وقۋ-اعارتۋ ءمينيسترىنىڭ قىزمەتىن اتقارعان اسحات ايماعامبەتوۆ قىزمەتىنەن كەتۋىنە قاتىستى پىكىر ءبىلدىرىپ، وزىنە قولداۋ كورسەتكەن بارشا قازاق ەلىنە العىسىن ءبىلدىردى، دەپ جازادى "ادىرنا" ۇلتتىق پورتالى.
"قۇرمەتتى دوستار، قىمباتتى ارىپتەستەر! 2019 جىلعى ماۋسىم ايىندا پرەزيدەنت قاسىم-جومارت توقاەۆ ماعان وتە ماڭىزدى ءبىلىم مەن عىلىم سالالارىن سەنىپ تاپسىردى. كەيىننەن مەملەكەت باسشىسى مەنى ءۇش رەت قايتا تاعايىندادى. الدىمەن ءبىلىم جانە عىلىم ءمينيسترى، سودان كەيىن 100 جىلعا جۋىق ۋاقىتتان كەيىن قايتا قۇرىلعان، ۇلاعاتتى اعارتۋشى، ۇلت ۇستازى احمەت بايتۇرسىنوۆ باسقارعان وقۋ-اعارتۋ مينيسترلىگىنە قايتا تاعايىندادى. وسى ۋاقىت ىشىندە ماعان جۇكتەلگەن سەنىمدى اقتاۋعا جانە اشىق بولۋعا، جۇمىستا ءتيىمدى ءارى پايدالى بولۋعا تىرىستىم. ءومىرىمنىڭ وسى ماڭىزدى كەزەڭىندە سىزدەردىڭ، پرەزيدەنتتىڭ، مۇعالىمدەردىڭ، اتا-انالاردىڭ، مينيسترلىكتىڭ بۇكىل ۇجىمىنىڭ، ازاماتتىق قوعامنىڭ قولداۋىنىڭ ارقاسىندا ماڭىزدى ناتيجەلەرگە قول جەتكىزدىك. ءبىلىم جانە عىلىم سالاسىنا جاۋاپتى بولعان مينيستر رەتىندە وزدەرىڭىزگە ەسەپ بەرىپ، اتقارىلعان جۇمىستار تۋرالى ايتۋ ءجون دەپ سانايمىن. الداعى ۋاقىتتا مينيستر لاۋازىمىندا قابىلدانعان ءاربىر شەشىم تۋرالى ەگجەي-تەگجەيلى ەسەپ بەرۋدى جانە بۇل شەشىمدەردىڭ لوگيكاسى تۋرالى ايتۋدى جوسپارلاپ وتىرمىن. ونى كەز كەلگەن ادام كورە الادى", - دەدى ايماعامبەتوۆ.
ايماعامبەتوۆ 2019 جىلدان بەرى ىسكە اسىرعان باستى رەفورمالارعا توقتالىپ، ءبىلىم سالاسىندا ەنگىزىلگەن جاڭالىقتارعا تۇسىنىستىكپەن قاراعان اتا-انالارعا العىس ءبىلدىردى.
"وسى جىلدار ىشىندە مەن حالقىمىزدىڭ باتاسىن الىپ، پرەزيدەنتتىڭ سەنىمىن اقتاۋ ءۇشىن، ەل يگىلىگى ءۇشىن جۇمىس ىستەۋگە تىرىستىم. جىلپى العاندا، مەن ءۇشىن ۋاقىت تالابىنا سايكەس كەلەتىن جاڭا رەفورمالاردى ەنگىزۋ عانا ەمەس، سونىمەن قاتار ساباقتاستىقتى ساقتاۋ ماڭىزدى بولدى. اسىرەسە پاندەميا كەزىندە قيىن بولدى، بىراق ارىپتەستەرىمىزدىڭ تۇسىنىگى مەن قولداۋىنىڭ ارقاسىندا ول ۋاقىتتان دا وتتىك. وسى ۋاقىت ارالىعىندا مۇعالىمدەردىڭ ۇلكەن قولداۋىن سەزىندىم. سول ءۇشىن قۇرمەتتى ارىپتەستەرىمە العىس ايتقىم كەلەدى. مەنىڭ شەشىمدەرىمدى ءتۇسىنىپ، قولداعاندارىڭىز ءۇشىن راقمەت. ونىڭ بارلىعى ارقايسىڭىزدىڭ ەڭبەك جاعدايىڭىزدى جاقسارتۋعا باعىتتالعان بولاتىن. پرەزيدەنتتىڭ قولداۋى ارقاسىندا ءبىز وتە ماڭىزدى قۇجاتتى - «پەداگوگ مارتەبەسى تۋرالى» زاڭدى قابىلدادىق. سونىڭ ارقاسىندا تۇبەگەيلى وزگەرىستەر بولدى، مىسالى، جالاقىنى كوتەرۋ، قوسىمشا تولەمدەر، مىندەتكە جاتپايتىن قىزمەتتەردەن بوساتۋ، بەس كۇندىك جۇمىس اپتاسىنا اۋىسۋ، 30 جىل ەڭبەك ءوتىلى بار مۇعالىمدەردى ۇبت-دان بوساتۋ جانە 25 جىلدان استام جۇمىس ءوتىلى بار مۇعالىمدەرگە توسبەلگى تاعايىنداۋ جانە ت.ب. ءبىلىم بەرۋ سالاسى - قارقىندى دامىپ كەلە جاتقان سالا. سوندىقتان ەنگىزىلگەن جاڭالىقتارعا تۇسىنىستىكپەن قاراعان اتا-انالارعا العىسىمدى بىلدىرگىم كەلەدى", - دەپ جازدى ايماعامبەتوۆ.
مينيستر ارقاشان قوعاممەن اشىق بولۋعا تىرىسقانىن اتاپ ءوتىپ، بارلىق سىنداردى تۇزەتۋگە كۇش سالعانىن ايتتى.
"قانداي دا ءبىر باستامانى جۇزەگە اسىرعاندا بالالارىمىزدىڭ مۇددەلەرىن نەگىزگە الدىق. وسىعان دەيىن دە بالالارىمنىڭ مەملەكەتتىك مەكتەپ پەن بالاباقشاعا باراتىنىن بىرنەشە رەت ايتقان بولاتىنمىن. ءبىز بالاباقشا تاربيەشىلەرىنە، كوللەدج مۇعالىمدەرى مەن ۋنيۆەرسيتەت وقىتۋشىلارىنا دا قولايلى جاعداي جاساۋعا تىرىستىق. بارلىق يدەيا مەن العا قويىلعان مىندەتتى ىسكە اسىرعان وقۋ-اعارتۋ مينيسترلىگىنىڭ، ۆەدومستۆولىق باعىنىستى ۇيىمداردىڭ، دەپارتامەنتتەردىڭ، ءبىلىم باسقارمالارىنىڭ، ادىستەمەلىك كابينەتتەردىڭ، ءبىلىم بەرۋ ۇيىمدارىنىڭ بارلىق قىزمەتكەرىنە ەرەكشە العىسىمدى بىلدىرگىم كەلەدى. سىزدەر باعالاۋعا كەلمەيتىن اۋقىمدى جۇمىس اتقاردىڭىزدار. كەيدە تىم قاتال، تالاپشىل بولاتىنىمدى بىلەمىن. اشىق سويلەپ، قولداۋ ءبىلدىرىپ، سىن ايتقان قوعام قايراتكەرلەرى مەن بەلسەندىلەرگە العىس ايتامىن. مەن ارقاشان سىندارلى ەسكەرتۋلەردى قابىلداۋعا دايىنمىن جانە ولاردى تۇزەتۋگە تىرىسامىن. سونداي-اق جاڭالىقتارىمىزدى جاريالاعان جۋرناليستەرگە دە ەڭبەكتەرى ءۇشىن العىس ايتامىن. ءبىز وزەكتى اقپاراتتى بەلسەندى تۇردە بولىسۋگە جانە ديالوگ ءۇشىن ارقاشان اشىق بولۋعا تىرىستىق",- دەيدى مينيستر.
حالىقتىڭ ىستىق ىقىلاسىنا بولەنگەن مينيستر قاشان دا قوعامعا اشىق ەكەنىن جەتكىزىپ، وزىنە قولداۋ كورسەتكەن بارشا وتانداستارىنا العىسىن ءبىلدىردى.
"كەز كەلگەن ادام تىڭداي الاتىن اپپارات جينالىستارى اپتا سايىن ۇيىمداستىرىلدى. جۇمىس كەستەمنىڭ تىعىزدىعىنا قاراماستان، سۇحباتقا دا ۋاقىت بولۋگە تىرىستىم. ويتكەنى جاڭالىقتار مەن قابىلدانعان شەشىمدەردى وتانداستارىمىزعا ۋاقىتىلى جەتكىزۋ جانە ولاردىڭ ءتۇسىنۋى ماڭىزدى بولدى. تاربيەشىلەرمەن، وقۋشىلارمەن، ستۋدەنتتەرمەن، ۇستازدارمەن، مەكتەپ، كوللەدج ديرەكتورلارىمەن، وقىتۋشىلارمەن، رەكتورلارمەن، عالىمدارمەن، ءبىلىم باسقارمالارى مەن ۆەدومستۆولىق باعىنىستى ۇيىمداردىڭ باسشىلارىمەن كوپتەگەن كەزدەسۋ وتكىزدىم. مەن ءۇشىن ءارتۇرلى دەڭگەيدەگى ءبىلىم بەرۋ وكىلدەرىنىڭ پىكىرلەرىن تىڭداۋ جانە قانداي دا ءبىر شەشىم قابىلداعاندا بارلىق ماسەلەنىڭ «وڭ» جانە «تەرىس» جاقتارىن تارازىلاۋ ماڭىزدى بولدى. وسى قىزمەتتە سالانىڭ دامۋىنا ۇلەس قوسىپ، وتانداستارىم مەن پرەزيدەنتتىڭ سەنىمىن اقتاي الدىم دەپ ۇمىتتەنەمىن. بارشاڭىزعا قولداۋ كورسەتكەنى ءۇشىن العىس ايتامىن جانە وقۋ-اعارتۋ مەن جوعارى ءبىلىم جانە عىلىم مينيسترلىكتەرىندەگى ارىپتەستەرىمە تابىستى جۇمىس تىلەيمىن. مەن، ادەتتەگىدەي، قوعامعا اشىقپىن. بىرلەسكەن جۇمىس پەن بارلىق باستاماما قولداۋ كورسەتكەندەرىڭىز ءۇشىن تاعى دا العىس ايتامىن",- دەپ جازدى ايماعامبەتوۆ.
"ادىرنا" ۇلتتىق پورتالى
