ادامزاتتىڭ دامۋ تاريحىندا ۇلى بەتبۇرىس جاساعان Apple كومپانياسىنىڭ نەگىزىن قالاۋشى، ونەرتاپقىش ستيۆ دجوبس: «مەن بارلىق تەحنولوگيامدى تەك سوكراتپەن كەزدەسۋ ءۇشىن جۇمسار ەدىم» دەگەن ەكەن.
ول نەگە ولاي ايتتى. 2011 جىلى (ولەر الدىندا) 7 ملرد دوللار بايلىعى بولعان الەمنىڭ ەڭ باقۋاتتى ادامدارىنىڭ ءبىرى بۇل سوزدەردى ءجايدان-ءجاي ايتا سالماعانى انىق. سەبەبى ستيۆ دجوبس سوكراتتى ۇلگى تۇتقان. ونىڭ ءىلىمىن بويىنا ءسىڭىرىپ، ۇستانىمدارىن وزىنە جول باعدار ەتكەن. «ادام كوپتىڭ پىكىرىمەن، كوپتىڭ سوزىمەن جۇرمەۋى كەرەك، شىندىقپەن ءجۇرۋ كەرەك، ءادىل ءومىر ءسۇرۋى كەرەك» دەگەن سوكراتتىڭ ءسوزىن ومىرلىك سەرىگى ەتكەن ستيۆ دجوبس قاراپايىم ادام بولعان.
ال ەندى ءوزىمىزدىڭ تاقىرىپقا قاراي ويىسساق. جوعارىداعى مىسالدان مىناداي ءتۇيىن شىعارۋعا بولادى. سەن ۇلگى تۇتاتىن ادامنىڭ مىنەز-قۇلقى، اقيقاتقا دەگەن كوزقاراسى، ءبىلىم مەن بىلىگى ءبارى-ءبارى بولاشاعىڭا اسەر ەتۋى مۇمكىن. ستيۆ دجوبس تا سوكراتقا ەلىكتەپ، ونى ۇلگى تۇتىپ جامان بولدى دەپ ايتا المايسىز. قازىرگى تاڭدا ەل جاستارى كىمگە ەلىكتەپ، كىمدى تۇلعا كورىپ ءجۇر. بۇگىنگىنىڭ ماسەلەسى وسى. بىراق جاعداي كوڭىل كونشىتپەيدى. ويتكەنى جەلىگە ءبىر كوز جۇگىرتىپ وتسەڭىز جاستاردىڭ كىمدەردىڭ تاربيەسىندە ءوسىپ جاتقانىن بىردەن اڭعارۋعا بولادى.
ميلليونداعان وقىرماندارى بار بلوگەرلەر مەن كۇماندى ءدىني ۋاعىزشىلاردىڭ داۋرەنى ءجۇرىپ تۇر. زامان نەگە بۇلاي بولدى دەرسىز. وعان كىنالىنى تابۋ وپ-وڭاي، بارىنە ءوزىمىز ايىپتىمىز. جاس ۇرپاقتىڭ الاش ازاماتتارىن اۋزىنان تاستاماي ايتىپ جۇرەتىن شاقتا، جەڭىل-جەلپىلەردىڭ ارتىنان ىلەسكەنىن كوزىمىز كورىپ ءجۇر.
نەگە ولار كەزىندەگى جانە قازىردەگى عالىمداردى، ەڭبەك ادامدارىن، ۇستازداردى، الاش ارىستارىن، تاريحي سالماعى بار تۇلعالاردى ۇلگى كورمەيدى. مىنە، ءالسىز تۇسىمىز دا وسى شىعار. ال ەندى جايمەندەپ ماسەلەنىڭ ءتۇپ-توركىنى نەدە، بوي سۇعىپ كورەلىك. ماماندار، مۇندا جاستارعا سالماق سالۋدىڭ استە قاجەتى جوق دەپ ەسەپتەيدى. سەبەبى بۇكىل ادامزات الەۋمەتتىك جەلىگە بايلانعان كەزەڭدە، جاستاردىڭ سول جولمەن جۇرەرى بەلگىلى. ال الەۋمەتتىك جەلىدە ناسيحاتىن جۇرگىزىپ وتىرعانداردىڭ ىقپالى جاستارعا كوبىرەك بولىپ تۇر.
اسىرەسە، كەيبىر ءداستۇردى جوققا شىعاراتىن ءدىني ۋاعىزشىلاردى الايىق. ءار ءبىر-ەكى جىلجىتۋدا الدىڭنان اتىپ شىعادى. اناۋ مۇنداي، مىناۋ انداي بولۋى كەرەك دەگەن سوزدەر قۇلاعىمىزعا جات بولماي قالعالى قاي زامان. سوندىقتان جاستاردىڭ ۇلگى تۇتاتىنى كۇماندى ۋاعىزشىلار مەن ومىرىندەگى ءاربىر قادامىن ايتىپ وتىراتىن بلوگەرلەر بولىپ وتىر.
بلوگەرلەردىڭ قاي جەرىنە ەلىكتەيدى دەرسىز. قازىر قاي بلوگەردى المايىق جاعدايى بار، قالتاسى قالىڭداۋ كەلەدى. ال ەندى قالىپتاسىپ، ءومىردىڭ باسپالداعىنان كوتەرىلىپ كەلە جاتقان جاستار ءۇشىن جەڭىل ءومىر قايتسە دە قىزىق قوي. ايتسە دە، بارىنە بىردەي توپىراق شاشا المايمىز. جەلىدە ەڭبەك ادامدارىنىڭ، ۇستازداردىڭ، عالىمداردىڭ جانە زيالىلاردىڭ جەتكىلىكتى دەڭگەيدە ناسيحاتتالماۋى بۇل تاياقتىڭ ەكىنشى ۇشى. جاستار جاس شىبىق سەكىلدى، قايدا بۇراسىڭ سوندا يىلەدى. الايدا مۇندا وتباسىداعى تاربيەنى دە ۇمىتپاعان ءجون. داستارحانىندا الاشتى ايتپاعان، ەڭبەكتىڭ جايىن ءسوز ەتپەگەن وتباسىنىڭ ۇرپاعى كىمگە ەلىكتەيتىنى انىق. سول ءۇشىن دە وتباسىدا عىلىمنىڭ پايداسىن، ادال ەڭبەكتىڭ جەمىسىن، الاشتىڭ ەل ءۇشىن قوسقان ۇلەسىن تاربيەمىزگە قوسقانىمىز ابزال. ول ۇرپاق سوندا عانا كىم ەكەنىمىزدى، كىم بولعانىمىزدى ۇمىتتىرمايدى!
