بۇگىن شىمكەنت قالاسىندا ءبىر ءۇيدىڭ 5 ادامى گازعا ۋلانىپ، قازا بولدى، دەپ حابارلايدى «ادىرنا» ءتىلشىسى.
«كازترانسگاز ايماق» كومپانياسىنىڭ ايتۋىنشا، قايعىلى وقيعا ىنتىماق ىقشام اۋدانىندا بولعان.
«اپات بريگاداسى وقيعا ورنىن تەكسەرگەن كەزدە قابىرعاعا ورناتىلعان جىلىتۋ قازاندىعىندا ءتۇتىن شىعارۋ قۇبىرى بولماعانى، قازاندىق كورپۋسىنىڭ جوق ەكەنى انىقتالدى. بۇعان قوسا قازاندىق اۆتوماتيكادان اجىراتىلعان، سونداي-اق بولمەدە جەلدەتۋ قۇبىرى بولماعان»،— دەدى كومپانيانىڭ ءباسپاسوز قىزمەتى.
گاز قىزمەتكەرلەرى بۇعان دەيىن ءۇيدى تەكسەرگەن كەزدە قازاندىقتىڭ جاعدايىن كورىپ، بۇل ءۇيدى گازدان اجىراتقانىن مالىمدەدى. مامانداردىڭ ايتۋىنشا، ءۇي يەسى گازدى زاڭسىز قوسىپ العان.
وقيعانىڭ سەبەپتەرى سوت-مەديتسينالىق ساراپتامانىڭ قورىتىندىسى بويىنشا ناقتىلانادى.
ايتا كەتەيىك، ءبىر كۇن بۇرىن اباي وبلىسى اياگوز قالاسىندا ءۇي ورتەنىپ، ءبىر ءۇيدىڭ 4 بالاسى قازا تاپقان ەدى.
