تاعىلعان ايىپتى تولىق مويىندايتىنىن مالىمدەدى. ول قىلمىستىق كودەكستىڭ 345-1-بابىنىڭ 4-بولىگى «الكوگولدىك ماساڭ كۇيدە جول ءجۇرىسى قاعيدالارىن بۇزۋ، ابايسىزدا ەكى نەمەسە ودان دا كوپ ادامنىڭ ولىمىنە اكەپ سوعۋ» بويىنشا ايىپتالىپ وتىر.
ءۇش ادامنىڭ ءومىرىن قيعان جول اپاتى 21 ناۋرىزعا قاراعان ءتۇنى ءال-فارابي داڭعىلىندا بولعان ەدى. اپات سالدارىنان Mercedes كولىگىنىڭ جۇرگىزۋشىسى مەن 20 جانە 22 جاستاعى ەكى قىز كوز جۇمعان.
تەرگەۋ مالىمەتىنشە، Zeekr جۇرگىزۋشىسى الەكساندر پاك جول اپاتى بولعان ساتتە جەڭىل دارەجەدەگى الكوگولدىك ماساڭ كۇيدە بولعان. 7 ساۋىردە ول تەرگەۋ يزولياتورىنا ەتاپپەن جەتكىزىلدى.
سونىمەن قاتار وعان مەملەكەتتىك ءنومىر بەلگىلەرى زاڭسىز بەرىلۋى مۇمكىن دەگەن ايىپ بويىنشا وزىندىك قاۋىپسىزدىك دەپارتامەنتى دە قىلمىستىق ءىس قوزعادى، بىرنەشە لاۋازىمدى ادام قىزمەتىنەن بوساتىلدى.
