قازاقتىڭ كەنىش كوڭىلدى قارياسى، جەز ساقالدى دارياسى - تورەگەلدى شارمانوۆ قازاق جاستارىنىڭ دەنساۋلىعىنا الاڭداۋشىلىق ءبىلدىردى. اقىلمان اقساقالدىڭ ايتۋىنشا، جاستار پەپسي، كولا، چيپسى، گامبۋرگەر سەكىلتى ونىمدەردى تۇتىنۋعا اۋەس. ونىڭ ورنىنا ۇلتتىق تاعامدارىمىزدى كوپتەپ تۇتىنعان دۇرىس. اقساقالدىڭ اقىلعا قونىمدى پىكىرلەرىن "ادىرنا" ۇلتتىق پورتالى جارىققا شىعاردى.
تورەگەلدى شارمانوۆ:
- ستۋدەنتتەرىمىز پەپسي، كولا، چيپسى، گامبۋرگەر سياقتى ونىمدەرىن تۇتىنۋعا اۋەس. وسى تەز پىسەتىن ونىمدەردە كومىرسۋتەگى، ترانسمايلىق قىشقىل، گاز وتە كوپ. بۇل ادام اعزاسىنداعى پايدالى زاتتاردى شىعارىپ تاستايدى. زيانى شاش-ەتەكتەن. قارىننىڭ بوس كەڭىستىگىن تولتىرعاننان وزگە پايداسى بار دەپ ايتا المايمىن. قۇرامى تولىپ تۇرعان كومىرسۋ عوي، قايدان پايداسى بولسىن؟ ولار سەمىزدىككە اكەلەدى، وزگە دە ءتۇرلى سىرقاتتارعا دۋشار ەتەدى، - دەپ كوپشىلىكتى اتالمىش ونىمدەردىڭ قاۋىپ-قاتەرىنەن ساقتاندىردى.
سونىمەن قاتار، سۋسىندار مەن كوشە تاعامدارىنىڭ زارارىنا قاتىستى ماڭىزدى تۇسىنىك بەرىپ، ونىڭ سالدارىن ساراپتادى.
"ال جاستار بولسا، تاتتىلىگىنە قىزىعىپ، دامىنە ءسۇيسىنىپ ءىشىپ جاتىر. ءىشىپ جاتىر – دەنساۋلىقتارىن قۇرتىپ جاتىر. بۇل سۋسىندار تىك ىشەكتەگى، جاتىرداعى قاتەرلى ىسىكتى تۋدىرادى. مي جۇيەسىنىڭ قابىلداعىشتىق قاسيەتىن تومەندەتەدى. كالتسيدىڭ اعزاعا سىڭۋىنە كەدەرگى كەلتىرىپ، سۇيەكتەردىڭ بىتۋىنە، جەتىلۋىنە كەرى اسەر ەتەدى. كالتسي جەتىسپەگەندىكتەن وستەوپوتروز سىرقاتى بەل الىپ، سۇيەك سىنعىش كەلەدى. بالالار كوپ نارسەگە بايىپتاپ قارامايتىنى بەلگىلى، سوندىقتان ءبىرىنشى كەزەكتە، ۇلكەندەر ولارعا ۇعىندىرىپ، زارداپتارىن تۇسىندىرگەنى ابزال" - دەدى عالىم.
كەزىندە دەنساۋلىق ساقتاۋ ءمينيسترى قىزمەتىن اتقارعان ءارى بۇگىنگى تاعامتانۋ اكادەمياسىنىڭ پرەزيدەنتى تورەگەلدى شارمانوۆتىڭ پايىمداۋىنشا، كۇندەلىكتى تۇرمىسىمىزعا ۇلتتىق تاعامدارىمىزدىڭ دەندەپ ەنگەنى دۇرىس. بۇل جايلى:
- جاستارىمىز نەشە ءتۇرلى پيتستسا، گامبۋرگەر سىندى تەز پىسەتىن تاعامداردان شىعا الماي جاتىر. ەگەر حالقىمىزدىڭ دەنساۋلىعىن جاقسارتامىز دەسەك، ۇلتتىق تاعامدارىمىزدى، سونىڭ ىشىندە قۇرتىمىزدى، شۇباتىمىزدى، ايرانىمىزدى، ىرىمشىگىمىزدى، باۋىرساعىمىزدى دارىپتەۋىمىز كەرەك. بۇل تاعامدار قاسيەتىنىڭ كەرەمەتتىلىگى سونشالىق – سول ارقىلى ءبىز تالاي قيىنشىلىقتان امان قالعانبىز. وسى تاعامدار ارقىلى ۇلان-بايتاق دالامىزعا قول جەتكىزدىك، الاپات جاۋدى جەڭدىك، ارانى كەڭ اشتىققا قارسى تۇردىق... - دەپ وي تىزبەكتەدى عالىم.
ورايى كەلگەندە ايتا كەتەيىك، تورەگەلدى شارمانوۆ الەۋمەتتىك جەلىلەردە وتە بەلسەندى جان. ءوزىنىڭ يۋتۋب-ارناسىندا سان-سالالى سۇحباتتارى بار. قايراتكەر تىنباستان ءبىرىنشى بايلىقتىڭ قادىر-قاسيەتىن اسپەتتەپ، ونى وسكەلەڭ ۇرپاققا ۇعىندىرىپ كەلەدى.
"ادىرنا" ۇلتتىق پورتالى
